Այս օրը Հայաստանում տոնական երանգ ունի ռադիոյի աշխատակիցների համար:
Այո, մայիսի 7-ը Ռադիոյի օրն է, որը նշվում է Ռուսաստանում, Բելառուսում, Ղրղըզստանում և, ինչպես նշեցինք, Հայաստանում:
Իսկ ժամանակին նշվում էր ԽՍՀՄ-ում. հիմքն այն է, որ 1895 թվականի մայիսի 7-ին է ռուս գիտնական Ալեքսանդր Պոպովը Ռուսական ֆիզիկա-քիմիական ընկերության նիստում ներկայացրել իր ստեղծած ռադիոընդունիչը և իրականացրել ռադիոկապի առաջին սեանսը:
Դե ինչ, սիրելի ռադիոգործընկերներ, անխափան եթեր, և ռադիոեթերում թող հնարավորինս շատ լինեն բարի ու դրական լուրերը:
Մայիսի 7-ը այս տարի նաև նշվում է որպես ասթմայի դեմ պայքարի համաշխարհային օր (այն նշվում է մայիսի առաջին երեքշաբթի օրը)՝ Առողջապահության համաշխարհային կազմակերպության հովանու ներքո:
Իսկ ահա Պորտուգալիայում, էլ ավելի կոնկրետ Նազարե փոքրիկ ու հին ձկնորսական քաղաքում մայիսի 7-ը Ծովի մարդու օրն է: Դժվար չէ կռահել, որ խոսքը ձկնորսների մասին է և նրանց սպասողների: Իսկ օրը տոնական է, զանգվածային քեֆ-ուրախությամբ, երգուպարով, զանազան ձկնատեսակներից պատրաստված կերակուրների հյուրասիրությամբ:
Վերադառնալով հայրենի եզերք, պետք է նշենք, որ մայիսի 7-ը մի շարք հայտնի հայրենակիցների ծննդյան օրն է:
Մայիսի 7-ին է ծնվել անվանի հայ բժիշկ, վիրաբույժ, դոկտոր, պրոֆեսոր, ՀՀ գիտության վաստակավոր գործիչ Պավել Անանիկյանը (1930-2018):
Արձակագիր, մի ամբողջ շարք տպավորիչ ժողովածուների հեղինակ, ժամանակակից գրող Հովհաննես Երանյանը ևս ծնվել է մայիսի 7-ին:
Մեծ հայրենականի մեկնարկից մի քիչ առաջ՝ 1941 թ.-ի մայիսի 7-ին է ծնվել նաև կինոռեժիսոր, սցենարիստ, ավելի վաղ տարիքում նաև օպերատոր Կարեն Գևորգյանը: Բազմաթիվ ֆիլմերի ռեժիսոր և սցենարի հեղինակ է: Նա նաև «Կին-ձա-ձա» հանրահայտ ֆիլմի երկրորդ ռեժիսորն է եղել: Բայց մասնագետները առանձնացնում են Չինգիզ Այթմատովի համանուն վեպի հիման վրա Կարեն Գևորգյանի նկարահանած «Չալ շունը, որ վազում էր ծովեզրով» կինոնկարը: Ասենք, այդ ֆիլմի նկարահանումն ինքնին մի պատմություն է եղել, բայց 1991 թվականին, Մոսկվայի հեղինակավոր կինոփառատոնում ֆիլմն արժանացել է գլխավոր մրցանակին:
Մայիսի 7-ը խորհրդային ու ռուսական կինոռեժիսոր, մասնավորապես Բուլգակովի «Շան սիրտը» և «Վարպետն ու Մարգարիտան» վարպետորեն էկրանավորած Վլադիմիր Բորտկոյի ծննդյան օրն է (ծնվ. 1946թ.): Հասկանալի է, որ ռեժիսորը, որը նաև քաղաքական գործունեությամբ է զբաղվում, բազմաթիվ այլ գործեր էլ ունի, որոնց շարքից, օրինակ, կարելի է նշել 2009-ին նկարահանած «Տարաս Բուլբա» ֆիլմը:
Հավելենք, որ մայիսի 7-ին է ծնվել նաև աշխարհահռչակ հնդիկ գրող Ռաբինդրանաթ Թագորը (1861-1941):
Իսկ ահա այնպիսի մի ստեղծագործող, որն ինքը բազմաթիվ ստեղծագործողների համար հետաքրքրական կերպար է դարձել, ինչպիսին է կոմպոզիտոր Անտոնիո Սալիերին, մահացել է մայիսի 7-ին (1750-1825): Եվ չնայած Սալիերին հիշատակվում է որպես Գլյուկի հետևորդ, իր ժամանակի հայտնի, ճանաչված կոմպոզիտոր, որ ի լրումն ամենի, դասավանդել է Բեթհովենին, Լիստին, Շուբերտին, նրան շատերը գիտեն կամ հիշում են որպես մեկը, որը թունավորելու միջոցով սպանել է Մոցարտին:
Շատերը համոզված են, որ դա այդպես էլ եղել է: Մինչդեռ, ուրիշներն էլ պնդում են, որ թունավորելու մասին պատմությունը միֆ է, առասպել: Ավելին, 1997-ին, պարզվում է դատ է եղել և Ավստրիայի դատարանը պաշտոնապես ճանաչել է, որ Մոցարտի մահվան մեջ Սալիերին մեղք չունի:
Սակայն, դա էլ երկար չտևեց, որովհետև անցյալ տարի նորից «իրողություններ են փոխվել». 18-րդ դարից ինչ-որ օրագիր է ի հայտ եկել, ըստ որի Սալիերին կարող էր և թունավորած լինել Մոցարտին… շախմատային մի գրազ պարտվելու պատճառով:
Բայց սա «Մոցարտ և Սալիերի» թեմայով մի նոր ստեղծագործության սկիզբ է, իսկ դա արդեն այլ պատմություն է:
