ԵՐԵՎԱՆ, 13 հոկտեմբերի –Sputnik. Վրաստանի վարչապետ Գեորգի Գախարիան պաշտոնական այցով Հայաստան կժամանի հոկտեմբերի 15-ին։ Այս մասին Sputnik Արմենիայի թղթակցի հետ զրույցում ասաց Վրաստանի խորհրդարանի պատգամավոր Հենզել Մկոյանը։
Գեորգի Գախարիան Վրաստանի վարչապետի աթոռը զբաղեցրել է 2019 թվականի սեպտեմբերի 8-ին։ Հենց այդ օրը երկրի խորհրդարանը վստահություն հայտնեց ՆԳՆ նախկին պետի գլխավորած կառավարությանը։
«Պարոն Գախարիան Հայաստան կայցելի մեկօրյա պաշտոնական այցով հոկտեմբերի 15-ին։ Պատվիրակության կազմում, ամենայն հավանականությամբ, կլինեն Վրաստանի արտգործնախարարը, ներքին գործերի նախարարը, էկոնոմիկայի նախարարը, ինչպես նաև խորհրդարանի փոխխոսնակներ», – ասաց Մկոյանը։
Փաշինյանը հեշտությամբ լեզու կգտնի Գախարիայի հետ. նա նոր մարդ չէ Հայաստանի համար
Նշենք, որ Գախարիայի տարածաշրջանային շրջագայությունը մեկնարկեց Ադրբեջանից, ուր նա մեկնել էր հոկտեմբերի 9-ին։ Հայաստանից հետո Վրաստանի վարչապետը կայցելի Թուրքիա։
Հիշեցնենք, որ Գախարիան 2017 թվականի հունիսին Երևան է այցելել Վրաստանի էկոնոմիկայի նախարարի, իսկ 2018 թվականի փետրվարին` ՆԳՆ ղեկավարի պաշտոնում։
