ԵՐԵՎԱՆ, 24 հունիսի – Sputnik. «Աբազար բուս» հայկական ընկերության ավտոբուսը Մոսկվայից Երևան գալու ճանապարհին չի կարողացել հատել ռուս–վրացական սահմանը։ Sputnik Արմենիային այս մասին հայտնեցին ընկերության մամուլի ծառայությունից։
Ավտոբուսը Մոսկվայից դուրս է եկել հունիսի 22-ին։ Ըստ Վրաստանում Հայաստանի դեսպանության տարածած տեղեկության` ավտոբուսը Վերին Լարսի անցակետի վրացական հատվածում կանգնեցվել է այսօր՝ առավոտյան ժամը 06։00-ին` արգելված բեռ տեղափոխելու համար։
«Մենք մեկ այլ մեքենա ենք ուղարկել անցակետ։ Սա` այն դեպքի համար, եթե այդպես էլ թույլ չտան, որ ավտոբուսն անցնի սահմանը։ Կազմակերպել ենք, որ երեխաներով ուղևորները տրանսպորտային այլ միջոցներով տեղ հասնեն»,– ասացին ընկերությունից։
Հարցին, թե ինչու է գործընթացը ձգձգվում, ընկերությունից պատասխանեցին, որ սահմանապահները պետք է ստուգեն և հարցաքննեն բոլորին ու միայն դրանից հետո սահմանը հատելու թույլտվություն տան։
«Վերին Լարսի» հարցը լուծում ունի. Վրաստանը կկարողանա՞ անխափան երթևեկություն ապահովել
Թե ինչ բեռ են հայտնաբերել ավտոբուսում, առայժմ հայտնի չէ։ Ավտոբուսում 48 ուղևոր է եղել։
Վրաստանում ՀՀ դեսպանությունը նույնպես աշխատանքներ է տանում վրացական համապատասխան մարմինների հետ՝ ավտոբուսի ուղևոր ՀՀ քաղաքացիներին Հայաստան տեղափոխելու ուղղությամբ։
Ավելի հարմար է, քան լաստանավային փոխադրումը. Երևանում գտել են «Վերին Լարսի» այլընտրանքը
