Ռազմիկ Տոնոյան

Վայոց Ձորի մարզպետի տեղակալն աշխատանքից հեռացվել է դիպլոմը կեղծելու պատճառո՞վ

521
(Թարմացված է 17:42 02.09.2019)
Վայոց Ձորի մարզպետի նախկին տեղակալ Ռազմիկ Տոնոյանի նկատմամբ հարուցվել է քրեական գործ:

ԵՐԵՎԱՆ, 31 օգոստոսի - Sputnik. Հուլիսին պաշտոնից ազատված Վայոց Ձորի մարզպետի նախկին տեղակալի անվան շուրջ և նրա հեռացման պատճառների մասին պտտվող լուրերը չեն դադարում: Sputnik Արմենիայի թղթակցի հետ զրույցում Վայոց Ձորի մարզպետ Տրդատ Սարգսյանը նշեց, որ Տոնոյանի աշխատանքի հեռացման պատճառը նշված է հրամանում: Ըստ դրա՝ վերջինս ազատվել է աշխատանքից առանց զգուշացնելու մի քանի օր աշխատանքի չներկայանալու պատճառով:

Նշենք, որ Ռազմիկ Տոնոյանը 2018 թվականից մինչև այս տարվա հուլիս ամիսն եղել է Վայոց Ձորի մարզպետի տեղակալը: Նա «Իմ քայլը» դաշինքի անդամ է։

Հավելենք, որ Shamshyan.com-ի տեղեկություններով՝ Վայոց ձորի մարզպետի նախկին տեղակալ Ռազմիկ Տոնոյանի նկատմամբ քրեական գործ է հարուցվել Հայաստանի ազգային անվտանգության ծառայության քննչական վարչությունում ՀՀ քրեական օրենսգրքի 325 հոդվածի 1-ին մասի հատկանիշներով, այն է` փաստաթղթեր, դրոշմներ, կնիքներ, ձևաթղթեր, տրանսպորտային միջոցների պետհամարանիշներ կեղծելը, իրացնելը կամ օգտագործելը:

Պարզվել է, որ նա կառավարության անձնակազմի կառավարման վարչություն է ներկայացրել իրավունք վերապահող փաստաթուղթ հանդիսացող «Գրիգոր Լուսավորիչ» համալսարանի կեղծ դիպլոմ։ Հարուցված քրեական գործի նախաքննությունը շարունակվում է։

Խտրականություն չեմ դնում կուսակցական պատկանելիություն ունեցողների միջև.Վայոց Ձորի մարզպետ

Անդրադառնալով նախկին տեղակալի նկատմամբ հարուցված քրեական գործի մասին լուրերին՝ մարզպետ Տրդատ Սարգսյանը նշեց, որ լուրն ինքն այսօր է լսել, չի կարող մեկնաբանել: Բոլոր մանրամասները,  այդ թվում դիպլոմի կեղծ կամ իրական լինելը կպարզի նախաքննությունը:

Վայոց Ձորի մարզպետի նախկին տեղակալ Ռազմիկ Տոնոյանը քիչ առաջ Facebook-ի իր էջում գրել է, որ հանդես կգա հայտարարությամբ և կտա բոլոր հարցերի պատասխանները։

521
թեգերը:
Վայոց Ձոր, Ռազմիկ Տոնոյան, Հայաստան