ԵՐԵՎԱՆ, 9 օգոստոսի — Sputnik. Երևանի քաղաքապետարանն առաջիկայում ձեռք կբերի 3 աղբաման լվացող մեքենա, 1000 մետաղական աղբարկղ և այլ տեխնիկա։ Նման որոշում կայացվեց այսօր` Երևանի ավագանու նիստի ժամանակ։
«Երևան քաղաքի 2019-ի բյուջեում առաջարկում եմ փոփոխություններ կատարել: Այսինքն` Երևանի աղբահանության և սանիտարական աշխատանքների ապահովման նպատակով բյուջեով նախատեսված գումարն ավելացնել 1 մլրդ 726 մլն դրամով»,–ասաց Երևանի փոխքաղաքապետ Հայկ Սարգսյանը։
Այդ գումարով քաղաքապետարանը կգնի նաև 5 փոշեկուլ ավտոմեքենա, 11 ձնամաքրող մեծ մեքենա, 10 փոքր ձնամաքրող մեքենա, 22 հատ ձնամաքրող տրակտոր՝ մայթերի մաքրման համար, 10 հատ փոքր աղբահավաք մեքենա։
Աղբահանությամբ քաղաքապետարանը մտահոգ չէ. «Սանիթեքը» հայտարարություն է տարածել
Աղբահանության ու սանմաքրման աշխատանքներին տրամադրվող գումարի ավելացումն իրականացվելու է մի շարք ծառայությունների նվազեցման հաշվին, մասնավորապես՝ նախադպրոցական հաստատությունների՝ մանկապարտեզների հիմնանորոգման և վերանորոգման համար նախատեսված գումարը՝ 91 մլն դրամով կկրճատվի:
Նախագիծը ընդունվեց 41 կողմ ձայնով։
