ԵՐԵՎԱՆ, 5 հունիսի — Sputnik. Շոգ եղանակների պատճառով հրդեհների դեպքերը Հայաստանում ավելացել են: Այսօր ԱԺ-ում, լրագրողների հետ զրույցում, ասաց ՀՀ ԱԻ նախարար Ֆելիքս Ցոլակյանը:
«Երեկ չէ անցած օրը 69 հրդեհի դեպք ունեինք հանրապետությունում, երեկ 60-ից ավելի: Բավական շատ են հրդեհները: Ամենաշատը Արարատյան դաշտում է: Հետո կանցնի նախալեռնային,լեռնային շրջաններ` կապված խոտի չորացման հետ և այլն»,- ասաց Ցոլակյանը:
Նրա խոսքով` առայժմ հրդեհները խնդիրներ չեն առաջացրել, հրշեջներին հաջողվել է դրանք ժամանակին մարել:
Ինչ վերաբերում է անտառային հրդեհներին, նախարարը նշեց, որ աշխարհում դեռ չի ստեղծվել դրանք կանխարգելելու լիարժեք արդյունավետ միջոց: Իսկ հնարավոր հետևանքների դեմ պայքարի համար կառավարությունը մտածում է օդուժի ձեռքբերման մասին:
Անդրադառնալով կարկտից պաշտպանության միջոցներին` Ցոլակյանը նշեց, որ Հայաստանն ունի միջազգային կառույցների հետ պայմանավորվածություն` հրթիռներ ձեռք բերելու միջոցների տրամադրման շուրջ: Իսկ հրթիռները գնվելու են Ռուսաստանից:
«Միայն ցանցը ցույց կտա դրա արդյունավետությունը: Հիմա ցանց մենք չունենք: Մենք ունենք լոկալ ինչ-որ տեղեր դրված կայաններ»,- ասաց նա:
Ֆելիքս Ցոլակյանը նաև նշեց, որ Հայաստանի ռելիեֆի պայմաններում չի կարող ամբողջ համակարգը հենվել մեկ մեթոդի վրա: Հրթիռային կայաններին զուգահեռ անհրաժեշտ է ունենալ նաև կարկտապաշտպան ցանցեր ու նաև գյուղատնտեսության ապահովագրություն` հնարավոր ռիսկերից գյուղացուն ապահովելու համար:
