ԵՐԵՎԱՆ, 29 оգոստոսի — Sputnik. Սեպտեմբեր ամսին ևս մեկ էլիտար հարսանիք է լինելու, որին կմասնակցի ՀՀ երրորդ նախագահ Սերժ Սարգսյանը։ Այս մասին գրում է «Հրապարակ» օրաթերթը։
«Երեկ գրել էինք, որ հարսանիքների սեզոնը բացվում է և նշել էինք, որ առաջիկա օրերին 3 էլիտար հարսանիք է կայանալու Երեւանում։ Բայց մեկը բաց էինք թողել․ սեպտեմբերի 28-ին՝ «Դվինում», կայանալու է Ռուսաստանի հայերի միության նախագահ Արա Աբրահամյանի եղբորորդու՝ Աբրահամի, և ՊԵԿ նախագահի նախկին տեղակալ Սամվել Ավետիքյանի դստեր՝ Մարիամի հարսանիքը»,–գրում է թերթը։
Մոտ 400 հյուր է ներկա լինելու։ Եվ եթե առաջիկա օրերին սպասվող հարսանիքներին ավելի շատ «սպիտակներն» են լինելու, ապա Արա Աբրահամյանի եղբորորդու հարսանիքին հիմնականում կլինեն «սևերը», այդ թվում սպասվում է Սերժ Սարգսյանի մասնակցությունը:
Հիշեցնենք, որ «սևեր ու սպիտակների» թեզը բարձրացրել է Երևանի քաղաքապետ Հայկ Մարությանը, որը դեռ 2018–ի սեպտեմբերին` իր նախընտրական քարոզարշավի ժամանակ, հայտնել էր, որ իրենք սպիտակ ուժերն են, իսկ բոլոր նրանք, ովքեր չեն ուզում, որ իրենք հաջողություն ունենան, սև ուժերն են։
Նշենք, որ երեկ «Հրապարակը» գրել էր Գագիկ Ծառուկյանի դստեր և Խաչատուր Սուքիասյանի որդու պատմական հարսանիքի մասին, որը կայանալու է սեպտեմբերի 7-ին։ Սեպտեմբերի 1-ին նաև տրանսպորտի նախկին նախարար Մանուկ Վարդանյանի դստեր՝ Նունեի հարսանիքն է լինելու։
Պզոյի դուստրն ամուսնանում է նախկին նախարարի փեսայի եղբոր հետ. «Ժամանակ»
Մեկ այլ էլիտար հարսանիք էլ, թերթի տեղեկություններով, կկայանա սեպտեմբերի 5-ին։ Խոսքը ՀՀԿ-ական գործարար, ժամանակին բիզնեսը Հայաստանից տեղափոխած Հարություն Փամբուկյանի որդու՝ Էդգարի ամուսնության մասին է։ Այդ հարսանիքը կայանալու է օլիգարխների նոր սիրելի վայրում՝ «Դվին»-ում։
