Հայկ Մարության

«Կարծում եմ` ակցիան ուղղորդված է». Մարությանը` «Սանիթեքի» աշխատակիցների բողոքի ցույցի մասին

57
(Թարմացված է 15:05 10.09.2019)
Երևանի քաղաքապետը խոսել է «Սանիթեքին» վճարած գումարի ու ընկերության աշխատակիցների ակցիայի մասին։

ԵՐԵՎԱՆ, 10 սեպտեմբերի — Sputnik. Երևանի քաղաքապետ Հայկ Մարությանը կարծում է, որ «Սանիթեք» ընկերությունն ուղղորդում է իր աշխատակիցներին, որպեսզի քաղաքապետարանի դեմ բողոքի ակցիա անեն։ Մարությանն այս մասին ասաց այսօր Երևանի ավագանու նիստից հետո լրագրողների հետ զրույցում։

Արդեն հայտնել էինք, որ քաղաքապետարանի դիմաց այսօր «Սանիթեքի» աշխատակիցները բողոքի ակցիա էին անում` ասելով, որ ընկերությունը հրաժարվում է փոխանցել իրենց վերջին ամսվա աշխատավարձը։ Նրանց խոսքով` «Սանիթեքն» ասել է, որ գումարները չի փոխանցում, քանի որ քաղաքապետարանը չի փոխանցել ընկերության հասանելիք ամբողջ գումարը։

«Մենք տարվա ընթացքում պարբերաբար մարդու իրավունքների պաշտպանի գրասենյակից նամակներ էինք ստանում, որ «Սանիթեքի» աշխատակիցները դիմել են իրենց, քանի որ չեն ստացել աշխատավարձը, վերջնահաշվարկը։ Այսինքն` ընկերության մոտ նման դեպքեր էլի են եղել։ Ինչ վերաբերում է այսօրվա բողոքի ակցիային, ապա կարծում եմ, որ սա «Սանիթեքի» կողմից ուղղորդված միջոցառում է»,–ասաց նա։

Քաղաքապետի խոսքով` ուշագրավ է այն հանգամանքը, որ ընկերության աշխատակիցները հայտնել են, որ ամեն ամսվա երկրորդ կեսից հետո են ստացել աշխատավարձ, իսկ հիմա դեռ ամսի 15–ը չեկած` արդեն աշխատավարձի մասին են խոսում։

Անդրադառնալով քաղաքապետարանի կողմից ընկերությանը հատկացվող գումարին` Մարությանը նշեց, որ իրենք ուղղակի վերջին ամսվա գումարը փոխանցել են 9 տոկոս տուգանքների համար պահելով։ Նրա հավաստմամբ` ընկերությանը հասանելիք գումարը, 9 տոկոսից բացի, ամբողջությամբ վճարվել է։

Հարցին, թե ինչ է լինելու «Սանիթեքի» ավելի քան 900 աշխատակցի հետ, քանի որ նրանք նշում են նաև աշխատանքը կորցնելու խնդիրը, Մարությանը պատասխանեց, որ իրենք մասնավոր ընկերության խնդիրների համար պատասխանատու չեն։

«Մյուս կողմից, մենք հայտնել ենք, որ աղբահանությամբ զբաղվող նոր համայնքային հիմնարկում կան մի շարք թափուր աշխատատեղեր և դրանք կարող են լրացվել հենց «Սանիթեքի» աշխատողներով»,–ասաց նա։

Տուգանքները պայմանագրի համաձայն էին. Երևանի քաղաքապետարանը պատասխանել է «Սանիթեքին»

Հիշեցնենք, որ այսօր Երևանի ավագանին «Երևանի աղբահանություն և սանիտարական մաքրում» համայնքային հիմնարկի հաստիքներն ավելացնելու որոշում կայացրեց։ Հիմնարկը կունենա 635 աշխատակից, որոնց աշխատավարձերն ամսվա կտրվածքով կկազմեն 158 մլն դրամ: Հիմնարկը կզբաղվի նաև մայրաքաղաքում ձմռան ամիսներին ձյան մաքրման աշխատանքների իրականացմամբ:

«Սանիթեքի» ղեկավարն ասել է՝ մինչև երբ է շարունակվելու բոյկոտը. նամակ քաղաքապետին

 

57
թեգերը:
Հայկ Մարության, Սանիթեք, աղբ, Հայաստան
Ըստ թեմայի
Երևանի քաղաքապետարանին դատի են տվել. ինչու՞ չեն հրապարակում «Սանիթեքի» պայմանագիրը
Փաշինյանը կասկած չունի, որ աղբի հարցն արագ կլուծվի. նա գովել է Մարությանին
«Սանիթեքը» որոշել է աղբահանության փոխարեն բեռնափոխադրում կատարել. ՊԵԿ բացահայտումները