ՔԿՀ

Դատապարտյալների պայմանները կբարելավվեն. կառավարությունը գումար հատկացրեց

26
(Թարմացված է 12:11 05.09.2019)
Նախարարը խոստացավ, որ այս անգամ պատշաճ հսկողություն կլինի աշխատանքների նկատմամբ, և այն ավարտին կհասցվի, գոնե տարրական սանիտարահիգիենիկ պայմաններ ստեղծելու առումով։

ԵՐԵՎԱՆ, 5 սեպտեմբերի — Sputnik. ՀՀ կառավարությունը 176 մլն 706 հազար դրամ կհատկացնի Արդարադատության նախարարությանը քրեակատարողական հիմնարկների կապիտալ վերանորոգման աշխատանքների իրականացման համար։ Այս որոշումն ընդունվեց կառավարության այսօրվա նիստի ընթացքում։

Արդարադատության նախարար Ռուստամ Բադասյանի խոսքով` տրամադրվող գումարով կբարելավվի ՔԿՀ–ներում պահվող դատապարտյալների բնակությամբ և կոմունալ- կենցաղային պայամանները։

«Անցած տարի կառավարության որոշմամբ Նուբարաշեն ՔԿՀ-ում արտաքին և ներքին ջրահեռացման ցանցի վերանորոգման համար տրամադրվել էր 39 618 700 ՀՀ դրամ, որից 2018–ի ընթացքում կատարված աշխատանքների դիմաց վճարվել է 19 785 500 դրամ, մնացած 19 833 200 վերադարձվել  է պետբյուջե։ Աշխատանքներն ավարտին հասցնելու համար կառավարության պահուստային ֆոնդից անհրաժեշտ է 12 580 900 դրամ»,–ասաց նախարարն ու ներկայացրեց նաև մնացած քրեակատարողական հիմնարկներում կատարված ու կատարվելիք աշխատանքները։

Բադասյանի տեղեկացմամբ` մի շարք ՔԿՀ–ներում կոյուղագծերը գտնվում են վթարային վիճակում և վթարվելու դեպքում կարող են համաճարակային իրադրություններ առաջացնել։ «Այս խնդիրը կառավարության նիստում էլի է  քննարկվել, բայց հետ ենք վերցրել, որովհետև Պետական վերահսկողական մարմնի կողմից արձանագրվել էին որոշակի չարաշահումներ։ Հիմա մենք լրացուցիչ այն գումարն ենք ուզում, որը նախորդ անգամ չի օգտագործվել»,–պարզաբանեց նախարարը։ 

Նա խոստացավ, որ այս անգամ պատշաճ հսկողություն կլինի աշխատանքների նկատմամբ, և այն ավարտին կհասցվի, գոնե տարրական սանիտարահիգիենիկ պայմաններ ստեղծելու առումով։

ՀՀ վարչապետ Նիկոլ Փաշինյանն էլ նշեց, որ պահման պայմանների առումով գրեթե բոլոր ՔԿՀ–ներում նույն վատ վիճակն է, բայց կա նաև այլ խնդիր։ «Մեր ՔԿՀ–ների մեծ մասը ՀՀ օրենսդրությամբ սահմանված չափանիշներին չեն համապատասխանում, իրականում դրանք ՔԿՀ չեն, այլ պարսպապատված վիճակ, որտեղ գետտոյական վիճակ է։ Այս խնդիրը շատ խորն է, և շատ ավելի խորը ուսումնասիրության կարիք ունի»,–ասաց ՀՀ վարչապետը

Որոշումն ընդունվեց միաձայն։ Այն թույլ կտա էականորեն բարելավել Հայաստանի Հանրապետության արդարադատության նախարարության «Նուբարաշեն», «Դատապարտյալների հիվանդանոց», «Աբովյան», «Կոշ», «Հրազդան» քրեակատարողական հիմնարկներում պահվող դատապարտյալների և կալանավորված անձանց բնակության կոմունալ-կենցաղային պայմանները և  կատարել ստանձնած պարտավորությունները:

 

26
թեգերը:
փող, բյուջե, Քրեակատարողական հիմնարկ (ՔԿՀ), դատապարտյալ, Ռուստամ Բադասյան, Նիկոլ Փաշինյան, ՀՀ կառավարություն, Հայաստան
Ըստ թեմայի
«Վանաձոր» ՔԿՀ-ում փորձել են թմրանյութ փոխանցել զուգագուլպայով
Կառավարությունը գումար է հատկացրել, բայց գործի կեսն է արվել. խախտումներ` ՔԿՀ–ներից մեկում
Մահվան 13 դեպք ՔԿՀ–ներում. դատապարտյալներին ժամանակին օգնություն չի ցուցաբերվո՞ւմ