Ամուլսարի հանքի շահագործման դեմ ակցիայի մասնակիցներ. արխիվային լուսանկար

Ամուլսարի փորձաքննություն իրականացնողները հանք չեն գնացել, ուսումնասիրել են միայն փաստաթղթերը. ՔԿ

99
(Թարմացված է 12:44 26.08.2019)
ՀՀ քննչական կոմիտեի Ամուլսարի գործով քննչական խմբի ղեկավար Յուրա Իվանյանը լրագրողների հետ հանդիպմանը հաստատել է բնապահպանների վերջին օրերին բարձրաձայնած այն մտահոգությունները, թե միջազգային փորձագետները փորձագիտական եզրակացություն գրելուց առաջ Ամուլսարի ոսկու հանքավայր չեն այցելել։

ԵՐԵՎԱՆ, 26 օգոստոսի — Sputnik. Ամուլսարի հանքի շահագործման ծրագրի փորձաքննությունն իրականացրած «Էլարդ» ընկերության փորձագետները, հանքավայր չեն այցելել, դաշտային ուսումնասիրություններ չեն իրականացրել։ Այս մասին այսօր մամուլի ասուլիսում հայտարարեց ՀՀ  քննչական կոմիտեի Ամուլսարի գործով քննչական խմբի ղեկավար Յուրա Իվանյանը` անդրադառնալով բնապահպանների ու ջերմուկցիների այն քննադատություններին, թե փորձաքննողները, նույնիսկ հանք չեն այցելել։

««Էլարդն» ուսումնասիրել է դաշտում առկա բոլոր հետազոտությունները, բոլոր ուսումնասիրությունները և համեմատել դրանք։ Դա կոչվում է փաստաթղթաբանական փորձաքննություն»,– ասաց Իվանյանը` հավելելով, որ փորձագետներն ուսումնասիրել են նաև բնապահպանների կողմից Քննչական կոմիտեին տրամադրած բոլոր փաստաթղթերը։

Պատասխանելով հնչող քննադատությանը, թե փորձագետներն ուսումնասիրությունն իրականացրել են բացառապես հանքը շահագործող «Լիդիան» ընկերության տրամադրած փաստաթղթերի հիման վրա, քննչական խմբի ղեկավարը հայտարարեց. ««Էլարդ»–ը ուսումնասիրել է ոչ միայն «Լիդիան»–ի կողմից ներկայացրած ուսումնասիրությունները, հետազոտությունները, այլև մյուս կառույցների` գիտական, պետական մարմինների  կողմից ներկայացրած հետազոտությունները, հասարակական կազմակերպությունների և  բնապահպանական միջազգային կազմակերպույթունների ուսումնասիրությունները,  և այդ ամբողջը վերլուծել է, հանգել է հետևությունների։ Դա, ըստ էության, փաստաթղթային փորձաքննություն է և սոսկ փաստաթղթերի ուսումնասիրություն չէ»,– ասաց քննչական խմբի ղեկավարը։

Լրագրողները հիշեցրեցին, որ այդ փորձաքննության դիմաց պետական բյուջեից «Էլարդ»–ին 400 000 դոլար է վճարվել, ինչին Իվանյանը պատասխանեց, որ այդ գինը միջազգային չափանիշներով ընդունված գին է, և միջազգային այս կարգի փորձաքննություններն իրականացվում են այդ գնի սահմաններում։

Հիշեցնենք` օգոստոսի 23-ին ՀՀ վարչապետ Նիկոլ Փաշինյանը մեկնել էր Ջերմուկ` Ամուլսարի խնդիրը քննարկելու համայնքի բնակիչների հետ։

Վարչապետը նշեց, որ հանքի շահագործման շուրջ վերջնական որոշում չկա։ Փորձաքննության եզրակացության մեջ կան պարզաբանման անհրաժեշտ հարցեր։

Դրանց վերաբերյալ հստակ պատասխաններ ստանալու համար Փաշինյանը խոստացել էր օգոստոսի 24-ին «օն–լայն» քննարկում կազմակերպվել «Էլարդի»` փորձաքննությունն իրականացրած մասնագետների հետ, որի ընթացքում նրանք պետք է պատասխանեին բոլոր վիճելի հարցերին։

Խոստացած «օն–լայն» քննարկումը, սակայն հաջորդող 3 օրերին չկայացավ։

Փաշինյանը Ջերմուկում նաև հայտարարել էր. «Եթե պարզվի, որ մեր ջուրը կեղտոտվում է, եթե պարզվի, որ մեր օդը կեղտոտվում է, եթե պարզվի, որ մեր խոտը կեղտոտվում է, թե պարզվի, որ մեր հողը աղտոտվում է, հանքը չի կարող աշխատել։ Բայց եթե պարզվի, որ խնդիրն այն է, որ պատուհանից մի հատ տանիք է երևում, դա, կներեք, արդեն ուրիշ խնդիր է, դա պետք է քննարկենք»։

Ջերմուկի կենտրոնում հավաքվածներին վարչապետը հիշեցրել էր, որ մեկ տարի առաջ Ամուլսարի վերաբերյալ քրեական գործը հարուցվել, և դրա շրջանակներում միջազգային փորձաքննությունն իրականացվել էր  իր նախաձեռնությամբ։

Քրեական գործը հարուցվել էր Ամուլսարի ոսկեբեր քվարցիտների հանքավայրի շահագործման հետ կապված՝ շրջակա միջավայրի աղտոտման մասին տեղեկությունները ՀՀ բնապահպանության նախարարության պաշտոնատար անձանց կողմից դիտավորությամբ թաքցնելու դեպքի առթիվ։

Քննության ընթացքում անհրաժեշտություն էր առաջացել նշանակելու համալիր փորձաքննություն, որը հանձնարարվեց «Էլարդ» միջազգային ընկերությանը։

Ամուլսարյան տրամադրությունները սրվում են. «Իմ քայլը» կկանգնի՞ բաժանման առաջ

2019թ–ի, օգոստոսի14-ին, վկայակոչելով միջազգային փորձաքննության արդյունքները, Քննչական կոմիտեն հայտարարել էր, հանքի շահագործման դեպքում ՀՀ օդի, ջրի, հողի աղտոտման չափերն այնքան փոքր կլինեն, որ «չափելի չեն լինի»։ Կենսաբազմազանության վրա բացասական ազդեցության հիմքեր ևս չէին հայտնեբերվել։ Այս փորձաքննության հիման վրա քննչական խումբը եկել է այն եզրակացության, որ շրջակա միջավայրի աղտոտման մասին տեղեկությունները  դիտավորյալ  թաքցնելու, հետևաբար և նախկին պաշտոնյաների նկատմամբ քրեական հետապնդման հիմքեր չկան։

Օգոստոսի 19–ին Facebook–ում ուղիղ եթերի ժամանակ ՀՀ վարչապետն ասել էր,  որ Ամուլսարի հանքը կարող է գործարկվել, քանի որ Elard  ընկերության եզրակացության համաձայն` հավանական ռիսկերը կարող են ոչ էական լինել Սևանա լճի կամ Ջերմուկի ջրերի համար, եթե ընդունվեն կանխարգելիչ այն 16 միջոցները, որոնց մասին խոսվում է եզրակացության մեջ։  Դա բնապահպանների ու ակտիվիստների շարքերում բողոքի կտրուկ ալիք է բարձրացրել։

99
թեգերը:
Ջերմուկ, հանք, ՀՀ քննչական կոմիտե, Ամուլսար, Հայաստան
Ըստ թեմայի
Բադալյան․«Վարչապետը փորձում է իր վարկանիշն օգտագործելով՝ նպաստել հանքի գործարկմանը»
Քննչական կոմիտեն 3D հոլովակով Ամուլսարի հարցում համոզում է քաղաքացիներին. տեսանյութ
 «Մենք ենք տերը մեր երկրի»․ Երևանում Ամուլսարի շահագործման դեմ երթ անցկացվեց
Լաբորատորիա

ՀՀ–ում հակամարմինների թեստավորում կիրականացվի հետազոտման նպատակով. նախարար

10
(Թարմացված է 12:29 07.07.2020)
Արսեն Թորոսյանն անդրադարձավ Հայաստանում իրականացվող նոր` հակամարմինների թեստավորմանը։

ԵՐԵՎԱՆ, 7 հուլիսի – Sputnik. Կորոնավիրուսի ախտորոշման` հակամարմիններով թեստավորում բնակչության շրջանում կիրականացվի հետազոտական նպատակով, որպեսզի հասկանան կորոնավիրուսով վարակվածների մոտավոր տոկոսը: Այսօր հրավիրված ասուլիսի ժամանակ այս տեղեկությունը հայտնեց ՀՀ առողջապահության նախարար Արսեն Թորոսյանը` պատասխանելով հարցին, թե հակամարմինների թեստերը հասանելի՞ կլինեն նաև բնակչությամբ։

Ավելի վաղ հայտնել էինք, որ հունիսի 15-ից Հայաստանում անցկացվում է նոր հետազոտություն` հակամարմինների թեստեր են հանձնում, որոնց շնորհիվ հնարավոր է պարզել` մարդը երբևէ վարակվել է կորոնավիրուսով, թե ոչ։ Այժմ բուժաշխատողների շրջանում է նոր թեստավորումն իրականացվում, և 1000-1100 բուժաշխատող հակամարմինների թեստ կհանձնի։

«Հարցն այն է, որ որևէ մեկի մոտ առկա հակամարմինների երկարատևության ժամկետի առնչությամբ ապացույց չկա։ Այսինքն` այսօր եղած հակամարմինները կարող են մի քանի ամիս լինել բավարար քանակի, իսկ հետո նորից կարող է դրանց թիվը նվազել, և մարդիկ նորից հիվանդանան։ Ավելին, քաղաքացիներ կան, որոնց մոտ հակամարմինների բավարար քանակ նույնիսկ հիվանդանալուց և լավանալուց հետո չի առաջանում»,–ասաց նախարարը։

Թորոսյանը հիշեցրեց, որ այժմ Ամերիկյան համալսարանի հետ համագործակցելով հակամարմինների հետազոտություն է իրականացվում` պարզելու բուժաշխատողների շրջանում կորոնավիրուսի տարածման ցուցանիշը։ Սակայն, ըստ նախարարի, պետությունը չի կարող քաղաքականության մշակման հարցում հիմնվել նման հետազոտությունների վրա։

Ինչ վերաբերում է մասնավոր ԲԿ–ների` հակամարմինների թեստերի իրականացմանը, ապա Թորոսյանը նշեց, որ Հայաստանում հիմա կան հակամարմինների բավական բարձրորակ թեստեր։ Թորոսյանն իր խոսքն ամփոփեց` ասելով, որ հակամարմինների թեստն անձի վարքի փոփոխման հիմք լինել չի կարող, այսինքն` եթե որևէ մեկի մոտ կան հակամարմիններ, դա հիմք չէ հակահամաճարակային կանոնները չպահելու։

Եթե կորոնավիրուսով վարակվել ու լավացել ենք, երաշխիք չէ, որ այլևս չենք վարակվի. Թորոսյան

Հիշեցնենք` Հայաստանում կորոնավիրուսով վարակվածների թիվն արդեն հասել է 29285–ի, վարակի զոհ է դարձել 503 մարդ։ Միայն վերջին մեկ օրում կորոնավիրուսի հետևանքով մահվան 12 դեպք է գրանցվել։

Գիտնականները զգուշացրել են` ապաքինվելուց հետո կորոնավիրուսի հակամարմիններն անհետանում են

10
թեգերը:
հակամարմին, Արսեն Թորոսյան, կորոնավիրուս, Հայաստան
Ըստ թեմայի
Կորոնավիրուսի հետևանքով մահվան 12 դեպք է գրանցվել. ամենաերիտասարդը 54–ամյա կին է
Կորոնավիրուսի պայմաններում աշխատող մանկապարտեզների աշխատակիցները հավելավճար կստանան
Մեկ օրում գրանցվել է 330 դեպք. Հայաստանում կորոնավիրուսով վարակվածների թիվը դարձավ 28 936
Հիվանդանոց

«Դեղերն արդեն կիրառում ենք, իսկ պատվաստանյութ գնելու համար քայլեր կսկսենք անել». Թորոսյան

37
(Թարմացված է 12:02 07.07.2020)
Արսեն Թորոսյանն անդրադարձավ կորոնավիրուսի դեմ պայքարի համար անհրաժեշտ պատվաստանյութ և դեղեր ձեռք բերելու թեմային։

ԵՐԵՎԱՆ, 7 հուլիսի – Sputnik. Աշխարհում այս պահին կորոնավիրուսի դեմ մոտ 200 պատվաստանյութ է մշակվում, որոնցից 20-ը վերջնական արտադրանք դառնալու մեծ շանս ունեն։ Այսօր ասուլիսի ժամանակ այս տեղեկությունը հայտնեց ՀՀ առողջապահության նախարար Արսեն Թորոսյանը` պատասխանելով Sputnik Արմենիայի հարցին, թե կորոնավիրուսի դեմ պայքարում դեղեր և պատվաստանյութեր ձեռք բերելու առումով Հայաստանն ինչ քայլեր է անում։

«Առողջապահության ոլորտի մասնագետները համարում են, որ պատվաստանյութ լինելու է։ Սկզբում նման համոզում չկար, սակայն ժամանակի ընթացքում այդ համոզմանը եկան։ Հիմա երկրները մշակում են պատվաստանյութը գնելու գործընթացը, սակայն անորոշությունները շատ են»,–ասաց նախարարը։

Թորոսյանի խոսքով` հարցն այն է, որ տարբեր երկրներ գնում են դեռևս չարտադրված պատվաստանյութերի ամբողջ քանակը։

Նա նշեց, որ հիմա մրցավազքի պես մի բան կա, և ինչպես սառը պատերազմի ժամանակ բոլորը փորձում էին նոր զենքեր գնել, հիմա էլ դեռ չհաստատված պատվաստանյութերի խմբաքանակ են գնում։ Թորոսյանը հայտնեց, որ Հայաստանը որոշել է արդեն իսկ սկսել խոսակցություններ ինչպես ուղիղ արտադրողների, այնպես էլ ՅՈՒՆԻՍԵՖ–ի, ԱՀԿ–ի, ԳԱՎԻ–ի (Պատվաստումների և պատվաստանյութերի գլոբալ դաշինք) հետ։

Ինչ վերաբերում է դեղերին, ապա Թորոսյանը հայտնեց, որ Հայաստանն արդեն իսկ այլ հակավիրուսային դեղեր է ձեռք բերել։ Մասնավորապես, նախարարությունը «Ռեմդեսիվիրի» խմբաքանակ է գնել, որը 7-10 օրից Հայաստանում կլինի, իսկ ռուսական «Ավիֆավիրը» ձեռք բերելու համար բանակցություններ են տանում։ Բացի այդ, ճապոնական և ռուսական «Ֆավիպիվավիր» դեղամիջոցներից ունենալու համար բանակցություններ են վարում. ճապոնական արտադրանքից արդեն իսկ ստացել են, շուտով կսկսեն օգտագործել։

Հիշեցնենք` Հայաստանում կորոնավիրուսով վարակվածների թիվն արդեն հասել է 29285–ի, վարակի զոհ է դարձել 503 մարդ։ Միայն վերջին մեկ օրում կորոնավիրուսի հետևանքով մահվան 12 դեպք է գրանցվել։

37
թեգերը:
Արսեն Թորոսյան, պատվաստանյութ, կորոնավիրուս, Հայաստան
թեմա:
Կորոնավիրուսը Հայաստանում և Արցախում
Ըստ թեմայի
Կորոնավիրուսի դեմ պատվաստանյութ լինելու է, բայց Հայաստանին կարող է չհասնել. Թորոսյան
Ինչպես են իրենց զգում COVID-19-ի դեմ ռուսական պատվաստանյութի փորձարկման մասնակիցները
Ռուսական պատվաստանյութը հետաքրքրել է ԱՀԿ-ին
Գագիկ Ծառուկյան

«Բարգավաճ Հայաստանը» հայտարարություն է տարածել

25
(Թարմացված է 12:42 07.07.2020)
ԲՀԿ–ն կոչով դիմել է իշխանությանը, բոլոր քաղաքական և հանրային շրջանակներին, քաղաքացիական հասարակությանը։

ԵՐԵՎԱՆ, 7 հուլիսի – Sputnik. ԲՀԿ քաղաքական խորհուրդը խստորեն դատապարտում է իշխանության կողմից ԲՀԿ նախագահի և կուսակցական գործիչների հանդեպ իրականացվող քաղաքական հետապնդման ու էժանագին մեթոդներով հաշվեհարդարի փորձերը:

«Ակնհայտ է, որ ամենը սկսվեց Գագիկ Ծառուկյանի` հունիսի 5-ի հայտնի ելույթից հետո, որտեղ նա մատնանշեց կառավարության ձախողումներն ու տապալումները՝ նշելով կոնկրետ ոլորտներ: Սոցիալ– տնտեսական խայտառակ ցուցանիշներ, բանկային «գերության» մեջ գտնվող հարյուր հազարավոր քաղաքացիների վիճակ, փլուզման եզրին կանգնած տնտեսության ամբողջական ճյուղեր, գործազրկության ահռելի աճ, համավարակի դեմ պայքարի տապալում, ռազմավարական դաշնակիցների հետ հարաբերություններում աններելի լարվածություն: Հենց այս խնդիրների բարձրաձայնումից և կառավարության կազմի 100 տոկոսի հրաժարականի պահանջից հետո իշխանությունների կողմից սանձազերծվեց քաղաքական հետապնդումների շարք «Բարգավաճ Հայաստան կուսակցության ներկայացուցիչների նկատմամբ»,– նշված է ԲՀԿ–ի հայտարարության մեջ:

ԲՀԿ–ականները նշում են, որ չունենալով քաղաքական հակափաստարկներ` իշխանությունն անցավ բարոյական բոլոր կարմիր գծերն ու այսօր բացահայտ ոտնահարում է մարդու իրավունքներն ու պատգամավորի, քաղաքացու անձնական կյանքի անձեռնմխելիության իրավունքը։ ԵԽ անդամ, միջազգային բազմաթիվ կառույցների անդամ Հայաստանում իշխանությունը կոպտորեն խոչընդոտում է իր մասնագիտական գործունեությունը կատարող պատգամավորների և քաղաքական գործիչների աշխատանքը՝ փորձելով լռեցնել՝ քաղաքական հաշվեհարդարներ տեսնելով, անձնական ձայնագրություններ հրապարակելով, ինչը օրենքի և միջազգային բազմաթիվ կոնվենցիաների կոպտագույն խախտում է։

«Մենք արձանագրում ենք, որ անկախ Հայաստանի պատմության մեջ երբեք չի եղել նման «խաղի կանոն» և քաղաքական ամենաբարդ հարաբերությունների դեպքում անգամ անձնական կյանքը, ընտանիքը, երեխաները եղել են անձեռնմխելի թեմաներ։ Երկրի, քաղաքացու առջև այս դժվարին ժամանակներում ծառացած սոցիալական կարևորագույն խնդիրները լուծելու փոխարեն իշխանությունն իր ամբողջ ռեսուրսն ու ֆեյք ինդուստրիան, որի վրա պետական հսկայական միջոցներ են ծախսվում, ուղղել է ԲՀԿ նախագահի և ԲՀԿ պատգամավորների հանդեպ անբարո քաղաքական հաշվեհարդարների կազմակերպմանը, որևէ բարոյական արգելքի, այդ թվում՝ ընտանիք ու անձնական կյանք մտնելու բարոյական արգելքի առաջ չկանգնելով»,– գրված է հայտարարության մեջ։

ԲՀԿ քաղաքական խորհուրդը կոչ է անում իշխանությանը՝ ձեռնպահ մնալ խուլիգանական արարքներից։ Իսկ միջազգային կառույցներին և իրավապաշտպան կազմակերպություններին հորդորում է անարձագանք չթողնել ՀՀ պատգամավորների, քաղաքական գործիչների հանդեպ իշխանության կողմից սանձազերծված այս անբարո արշավը, քանզի իշխանության ընտրած այս ճանապարհը ամենակարճ ճանապարհն է դեպի բռնապետություն։

«Բարգավաճ Հայաստան» կուսակցությունը կոչ է անում բոլոր քաղաքական և հանրային շրջանակներին, քաղաքացիական հասարակությանը, գիտակից հասարակությանը` նշելով, որ սա քաղաքական հայացքների խնդիր չէ, այլ արժանապատվության և մարդու անձնական կյանքի անձեռնմխելիության խնդիր:

«Բարձրաձայնեք ձեր վրդովմունքը, միասին մերժենք անհատի և ընտանիքների վարկաբեկման ճղճիմ փորձերը»,– նշել են ԲՀԿ–ականները։

Հիշեցնենք` ԱԱԾ-ն հունիսի 14-ին խուզարկություն էր իրականացրել Գագիկ Ծառուկյանի առանձնատանը:
Նրա դեմ 3 քրեական գործ է հարուցվել ապօրինի ձեռնարկատիրական գործունեության, ընտրակաշառք բաժանելու և հողատարածքների օտարման փաստերով։

Հունիսի 16-ին ԱԺ–ն որոշեց Գագիկ Ծառուկյանին զրկել անձեռնմխելիությունից և թույլ տալ, որ նրա նկատմամբ քրեական հետապնդում սկսվի։

Հունիսի 21-ին Երևանի ընդհանուր իրավասության դատարանը մերժել էր Ծառուկյանի նկատմամբ կալանքը որպես խափանման միջոց ընտրելու՝ ԱԱԾ-ի միջնորդությունը:

Հունիսի 23-ին հայտնի դարձավ, որ դատախազությունը վերաքննիչ բողոք է ներկայացրել Ծառուկյանի նկատմամբ կալանքը որպես խափանման միջոց կիրառելու միջնորդությունը մերժելու որոշման դեմ։

Հունիսի 26-ին էլ ԲՀԿ առաջնորդի պաշտպանները վերաքննիչ բողոք ներկայացրին Ծառուկյանի նկատմամբ որպես խափանման միջոց կալանավորումը կիրառելու միջնորդությունը քննության առնելու մասին Երևան քաղաքի ընդհանուր իրավասության առաջին ատյանի դատարանի որոշման դեմ։

25
թեգերը:
Բարգավաճ Հայաստան կուսակցություն (ԲՀԿ), Գագիկ Ծառուկյան, Հայաստան
Ըստ թեմայի
ՀՅԴ ներկայացուցիչը հանդիպել է Վանեցյանի ու Ծառուկյանի հետ
Ծառուկյանի՝ բռնաբարության վերաբերյալ գործի նյութերը հրապարակելու փաստով քրգործ է հարուցվել
Ծառուկյանն իր ամառանոցում իրականությունից հեռու է. Ալեն Սիմոնյանը` սով սկսվելու մասին
Գագիկ Ծառուկյանը կաթիլային է ստանում
«Առինջ մոլի» աշխատակիցները գործադուլ կանեն. նրանք նամակ են գրել Ծառուկյանին. լուսանկար