Բռնություն

Մխիթար Գոշն էլ է գրել բռնության մասին. որքան էր վճարում ամուսինը կնոջը ծեծելու համար

504
(Թարմացված է 10:39 21.07.2019)
Արդեն մի քանի ամիս է` համացանցի հայկական տիրույթում ակտիվ քննարկվում է ընտանեկան բռնության թեման: Թեժ բանավեճերի մասնակիցները միանգամից մի քանի ճակատի են բաժանվել։ Sputnik Արմենիայի սյունակագիր Գեորգի Մուրադյանը փորձել է պարզել այդ խմբերի դիրքորոշումներն ու հասկանալ, թե որքանով են այդ փաստարկները հիմնավորված։

Գեորգի Մուրադյան, Sputnik.

Մարդկանց կարծիքները պայմանականորեն կարելի է բաժանել երեք խմբի: Ոմանք կարծում են, որ հայկական ընտանիքներում բռնություն կա և դրա դեմ պետք է պայքարել։ Մյուսներն ասում են, որ ընտանեկան բռնություն գոյություն ունի, բայց իսկական հայկական ընտանիքներում այն չի կարող լինել, և չարժե, որ ԶԼՄ–ները ժամանակ ու ռեսուրս վատնեն նման թեմաների վրա։ Երրորդ խմբի ներկայացուցիչները սկզբում փորձում են պարզել, թե արդյոք զոհը նման վերաբերմունքի արժանացել է իր պահվածքի պատճառով, թե ոչ, և միայն հետո որոշել՝ բռնություն է դա, թե «արդար պատիժ»։

Եվ եթե «հայկական ընտանիքներում բռնություն չկա» թեզը միամիտ է հնչում և հեշտությամբ հերքվում է վիճակագրական` թեկուզ ոչ շատ ճշգրիտ տվյալներով, ապա այն համոզմունքը, թե որոշ դեպքերում բռնությունը կարող է արդարացված լինել, ակնհայտորեն ցույց է տալիս` ինչպես է այդ թեմայի «փակ լինելը» անխուսափելիորեն հանգեցնում հասարակական բարոյականության աղավաղման։

Այսինքն բնակչության մի մասը կարծում է, որ որոշ դեպքերում կնոջը կամ երեխային կարելի է ծեծել, որ դա «հայկական ընտանեկան ավանդույթների» անբաժան մասն է, իսկ բոլոր օրենքները, որոնք կոչված են կանխելու նման դեպքերը, հորինել են գլոբալիստները, ԼԳԲՏ շարժման առաջնորդները, չար Սորոսը, մասոնները կամ որևէ այլ մեկը` հետապնդելով մեկ նպատակ. վերացնել հայկական ավանդական ընտանիքի ինստիտուտը։

Բռնության պատմությունների թիրախային ժայթքումը, կամ ամեն ինչ հանուն Ստամբուլյան կոնվենցիայի

Որպես կանոն` բնակչության այդ «կարծիքային խմբի» ակտիվությունն իր գագաթնակետին է հասնում, երբ ԱԺ նոր օրինագիծ է մտնում, որտեղ նույն նախադասության մեջ գոնե մեկ անգամ հիշատակվում են «ընտանիք» ու «Եվրոպա» բառերը։ Եվ անհասկանալի է, թե ինչի դեմ են հանդես գալիս այդ մարդիկ. Եվրոպական արժեքների՞, բռնության կանխարգելմա՞ն, ԼԳԲՏ հանրությա՞ն, թե՞ հերքում են ընտանեկան բռնության փաստը` որպես այդպիսին։

Նման դեպքերում ընդունված է պնդել, որ մենք «միջնադար ենք գլորվում», սակայն հայ միջնադարյան մտածող Մխիթար Գոշին նման համեմատությունը, հավանաբար, կվիրավորեր։ Նրա «Դատաստանագիրքը», որը գրվել է XII դարի վերջին և կիրառվել Կիլիկյան Հայաստանում ընդհուպ մինչև թագավորության գոյությանը ավարտը, ավելի պրոգրեսիվ էր, քան այն ժամանակ գոյություն ունեցող եվրոպական օրենքների ժողովածուները։

Այսպես, սկսած X–րդ դարից մինչև XVI դարի Ռեֆորմացիայի դարաշրջանը, ամբողջ կաթոլիկ աշխարհում ամուսնալուծությունն արգելված էր, այն դեպքում, երբ Գոշի դատաստանագրքում ամուսնալուծության գործընթացին մի քանի գլուխ է նվիրված։ Կարգավորվում էին ոչ միայն հանգամանքները, որոնց դեպքում ամուսիններից մեկը կարող էր դիմել ամուսնալուծության, այլև գույքի հետագա բաժանումը, ընդ որում այդ գործընթացում Գոշը նույնիսկ փորձում էր պահպանել սեռերի հավասարությունը։

Եվ սա, նկատենք, շուրջ 900 տարի առաջ այն բանից, երբ ՀՀ–ում «տղամարդկանց և կանանց համար հավասար իրավունքների և հավասար հնարավորությունների ապահովման մասին» օրինագիծը կանվանեն հարված հայկական ավանդական (երբեմն` քրիստոնեական) արժեքներին` «գենդեր» բառի առկայության պատճառով։

Ստիպողական ամուսնությունները որոշ հայ ընտանիքներում նույնպես ընդունված է համարել ֆեոդալական հասարակարգի մնացուկ, սակայն նույնիսկ այստեղ իրականությունը չի համընկնում տարածված մոլորության հետ: Կամավոր համաձայնությունը դրված է «Դատաստանագրքում» շարադրված ամուսնության վերաբերյալ օրենքների հիմքում։ Ավելին, 9-րդ գլխում Գոշն ասում է, որ ամուսինների փոխադարձ ատելությունը ամուսնալուծության բավարար հիմք է, և «ատելության» մեջ մեղադրվողը պարտավոր է տուգանք վճարել ամուսնալուծությունից հետո։ Հետաքրքրական է, որ ամուսիններից մեկի դավաճանության դեպքում նույն օրենքն էր գործում։ Ոչ թե ծեծի ենթարկել, ոչ թե քարկոծում կամ ապտակ, այլ ամուսնալուծություն։

Սոցցանցում տարածվում է ‪#‎բռնության_ձայնը ու ցնցում բոլորին. ի՞նչ կլինի հետո

Կնոջ առողջությանը վնաս հասցնելու դեպքերը կարգավորվում էին «Դատաստանագրքի» 15-րդ գլխով։ Այսպես, օրինակ, եթե ամուսինը ծեծել է կնոջը, կոտրել է նրա ձեռքը կամ ոտքը, հանել աչքը, կոտրել ատամը, ապա նա պարտավոր էր 2000 արծաթի դահեկան վճարել` դա մոտավորապես 9 կիլոգրամ է, ինչը ներկայիս շուկայական գներով, շուրջ 2 մլն դրամ է։ Դա ավելին է, քան դատարանի որոշմամբ վճարեց Արմավիրի բնակիչ Սոկրատ Գ.–ն, որին 2017 թվականին դատապարտել էին կնոջը ծեծելու համար (ի դեպ Սոկրատ Գ.–ի դեպքում ևս կային մարդիկ, որոնք լուրերի տակ գրված մեկնաբանություններում համարում էին, որ նախ պետք է պարզել, թե արդյո՞ք տղամարդը տեղին է ծեծել, թե ոչ)։

Կիլիկյան թագավորության անկումից հետո «Դատաստանագրքի» մասին չմոռացան, դրանից օգտվում էին Լեհաստանի հայ գաղութներում (այն ժամանակ` XVI դարում թագավոր Սիգիզմունդ I–ը համայնքին ինքնակառավարվելու իրավունք էր տվել), ինչպես նաև Վրաստանում (որտեղ «Դատաստանագիրքը» ներառվել էր թագավոր Վախթանգ VI–ի օրենքների ժողովածուում)։

Գոշի օրենքների ժողովածուում բռնությանը նվիրված առանձին գլուխների առկայության փաստն ինքնին խոսում է երկու բանի մասին. նախ` ընտանեկան բռնությունը, որքան էլ տարօրինակ չհնչի, հայկական ընտանիքներում գոյություն ուներ, երկրորդը` նման բռնությունն արդարացնելու և ազգային ավանդույթների միջև որևէ կապ չկա։

Հազիվ թե հայկական կամ քրիստոնեական ավանդական արժեքների ջատագովները Հայաստանում XII դարի հասարակության արատների մասին գրող աստվածաբան, մտածող և առակագիր Մխիթար Գոշից ավելի լավ գիտեն Աստվածաշունչը կամ հայերի ավանդույթները։

«Այլևս չի կարող շարունակվել». Արսեն Թորոսյանը սարսափել է բռնության մասին պատմություններից

Ավելին, կարելի է համոզված լինել, որ նրանցից շատերն ընդհանրապես պատկերացում չունեն, թե էլ ինչով էր զբաղվում Մխիթար Գոշը, առակներ հորինելուց բացի։ Հակառակ դեպքում նրանք չէին արդարացնի ընտանեկան բռնությունը, ինչպես նաև չէին մտածի, որ ամուսնալուծությունը ևս հակասում է հայկական հիմնարար արժեքներին, և որ ավելի լավ է ատել միմյանց, բայց պահպանել «ընտանիքը», քան ամուսնալուծվել և հանգիստ ապրել։

504
թեգերը:
Մխիթար Գոշ, Դատաստանագիրք, տղամարդ, Կին, Բռնություն, Հայաստան
թեմա:
Ստամբուլյան կոնվենցիա (22)
Ըստ թեմայի
Արտաշատում երիտասարդները սեռական հարաբերություն են ունեցել 15–ամյա աղջկա հետ
Ընտանեկան բռնությունները Հայաստանում. ոստիկանությունը հաշվետվություն ներկայացրեց
Անպայման կանայք. ինչպես է «հատուկ ոստիկանությունը» պարզելու սեռական բռնության հարցերը
ՀՀ հատուկ դպրոցներում երեխաները շահագործվում են, բռնության ենթարկվում ու ապրում կեղտի մեջ
Լենդրուշ Խաչատրյանն իր երեխաների հետ

«Էրեխեքին տեր կանգնի, կարող է` ինչ–որ բան պատահի». մայոր Խաչատրյանն օգնության կարիք ունի

366
(Թարմացված է 21:39 06.05.2021)
Մայոր Լենդրուշ Խաչատրյանն արդեն 7 ամիս է, ինչ հիվանդանոցում է։ Գերմանական կլինիկայում խոստացել են, որ երեք ամսվա ընթացքում նրան ոտքի կհանեն, բայց լուրջ գումար է հարկավոր։

ԵՐԵՎԱՆ, 6 մայիսի – Sputnik. «Եղնիկներ» զորամասի գումարտակի հրամանատար Լենդրուշ Խաչատրյանն արդեն 8 ամիս է` «Էրեբունի» ԲԿ–ի վերակենդանացման բաժանմունքում է գտնվում։ Մայորը հարազատների հետ միայն աչքերով է հաղորդակցվում։

Майор Лендруш Хачатрян в вегетативном состоянии
© Photo : provided by Ruzana Verdiyan
Լենդրուշ Խաչատրյան

 

Լենդրուշը երեք երեխա ունի, կրտսեր դուստրն այսօր 10 ամսական է դարձել, միջնեկը 4 տարեկան է, ավագ որդին` 7։ Վերջին անգամ նա երեխաներին ու կնոջը տեսել է սեպտեմբերի 25-ին։ Ինչպես Sputnik Արմենիայի հետ զրույցում պատմեց Լենդրուշի կինը` Ռուզաննա Վերդիյանը, այդ օրը նրանց համատեղ կյանքի 8-ամյակն էր։ Զույգը ծրագրում էր նշել այն, բայց չստացվեց։ Պատերազմը...

Постер с изображением Лендруша Хачатряна
© Photo : provided by Ruzana Verdiyan
Լենդրուշ Խաչատրյան

Ինչպես կինոյում

32-ամյա Լենդրուշ Խաչատրյանը ծնունդով Արցախի Մարտունու շրջանի Աշան գյուղից է։ Ավարտել է Ստեփանակերտի Իվանյանի անվան ռազմական քոլեջը, հետո ընդունվել Վազգեն Սարգսյանի անվան ռազմական ինստիտուտ։ 2011 թվականին արդեն «Եղնիկների» (Արցախի հյուսիսային դիրքեր) գումարտակի հրամանատարն էր։ Ապագա կնոջ հետ ծանոթացել էր քրոջ շնորհիվ. Ռուզաննան նրա մտերիմ ընկերուհին էր։

«Մի օր, երբ հյուր էի գնացել նրանց, Լենդրուշն աշխատանքից եկավ, և մենք առաջին անգամ տեսանք իրար։ Այդ ժամանակ նա դեռ կապիտան էր։ Սկսեցինք շփվել։ 2013 թվականի սեպտեմբերի 25-ին ամուսնացանք», – պատմում է Ռուզաննան։

Նրա խոսքով` պատահական չէր, որ Լենդրուշն իր կյանքը կապեց բանակի հետ։ Նրա հայրը զինվորական է եղել, թոշակի անցնելուց հետո դարձել է գյուղապետ։ Բայց Խաչատրյանի հայրն ուզում էր, որ որդին զինվորական բժիշկ դառնա։

Майор Лендруш Хачатрян с семьей
© Photo : provided by Ruzana Verdiyan
Լենդրուշ Խաչատրյանն ընտանիքի հետ

Իսկ հետո սկսվեց պատերազմը

Ռուզաննան շատ լավ է հիշում սեպտեմբերի 27-ի առավոտը։ Ինչպես միշտ, առավոտյան 7-ին կերակրեց 2 ամսական դստերն ու արդեն պատրաստվում էր քնեցնել, երբ փողոցից բարձր ձայն ու անհասկանալի դղրդող լսեց։

«Մենք Ստեփանակերտում էինք` պետհամալսարանի մոտ գտնվող վարձով բնակարանում։ Այդ օրերին այնտեղ շինարարություն էր գնում, և ինձ թվաց, որ ձայները դրա հետ են կապված։ Երեխային պառկացրի, գնացի, որ տեսնեմ` ինչ է կատարվում։ Դռների մեջ հանդիպեցի վերևից արագ–արագ իջնող հարևաններին։ Մենք առաջին հարկում էինք ապրում։ Ում հագին ինչ կար, հենց այդ շորերով էլ դուրս էր եկել»,–հիշում է կինը։

Էլի գոհ էի, որ ողջ եմ. Զինվորի տանը 8 տղաներ առաջին անգամ քայլեցին պրոթեզներով

Քանի որ շենքում նկուղ չկար, կանայք ու երեխաները հավաքվեցին իրենց բնակարանում։ Ավելի ուշ, երբ երկնքում արդեն անօդաչուներ էին պտտվում, հասկացան` պատերազմ է սկսվել։

Խնդրեց` լավ նայեմ երեխաներին

Ռուզաննան անմիջապես սկսեց զանգել ամուսնուն, բայց նա արդեն անհասանելի էր։ Կարողացան զրուցել լույս 28-ի գիշերը։ Այդ ժամանակ Լենդրուշն ասաց կնոջը, որ նա երեխաների մասին հոգ տանի, քանի որ իր հետ կարող է ինչ–որ բան պատահել։

«Նույն օրը երեկոյան մենք իմացանք, որ նա գլխից լուրջ վիրավորում է ստացել։ Այնուհետև վիրահատություն եղավ Ստեփանակերտում, Երևանում։ Լենդրուշը հիմա վեգետատիվ վիճակում է, միայն աչքերով է արձագանքում», – ասաց Ռուզաննան։

Майор Лендруш Хачатрян с супругой Рузаной Вердиян и дочерью
© Photo : provided by Ruzana Verdiyan
Լենդրուշ Խաչատրյանն ընտանիքի հետ

Երեխաները հոր հետ շփվում են տեսակապով։ Սկզբում նա շատ ցավոտ էր արձագանքում երեխաների ձայնին, դողում էր ամբողջ մարմնով, զարկերակն արագ էր խփում, աչքերն էր թարթում։ Բայց ժամանակի ընթացքում ընտելացավ։

«Ես մտնում եմ մոտը, հարցնում, հիշում է ինձ, հասկանում է ամեն ինչ, խնդրում եմ, որ դրական պատասխանի դեպքում աչքերը փակի։ Փակում է», – ասում է Ռուզաննան։

Մայոր Լենդրուշն այժմ նյարդավերականգնողական օգնության կարիք ունի, ինչն անհնար է Հայաստանում։ Մայորի կնոջ խոսքով` դիմել են տարբեր երկրների հիվանդանոցներ, ամենահարմար տարբերակը Գերմանիայում վերականգնողական բուժում ստանալն է։

Հրամանատարի մարմինը թշնամուն չթողեց, բայց ինքը վիրավորվեց. 2 անգամ մահից փրկված զինվորը

Գերմանացի բժիշկները Խաչատրյանի ընտանիքին վստահեցրել են, որ նա երեք ամսվա ընթացքում կկարողանա ինքնուրույն հագնվել, լվացվել, տեղաշարժվել քայլակով, ինքնուրույն կամ առանց զոնդի ուտել։ Բայց բուժումը թանկ արժե, և այդ ամենի համար մոտ 160 հազար եվրո է անհրաժեշտ։

Դրամական փոխանցում կարելի է կատարել «Հայէկոնոմբանկ» ԲԲԸ (ARMECONOMBANK OJSC)` Լենդրուշի կնոջ` Ռուզաննա Վլադիմիրի Վերդիյանի անունով բացված հաշվեհամարին`163318020969 AMD; 163318020985 EUR; 163318020993 RUR ; 163318020977 USD:

«Երջանիկ էր. զոհվեց` չիմանալով, որ որդին էլ է նահատակվել». Կարապետյանների պատմությունը

366
թեգերը:
Պատերազմ, Վիրավոր, Հայաստան
Մհեր Շահգելդյան

Մհեր Շահգելդյանին դատարանը սնանկ է ճանաչել. նախկին նախարարի բնակարանը հանվել է աճուրդի

380
(Թարմացված է 17:42 06.05.2021)
Մհեր Շահգելդյանը վարկային պայմանագրերը կնքել է 2017թ.–ի փետրվարին, երբ այլևս պատգամավոր չէր, հետևաբար ավելի քան 30 000 դոլարի գործարքները նրա ներկայացրած գույքի ու եկամուտների հայտարարագրերում չեն արտացոլվել։

ԵՐԵՎԱՆ, 6 մայիսի – Sputnik, Նելլի Դանիելյան. ՕԵԿ նախկին փոխնախագահ, ԱԺ 5–րդ գումարման պատգամավոր, ԱԻ նախկին նախարար Մհեր Շահգելդյանը դատարանի որոշմամբ սնանկ է ճանաչվել։ Նա չի կարողացել մարել «Ամերիաբանկից» վերցրած ավելի քան 30 000 եվրոյի վարկը, ինչի հետևանքով շուտով կզրկվի նաև բանկում գրավադրված  իր բնակարանից։

Աճուրդի մասին հրապարակային ծանուցման համաձայն` այն նախանշված է ս.թ. մայիսի 27–ին։ Գրավադրված բնակարանը գտնվում է Երևանի Մաշտոցի պողոտայի 4 հարկանի շենքի 1-ի հարկում, մակերեսը` 85,7 ք/մ է։ Բնակարանի մեկնարկային գինը սահմանվել է 55 200 000 դրամ:

Հիշեցնենք`այն որ նախկին պաշտոնյան չի կատարում վարկային պայմանագրով ստանձնած իր պարտավորությունները հանրությանը հայտնի դարձավ անցյալ տարի, երբ «Ամերիաբանկը» դիմեց դատարան` Շահգելդյանին սնանկ ճանաչելու պահանջով։ 2020թ–ի նոյեմբերին դատարանը բավարարեց բանկի պահանջը։

Դատարանի որոշման մեջ հրապարակված տվյալների համաձայն` Մհեր Շահգելդյանին 30.000 եվրոյի վարկը տրամադրել է տարեկան 9 տոկոս տոկոսադրույքով, 15 տարի ժամկետով` մինչև 14.02.2032թ. մարելու պայմանով։

Բացի այդ Շահգելդյանը նույն օրը «Ամերիաբանկից» նաև սպառողական վարկ է ստացել` 1.4 մլն դրամի չափով,  տարեկան 17 տոկոս տոկոսադրույքով ու դարձյալ մինչև.2032թ. մարման ժամկետով։

Հետաքրքրական է, որ Մհեր Շահգելդյանը վարկային պայմանագրերը կնքել է 2017թ–ի փետրվարին, երբ այլևս պատգամավոր չէր (5-րդ գումարման ԱԺ–ն աշխատանքն ավարտել է 2016թ–ի դեկտեմբերին, 6-րդ գումարման ԱԺ–ում ՕԵԿ–ն այլևս  մանդատ չի ստացել), հետևաբար այս գործարքները Շահգելդյանի  ներկայացրած գույքի ու եկամուտների հայտարարագրերում չեն արտացոլվել։

«Մհեր Շահգելդյանն իր վարկային պարտավորությունները պատշաճ չի կատարել, թույլ է տվել պարտավորությունների կատարման կետանց, և 24.06.2020թ. դրությամբ բանկի նկատմամբ նրա ունեցած պարտքը Թիվ 1 Պայմանագրով կազմում է 57.845,76 եվրոյին համարժեք ՀՀ դրամ, որից 28.734,47 եվրո՝ որպես վարկի գումարի մնացորդ, 14.029,81 եվրո՝ որպես տոկոսագումար, 151,99 եվրո՝ որպես ժամկետանց գումարի տոկոս, 128,87 եվրո՝ որպես ժամկետանց գումարի տույժ, 14.800,62 եվրո՝ որպես ժամկետանց տոկոսի տույժ, իսկ թիվ 2 պայմանագրով պարտքը կազմում է 1.250.437 ՀՀ դրամ, որից 1.092.435 ՀՀ դրամը՝ որպես վարկի գումարի մնացորդ, 55.919,70 ՀՀ դրամը՝ որպես տոկոսագումար, 14.159,10 ՀՀ դրամը՝ որպես ժամկետանց գումարի տոկոս, 51.114,80 ՀՀ դրամը՝ որպես ժամկետանց գումարի տույժ, 10.968,40 ՀՀ դրամը՝ որպես ժամկետանց տոկոսի տույժ, 25.840 ՀՀ դրամ՝ որպես գերածախս»,– ասված է դատարանի որոշման մեջ։

Ինչո՞ւ 2008թ–ին միացաք իշխանությանը. ՕԵԿ–ն արդեն 10 տարի ստիպված է պատասխանել ընտրողներին

Մհեր Շահգելդյանը, թեև չի համաձայնել իրեն սնանկ ճանաչելու պահանջի ու բանկի ներկայացրած հաշվարկների հետ` ընդունելով միայն մայր գումարով առկա պարտքը, բայց դատարանը նրա պատճառաբանությունը հաշվի չի առել ու որոշել է սնանկ ճանաչել նախկին քաղաքական գործչին, քաղաքի կենտրոնում նրա գնած բնակարանն էլ հանել  աճուրդի։

Հիշեցնենք` ՕԵԿ–ի նախկին փոխնախագահ Մհեր Շահգելդյանը 2018 թ․–ին հեռացել է և՛ հարազատ կուսակցությունից և՛ ընդհանրապես քաղաքականությունից։

380
թեգերը:
Սնանկության դատարան, Բանկ, աճուրդ, բնակարան, Մհեր Շահգելդյան
Ըստ թեմայի
Ալրաղացի Լյովիկին պատկանող ընկերությունը սնանկ է ճանաչվել. ԶԼՄ
«Սանիթեքը» սնանկ է ճանաչվել. «Ժողովուրդ»
Արթուր Բաղդասարյանը վստահ է` ՕԵԿ–ը տեղ կունենա ապագա խորհրդարանում

Մասնակցելո՞ւ եք ընտրություններին և ինչո՞ւ. հարցախույզ Երևանում

0
(Թարմացված է 22:44 06.05.2021)
Sputnik Արմենիան հարցում է անցկացրել Երևանում և պարզել` ՀՀ քաղաքացիների մեծ մասը պատրաստվում է մասնակցել հունիսին նախատեսված արտահերթ ընտրություններին։

Sputnik Արմենիայի հարցման մասնակիցները համարում են, որ ընտրություններին մասնակցելը յուրաքանչյուր քաղաքացու պարտքն է։ Գնալու են քվեարկության, որովհետև մտավախությունները շատ են, իսկ ընտրություններից հետո շատ բան կարող է փոխվել։

Քաղաքացիներից մեկի կարծիքով՝ մեր միակ հույսը հզոր զենք ստեղծելն է։

«Մենք ուրիշ ճար չունենք», -ասաց նա։

Առաջիկա ընտրությունները հեշտ չեն լինելու. Ռոբերտ Քոչարյանը` փողոցային պայքարի մասին

Տղամարդկանցից մեկն էլ շեշտեց, որ ոչ մի դեպքում չի մասնակցելու ընտրություններին։

«Հերս էլ բանակից գա՝ չեմ մասնակցելու։ Նիկոլի ժամանակ եղել եմ, Ռոբերտի ժամանակ եղել եմ, Սերժի ժամանակ եղել եմ, Պարույրի՝ ևս, բայց ինչի՞ տեղ անցավ»,– նշեց նա։

Որպեսզի իմանաք, թե ինչ պատասխաններ են տվել հարցման մյուս մասնակիցները, դիտեք Sputnik Արմենիայի տեսանյութը։

Ընտրողները 2 հոգու են տեսնում վարչապետի պաշտոնում. քաղտեխնոլոգը` ընտրությունների մասին

 

0
թեգերը:
Հարցում, Երևան, Ընտրություններ, Հայաստան
Ըստ թեմայի
Ընտրությունները ՀՀ պետականության անփառունակ վախճանի նոր էջ կբացեն․ Աշոտյան
Եթե Փաշինյանն անգամ ընտրություններում պարտվի, միևնույնն է, ինքնակամ չի հեռանա. քաղաքագետ 
Լինելու են ՀՀ պատմության մեջ ամենավատ ընտրությունները. տեղամասերում կլինեն բախումներ