ԵՐԵՎԱՆ, 31 հոկտեմբերի - Sputnik. ՀՀ գլխավոր դատախազությունը ուսումնասիրություններ է իրականացրել «Ծաղկաձորի գլխավոր մարզահամալիրում»։ Այս մասին տեղեկանում ենք ՀՀ դատախազության պաշտոնական կայքից։
Ուսումնասիրությամբ պարզվել է, որ ՀՀ կառավարության որոշմամբ «Ծաղկաձորի գլխավոր մարզահամալիրին» թույլատրվել է սեփականության իրավունքով իրեն պատկանող և «Ն» ընկերությանը վարձակալությամբ տրամադրված 32237.1 քառ. մետր մակերեսով գույքը (20 անվանում շինություններ՝ հյուրանոցային մասնաշենքեր, սպորտդահլիճներ, հասարակական կենտրոն և այլն) և ընդհանուր 76121 քառ. մետր հողամասը օտարել նշված «Ն» ընկերությանը 541.7 մլն դրամով։
«ՀՀ կառավարության որոշման ընդունման համար հիմք է հանդիսացել ՓԲԸ-ի և «Ն» ընկերության միջև 08.11.2006թ. կնքված՝ ՓԲԸ-ին պատկանող Ծաղկաձոր համայնքում գտնվող հողամասը, շենքերը, վարչական կենտրոնները, ռեստորանները, բարերը, զվարճանքի հարմարությունները, լողավազանները, մարզիկների համար մարզական կենտրոնները և այլ շինությունները 50 տարի ժամկետով «Ն» ընկերությանը վարձակալության հանձնելու պայմանագիրը»,- նշված է դատախազության տարածած հաղորդագրության մեջ։
Պարզվել է, որ նշված պայմանագրում վարձավճարի չափի հաշվարկի, վարձատուի կողմից պայմանագրի խզման դեպքում հավելյալ վճարումներ կատարելու, գույքի առուվաճառքի դեպքում դրա գնի վերաբերյալ, առանց որևէ հիմնավորման, առկա են պետական ՓԲԸ շահերին հակասող, միակողմանի ոչ շահավետ դրույթներ։
Որտեղից է հրապարակվել Վանեցյանի և Խաչատրյանի գաղտնալսված զրույցը. Գրիգորյանի բացահայտումը
«Գույքն օտարելու թույլատրության վերաբերյալ ՀՀ կառավարության որոշման նախագծի հիմնավորման մեջ նշվել է, որ «Ն» ընկերությունը վարձակալության պայմանագրով արդեն իսկ կատարել է ավելի քան 3.4մլրդ դրամի ներդրում: Մինչդեռ պարզվել է, որ որպես ներդրում կատարելու հիմնավորում ներկայացվել է միայն 2007-2008թթ. կազմած մոտ 2 մլրդ դրամի հաշիվ ֆակտուրաներ և շինարարական աշխատանքների կատարողական ակտեր, իսկ ՊԵԿ-ից ստացված տվյալների համաձայն՝ 2007-2008թթ. կազմված մոտ 738մլն դրամի կատարողական ակտերի հաշվարկային փաստաթղթերի վերաբերյալ տեղեկատվությունը «Ն» ընկերության հարկային գործում բացակայում է»,- հայտնում են դատախազությունից։
Նշվում է, որ ՀՀ կառավարության վերոնշյալ որոշմամբ օտարված գույքի շուկայական արժեքը՝ նշված տարվա դրությամբ կարող էր կազմել 1.8մլրդ դրամ՝ օտարման գնից 1.3մլրդ. դրամով ավելի։ Այսինքն` ՀՀ կառավարությանը ներկայացվել են գույքի արժեքի, դրա գնահատման հիմքերի և ներդրումների վերաբերյալ անարժանահավատ տվյալներ:
Պարզվել է նաև, որ ՀՀ կառավարության այդ որոշմամբ պետական ՓԲԸ գույքի մի մասը օտարելուց հետո «Ն» ընկերության կողմից փաստացի օգտագործվող մնացած գույքի շուկայական արժեքը 2019թ. դրությամբ կազմում է շուրջ 6.1մլրդ դրամ, և այն շուկայական արժեքով վարձակալության հանձնելու դեպքում՝ 2010-2018թթ. դրա ընդհանուր վարձավճարը կկազմեր շուրջ 704 մլն. դրամ: Մինչդեռ ընկերությունը երբևէ որևէ վարձավճար չի վճարել։
Կինը իր տանն ու տարբեր հյուրանոցային համալիրներում «վաճառել» է 16–ամյա աղջկա
Բացի այդ, պետական ՓԲԸ-ի գույքի կազմում եղած՝ կառուցման ընթացքում գտնվող 2323,3ք/մ մակերեսով անավարտ շինությունը դեռևս 2005թ.-ին գնահատվել է 604.3մլն դրամ, սակայն, վերջինիս շուկայական արժեքը գնահատվել է ընդամենը մոտ 50մլն դրամ, որը 2011թ.-ին քանդվել է և օտարվել է ընդամենը 3.6մլն դրամով:
Ուսումնասիրությամբ ի հայտ են բերվել փաստական տվյալներ 2010թ. ՀՀ սպորտի և երիտասարդության հարցերի նախարարության պատասխանատու պաշտոնատար անձանց պաշտոնեական դիրքը ծառայության շահերին հակառակ օգտագործելու՝ Կառավարության քննարկմանն անարժանահավատ տվյալներ ներկայացնելու, դրա հետևանքով ՊՓԲԸ գույքը շուկայականից 3.3 անգամ պակաս գնով օտարելու, 2010-2019թթ. ՊՓԲԸ-ի պատասխանատու ծառայողների՝ պաշտոնեական դիրքն օգտագործելով, իրենց վստահված առանձնապես խոշոր չափերի գույքը հափշտակելու, իրենց կարգադրիչ կամ այլ լիազորությունները կազմակերպության շահերին հակառակ և իրենց կամ ուրիշ անձանց օգտին օգտագործելով գույքի օգտագործման դիմաց վարձավճարներ գանձելու ուղղությամբ միջոցներ չձեռնարկելու վերաբերյալ։
