Օրն, իհարկե, ամենից առաջ նշանակալի է ուղղափառ քրիստոնյաների համար: Մայիսի 6-ը սուրբ Գևորգ զորավարի օրն է, ըստ որում, հարևան Վրաստանում նշում են նաև ոստիկանության, իսկ Բուլղարիայում՝ բանակի օրը, հասկանալի է, դա փոխկապակցված է սուրբ Գևորգ զորավարի, այսինքն՝ օրվա խորհրդի հետ:
Ի դեպ, չնայած Անգլիայում բոլորն ուղղափառ չեն, բայց 1910 թվականին հենց մայիսի 6-ին է Գևորգ 5-րդը դարձել Մեծ Բրիտանիայի թագավոր: Ի դեպ, հենց նա է 1917 թ.-ին սահմանել Վինձորյան արքայատոհմ անվանումը, նպատակ ունենալով ձերբազատվել գերմանական արտասանությամբ (ու ոչ միայն)՝ Սաքսեն-Կոբուրգ-Գոթյան դինաստիական անվանումից:
Հա, իսկ դրանից մի 84 տարի հետո, 1994 թվականի մայիսի 6-ին, Մեծ Բրիտանիայի թագուհի Եղիսաբեթ Երկրորդն ու Ֆրանսիայի նախագահ Ֆրանսուա Միտերանը մասնակցեցին Ալբիոնը մայրցամաքային Եվրոպային միացնող, Լա Մանշի նեղուցով անցնող հանրահայտ ստորջրյա թունելի բացման հանդիսավոր արարողությանը:
Իսկ բազմադավան և անթագավոր Միացյալ Նահանգներում, օրինակ, ընդունված է մայիսի 6-ին նշել բուժքույրերի օրը:
Բարեկամական ու նաև հայահոծ համայնք ունեցող Լիբանանում օրը բոլորովին այլ խորհուրդ ունի մայիսի 6-ը՝ Նահատակների օրը: Լիբանանում նաև Սիրիայում հարգում են անկախության համար պայքարող, 1916 թվականին Օսմանյան կայսրության երիտթուրք կառավարիչների, ավելի որոշակի՝ Ջեմալ փաշայի հրամանով Բեյրութում ու Դամասկոսում սպանվածների հիշատակը: Նահատակների հիշատակին է նվիրված Բեյրութի Մարտիրոսների հրապարակը:
Վերադառնանք սակայն հայրենի եզերք ու միանգամից նշենք, որ մայիսի 6-ը թատրոնի և կինոյի սիրված դերասան Գուժ Մանուկյանի՝ Գուրգեն Արաքսմանյանի ծննդյան տարեդարձն է (ծնվ. 1937թ., Գյումրի): Գուժ Մանուկյանը, որ 1967-ին միացել է Հրաչյա Ղափլանյանի՝ Երևանի Դրամատիկական թատրոն ստեղծելու նախաձեռնությանը, մինչ օրս աշխատում է այստեղ: Գուժ Մանուկյանը մարմնավորել է բազմաթիվ հիշվող կերպարներ, նկարահանվել բազմաթիվ գեղարվեստական ֆիլմերում («Հեղնար աղբյուր», «Նահապետ», «Աշնան արև», «Հուսո աստղ», «Մեռիր ձիու վրա», «Հին օրերի երգը» և այլն): Նա Հայաստանի ժողովրդական արտիստ է, ՀՀ պետական մրցանակի դափնեկիր, Մովսես Խորենացու Շքանշանի ասպետ:
Դե, քանի որ բեմական արվեստին անդրադարձանք, հավելենք, որ մայիսի 6-ը նաև ամերիկյան հայտնի կինոդերասան, նաև՝ ռեժիսոր և պրոդյուսեր Ջորջ Քլունիի ծննդյան օրն է (ծնվ. 1961թ.):
Ջորջ Քլունին հայտնի է նաև իր հասարակական, մարդասիրական գործունեությամբ: Նա, մասնավորապես հանդես է եկել Հայոց ցեղասպանության ճանաչման դիրքերից, շատերը կհիշեն նաև, որ Ջորջ Քլունին «Ավրորա» առաջին մրցանակաբաշխության ընտրական հանձնաժողովի համանախագահն էր և 2016-ին տիկնոջ հետ եկել էր Հայաստան:
Մայիսի 6-ը, նշենք, նաև խորհրդային սիրված դերասան, ԽՍՀՄ ժողովրդական արտիստ Վլադիմիր Էտուշի ծննդյան օրն է (1922-2019): Հանդիսատեսն, իհարկե, նրան ավելի շատ հիշում է «Կովկասի գերուհին», «Իվան Վասիլևիչը փոխում է մասնագիտությունը», «Բուրատինոյի արկածները» ֆիլմերից, չնայած հայտնի դերասանը, իհարկե, հարյուրավոր դերեր է խաղացել թատրոնում և կինոյում:
Ինչ վերաբերում է այլ հայտնի դեմքերին, ապա հավելենք, որ մայիսի 6-ին է ծնվել Զիգմունդ Ֆրեյդը:
Այսօրվա հետ կապված հիշարժան այլ իրադարձություններ էլ կան, բայց եթե ուզում եք հիշել, թե կոնկրետ անցած տարի ինչ դեպքեր են տեղի ունեցել Հայաստանում և աշխարհում, կարող եք սեղմել այս հղումը։
