«Սանիթեք»

Քաղաքապետարանը խեղաթյուրում է. «Սանիթեքը» մեղադրում է Մարությանին և փաստեր ներկայացնում

68
(Թարմացված է 17:15 30.09.2019)
Երևանի քաղաքապետարանը, ըստ «Սանիթեքի» իր նպատակին հասնելու համար դիմում է բոլոր հնարավոր մեթոդներին՝ այս ամենին մասնակից դարձնելով ողջ լրատվական դաշտը, ՀՀ կառավարությանը և այլ մարմինների:

ԵՐԵՎԱՆ, 30 սեպտեմբերի — Sputnik. Կոռեկտ չէ հերթական անգամ դատախազության կողմից աղաղակող 5.3 մլրդ դրամի վնասի մասին պաշտոնապես հայտարարելն այն պայմաններում, երբ «Սանիթեք» պայմանագրերի տարեկան ամբողջ շրջանառությունը չի գերազանցում  անգամ 5.2 մլրդ դրամը։

Այս մասին ասված է Երևանի աղբահանությամբ զբաղվող «Սանիթեք» ընկերության այսօր տարածած հայտարարության մեջ։

Ըստ «Սանիթեքի» քաղաքապետարանի հաղորդագրության մեջ նշված փաստերը խեղաթյուրում են ողջ իրականությունը և արդյունք են մակերեսային վերլուծությունների։ Նրանց խոսքով` դրանք նպատակ են հետապնդում արդարացնել պետական մեքենայի բոլոր լծակների օգտագործմամբ  «Սանիթեքին» վերացնելու Երևանի քաղաքապետի ծրագիրը։ Վերջինն իր կյանքի նպատակին հասնելու համար դիմում է բոլոր հնարավոր մեթոդներին՝ այս ամենին մասնակից դարձնելով ողջ լրատվական դաշտը, ՀՀ կառավարությանը՝ ի դեմս ՀՀ ՊԵԿ-ի, ՀՀ գլխավոր դատախազությանը՝ ի դեմս պետական շահերի պաշտպանության վարչությանը, ՄԻՊ գրասենյակին և բոլոր հնարավոր այլ մարմիններին:

«Սանիթեքն» անդրադարձել է նաև հայտարարությունում ներկայացվածված յուրաքանչյուր փաստին և մեկնաբանել դրանք։

Երևանի քաղաքապետարանը սկսել է տեսակավորել աղբը. տեսանյութ

Ընկերությունը հերքում է, որ մասնագիտական փորձառություն, անհրաժեշտ տեխնիկական միջոցներ, ֆինանսական միջոցներ և աշխատանքային ռեսուրսներ ունենալը հավաստող փաստաթղթերում առկա է որևէ ակնհայտ կեղծ տվյալ, քանի որ բոլոր ներկայացված փաստաթղթերը համապատասխանում են իրականությանը և կարող են ստուգվել ցանկացած վարույթի շրջանակներում:

Քիչ է մնացել. «Սանիթեքն» արբիտրաժային դատարանով քաղաքապետարանին վախեցնել չի կարող

«Բանկի կամ վարկային կազմակերպության ընկերության կողմից տրված երաշխիքներ չտրամադրելու արդյունքում համայնքին 1.607.721.900 ՀՀ դրամ վնաս պատճառելու մասով, նշենք, որ «Սանիթեքը» պայմանագրային իր պարտականությունները կատարել է բարեխղճորեն և առ 2018 թվականը բոլոր անհրաժեշտ փաստաթղթերն առկա են եղել։ Հատկանշական է, որ 1.607.721.900 ՀՀ դրամ վնասը 2019 թվականին Երևանի քաղաքապետարանի կողմից ձեռք բերված տեխնիկայի և աղբամանների հանրագումարն է: 2019 թվականի տարեկան համաձայնագրի կնքման ժամանակ քաղաքապետ Հայկ Մարությանի կողմից չի պահանջվել տվյալ տարվա համար նախատեսված բանկի կամ վարկային կազմակերպության ընկերության կողմից տրված երաշխիք։ Հետևաբար, նույնիսկ եթե հիմնավորվի, որ նշված գումարը վնաս է, այլ ոչ թե քաղաքապետի կողմից չհիմնավորված ծախս, ապա դրա համար պատասխանատու է քաղաքապետ Հայկ Մարությանը»,–ասված է հայտարարության մեջ:

Ըստ «Սանիթեքի»` 16.000 հատ 1100 լիտրանոց աղբի կոնտեյներների մատակարարման  տեղադրման, աղբի հավաքման, հեռացման դրանց լվացման, վերանորոգման փոխարինման աշխատանքների համար վճարված 1.8 մլրդ դրամը քաղաքապետի վառ երևակայության և պայմանագրի պայմանների յուրովի, իրեն ձեռնտու տարբերակով մեկնաբանելու արդյունք է, քանի որ պայմանագրի էությունից բխում է, որ աղբահանություն իրականացնող օպերատորները նշված քանակի աղբամաններ պետք է ապահովեն իրենց գործունեության ամբողջ ժամանակահատվածի ընթացքում, պարբերաբար։

«Ինչ վերաբերվում է հայտարարությունում նշված գոյություն չունեցող 4000 հարթակների մաքրման աշխատանքների դեմ վճարելուն, այն դեպքում, երբ կառուցված է ընդամենը 459-ը, հայտնում ենք հետևյալը։ Այս տեղեկատվությունը ակնհայտ ապատեղեկատվություն է և նպատակ է հետապնդում մոլորության մեջ գցել հանրությանը և ևս մեկ անգամ վնասել «Սանիթեք» ընկերության հեղինակությունը։ Ամեն ինչ շատ ավելի պարզ է։ Երևանում առկա են աղբամանների տեղակայման շուրջ 4000 վայրեր, որոնցից միայն 459-ում կա կառուցված հարթակ (հարթակներ կառուցելը քաղաքապետարանի պարտականությունն է)։

Եթե քաղաքապետարանը ժամանակին չի կառուցել նշված հարթակները, դեռևս չի նշանակում, որ քաղաքում չեն եղել աղբամանների տեղակայման վայրեր։ Հետևաբար, «Սանիթեք»-ին վճարվել է ոչ թե գոյություն չունեցող հարթակների մաքրության համար գումարներ, ինչպես նշվել է  հայտարարության մեջ, այլ իրականում վճարվել է աղբամանների տեղակայման 4000 վայրերի մաքրման աշխատանքների համար, որոնցից 459-ում են միայն կառուցված եղել հարթակներ»,–ասված է հայտարարության մեջ։

Ինչ վերաբերում է քաղաքապետի մոտ առկա այն հետապնդող մտքին, որ աղբամանները պետք է լինեն մետաղական, ապա հայտնում ենք, որ աղբահանության ժամանակ օգտագործվող տեխնիկան, ինչպես նաև աղբամանները համապատասխանում են  Պայմանագրի տեխնիկական բնութագրերով նախատեսված EN840 ստանդարտին:

Աղբի հա՞րց, թե՞ քարոզչություն. լրագրող վարչապետն ու դերասան քաղաքապետը PR ակցիա՞ էին անում

 

Զրպարտանքների շարունակական բնույթի դեպքում մենք կսկսենք հրապարակել մեր ձեռքի տակ ունեցած բոլոր ապացույցները»:

Հիշեցնենք, որ համաձայն մամուլում դատախազության կողմից տարածված հայտարարության`  Երևանի քաղաքապետարանի պաշտոնատար անձանց և  «Սանիթեք» ընկերության իրավասու անձանց կատարած առերևույթ չարաշահումների հետևանքով Երևանի համայնքին պատճառվել է 5.3 մլրդ դրամ վնաս:

68
թեգերը:
Երևանի քաղաքապետարան, Հայկ Մարության, աղբաման, աղբ, Սանիթեք, երևանցիներ, Երևան
Ըստ թեմայի
«Սանիթեքը» հրաժարվել է քաղաքապետարանին տալ աղբահանություն իրականացրած տարածքների ցանկը
Փաշինյանը կասկած չունի, որ աղբի հարցն արագ կլուծվի. նա գովել է Մարությանին
Սպասվում են նոր քրեական գործեր. Փաշինյանը գոհ է Երևանի աղբահանությունից