ԵՐԵՎԱՆ, 3 հուլիսի — Sputnik. Երևանի նախկին քաղաքապետ Տարոն Մարգարյանն ապրե՛լ, ապրու՛մ և շարունակելու է հիմնավորապես ապրե՛լ Երևանում։ Facebook սոցիալական կայքի իր էջում այս մասին գրել է Երևանի քաղաքապետարանի տեղեկատվության և հասարակայնության հետ կապերի վարչության նախկին պետ Արթուր Գևորգյանը։
Այսօր «Ժամանակ» թերթը գրել էր, որ Տարոն Մարգարյանը հիմնավորապես տեղափոխվել է Ռուսաստանի Դաշնություն:
«Տարոն Մարգարյանը, ի հեճուկս ստեր մոգոնողների և տարածողների, ապրե՛լ, ապրու՛մ և շարունակելու է հիմնավորապես ապրե՛լ Երևանում, դուր գա դա ոմանց, թե՝ ոչ: Տիկնա՛յք և պարոնա՛յք, դադարեցրե՛ք այլևս ձեզ գուցե ցանկալի երևակայությունը որպես իրողություն ներկայացնելու անպտուղ փորձերը։ Ձեր երևակայությունը երբեք իրականություն չի՛ դառնա, նույնիսկ չերազե՛ք»,–գրել է նա։
Հիշեցնենք, որ 2018–ին էլ նման լուրեր էին կրկին շրջանառվել, և Գևորգյանը նորից հերքել էր դրանք։
Երևանի քաղաքապետ Տարոն Մարգարյանը հրաժարական էր ներկայացրել 2018–ի հուլիսի 9-ին։
