Ամուրյան վագր

Ի՞նչ է կատարվում կենդանաբանական այգում. ամուրյան վագրի մոտ գոյացություն է հայտնաբերվել

112
(Թարմացված է 13:48 02.05.2019)
Երևանի կենդանաբանական այգու գլխավոր կենդանաբույժը հայտնում է, որ այգում մնացած երկու վագրերից մեկի ժանիքների վերևի հատվածում գոյացություններ են հայտնաբերվել։

ԵՐԵՎԱՆ, 2 մայիսի — Sputnik. Երևանի կենդանաբանական այգու ամուրյան վագրի մոտ առողջական խնդիրներ են առաջացել։ Sputnik Արմենիայի հետ զրույցում այս մասին ասաց Երևանի կենդանաբանական այգու գլխավոր կենդանաբույժ Հարություն Հովհաննիսյանը։

«Վագրի մոտ կիստանման և թարախային գոյացություններ են հայտնաբերվել, որոնց բնույթը պարզ չէ։ Այդ գոյացությունները ժանիքների վերևի հատվածում են։ Այժմ գոյացությունից վերցված նմուշներն ուղարկել ենք դրսի լաբորատորիաներից մեկը` հիվանդության ախտորոշման համար»,– ասաց նա։

Կենդանաբույժի խոսքով` հիվանդության ախտորոշման արդյունքներից ելնելով էլ պարզ կլինի իրենց հետագա անելիքները։ Ըստ նրա` վագրը 16-17 տարեկան է։

Հովհաննիսյանի գնահատմամբ` վագրի վիճակը կրիտիկական չէ։ «Նա այս պահին նորմալ սնվում է, շարժվում։ Թարախային պրոցեսը մաքրվել է, մի քանի ատամ` հեռացվել, ընդհանուր առմամբ, վիճակը նորմալ է և դեռևս որևէ բանի կարիք չունի»,–ասաց նա։

Կենդանաբանական այգում այս պահին երկու վագր կա (մեկը բերվել էր ԵԿՄ նախկին նախագահ, ԱԺ նախկին պատգավոր Մանվել Գրիգորյանի առանձնատան տարածքից), որոնք, կենդանաբույժի խոսքով, ցուցադրության համար բավարար են։

Հիշեցնենք, որ օրեր առաջ Երևանի կենդանաբանական այգում սատկել էր Բինգո անունով վագրը, որի բերանում ուռուցք էր հայտնաբերվել։ 2018–ին սատկել էին այգու զեբրը, արջը, կոկորդիլոսը, բեզոարյան այծը, վագրը։

112
Ըստ թեմայի
Նոր իրարանցում. կենդանաբանական այգու վագրի մահը դիտավորությո՞ւն է, թե՞ բնական պրոցես
Հովհաննիսյան․ «Կենդանաբանական այգում էլի կան առողջական խնդիրներ ունեցող կենդանիներ»
Հրապարակվել է Երևանի կենդանաբանական այգու կապիկների և թռչունների ազատավանդակների կոնցեպտը
«Ռուբեն, հեռացիր». Կենդանաբանական այգու նախկին աշխատակիցները կրկին բողոքի են դուրս եկել
Դիլիջան ազգային պարկ

«Դիլիջան ազգային պարկի» անտառապահը բռնվել է անտառը «ծախելիս»

7
(Թարմացված է 19:02 05.06.2020)
Դիլիջանի բնակիչը մեկ անգամ հասցրել է անտառից 4 խմ փայտ դուրս բերել, սակայն երկրորդ անգամ նա արդեն բռնվել է։

ԵՐԵՎԱՆ, 5 հունիսի — Sputnik. ՀՀ քննչական կոմիտեն տեղեկացնում է, որ  կաշառք ստանալու համար քրեական գործ է հարուցվել «Դիլիջան ազգային պարկ» ՊՈԱԿ-ի անտառապահի դեմ։

«2020թ. մայիսին Դիլիջանի բնակիչը կաշառք տալու շուրջ համաձայնության գալով «Դիլիջան ազգային պարկ» ՊՈԱԿ-ի անտառապահի հետ՝ վերջինիս թույլտվությամբ նույն ամսվա վերջերին 2 անգամ «Ֆորդով» շուրջ 4 խմ վառելափայտ է դուրս բերել նշված պահաբաժնից։ Դրա դիմաց անտառապահին կաշառքի գումարի մի մասն է տվել»,–նշված է հաղորդագրության մեջ։

Դիլիջանի բնակիչը հունիսի 1-ին՝ ժամը 08:00-ի սահմաններում, նույն պայմանավորվածության շրջանակներում հերթական անգամ առանց համապատասխան փաստաթղթի իր ավտոմեքենայով նույն պահաբաժնից դուրս է բերել վառելափայտ։ Սակայն հայտնաբերվել է ոստիկանության աշխատակիցների կողմից և չի հասցրել անտառապահին տալ կաշառքի գումարի մնացած մասը:

Նորքի նախկին անտառի նոր սեփականատերերին կպարտադրեն ծառ տնկել

Ձեռք բերված բավարար ապացույցների համակցությամբ անտառապահին մեղադրանք է առաջադրվել ՀՀ քրեական օրենսգրքի 311-րդ հոդվածի (կաշառք ստանալը) 1-ին մասով, իսկ Դիլիջան քաղաքի բնակչին՝ ՀՀ քրեական օրենսգրքի 312-րդ հոդվածի (կաշառք տալը) 1-ին մասով: Նրանց նկատմամբ որպես խափանման միջոց է կիրառվել ստորագրությունը չհեռանալու մասին:

Նախաքննությունը շարունակվում է:

Անտառների պահպանությանն ուղղված մեր քաղաքականությունն արդյունավետ է. Փաշինյանի նոր թվերը

7
թեգերը:
ՀՀ քննչական կոմիտե, Կաշառք, փայտ, անտառապահ, Անտառ, «Դիլիջան ազգային պարկ» ՊՈԱԿ
Ըստ թեմայի
Կաշառք ստանալու պահին ձերբակալվել է Ազգային արխիվի մարզային մասնաճյուղի տնօրենը. տեսանյութ
Կինը, գազն ու հոսանքը. ՌՈ–ն կաշառքի ու պաշտոնեական դիրքի չարաշահման դեպքեր է բացահայտել
Կաշառք են վերցրել. Մարտունու և Սևանի անձնագրայինների պետերի պաշտոնավարումը դադարեցվել է
Երեխա

ՀՀ–ում կորոնավիրուսով վարակված ավելի քան 1000 երեխա կա

41
(Թարմացված է 18:55 05.06.2020)
Կորոնավիրուսով վարակված երեխաների գրեթե կեսը 1–ից 8 տարեկան են։ Կավասակիի համախտանիշի նոր դեպք չի գրանցվել։

ԵՐԵՎԱՆ, 5 հունիսի – Sputnik. Հայաստանի Հանրապետությունում Covid 19-ով վարակված ավելի քան 1000 երեխա կա։ Տեղեկությունը Sputnik Արմենիային հայտնեցին ՀՀ առողջապահության նախարարությունից։

«Մինչև հունիսի 2-ը ներառյալ կորոնավիրուսային հիվանդություն է հաստատվել 1013 երեխայի մոտ, որից 479-ը` 1-8 տարեկան։ Կավասակի համախտանիշ է հաստատվել մեկ երեխայի մոտ»,– գրված է մեր հարցման պատասխանում։

Հիշեցնենք` հունիսի 3-ին ՀՀ առողջապահության նախարար Արսեն Թորոսյանը հայտնել էր, որ Կավասակի համախտանիշի դեպք է ախտորոշվել 4 տարեկան երեխայի մոտ, որն ունեցել է անախտանիշ կորոնավիրուսային հիվանդություն։

Կավասակիի համախտանիշն առաջին անգամ բացահայտել է ճապոնացի մանկաբույժ Տոմիսակու Կավասակին՝ 1967թ-ին։ Բժշկի անունով կոչված անսովոր համախտանիշը գրանցվում է միայն երեխաների մոտ, մեծ մասամբ՝ մինչև 5 տարեկան։ Հիվանդությանը բնորոշ է արյունատար անոթների բորբոքումն ու ախտահարումը, որոնց  հետևանքով կարող են սիրտ-անոթային հիվանդություններ առաջանալ։

Կավասակիի համախտանիշ ուներ Ջեթ Տրավոլտան՝ հայտնի հոլիվուդյան դերասան և ռեժիսոր Ջոն Տրավոլտայի որդին։ Ջեթի մահը մեծ աղմուկ բարձրացրեց։ Երկու տարեկանում Տրավոլտա-կրտսերի մոտ Կավասակիի համախտանիշ էին ախտորոշել։ 2009 թ-ին 16-ամյա պատանին լոգարանում կորցրեց գիտակցությունը, ընկավ և վնասվածք ստացավ, որն էլ նրա մահվան պատճառ դարձավ։ Ենթադրվում է, որ Ջեթը կորցրել է գիտակցությունը էպիլեպտիկ նոպայի պատճառով, որը հանդիպում է Կավասակիի համախտանիշով տառապող մարդկանց հետ։

Մինչև կորոնավիրուսի համավարակը Կավասակիի համախտանիշի վիճակագրությունը համեմատաբար ցածր էր։ ԱՄՆ-ի Առողջապահության ազգային ինստիտուտի տվյալներով՝ համախտանիշն առավել հաճախ հանդիպում էր ասիական երկրներում․ օրինակ՝ Ճապոնիայում տարեկան 26 հազար դեպք էր գրանցվում, ԱՄՆ-ում հիվանդությունը 4200 երեխայի էր ախտահարում։

Կորոնավիրուսի բռնկումը «արթնացրել է» նաև Կավասակիի համախտանիշը։ Ըստ «The Lancet» բժշկական ամսագրի՝ եթե համավարակից առաջ եվրոպական երկրներում համախտանիշը հայտնաբերվում էր յուրաքանչյուր 20-րդ երեխայի մոտ, ապա հիմա այդ թիվը 20 անգամ աճել է, և հիվանդությունը «որսում է» յուրաքանչյուր հազարերորդ փոքրիկին։

Հիշեցնենք` Հայաստանում կորոնավիրուսով վարակվածների թիվը վերջին մեկ օրում ավելացել է 596–ով և դարձել 11817։ Այս պահին փաստացի բուժում է ստանում 8052 մարդ, կատարվել է 65161 թեստավորում, առողջացել են վարակվածներից 3513–ը։ Ընդհանուր առմամբ գրանցվել է մահվան 183 դեպք։

Հայաստանում կորոնավիրուսից ևս 7 մահ է արձանագրվել. նոր տվյալներ

41
թեգերը:
երեխա, կորոնավիրուս, Հայաստան
թեմա:
Կորոնավիրուսը Հայաստանում և Արցախում
Ըստ թեմայի
ՀՀ–ում կորոնավիրուսից մահացածներից մեկը 44 տարեկան կին է. նոր տվյալներ
Շաքարային դիաբետ ու սրտանոթային խնդիրներ ունեցող 68-ամյա բժիշկը բուժվել է կորոնավիրուսից
Ոստիկանությունում կորոնավիրուսով վարակվածների թիվը 100-ի է հասնում
Ինչո՞ւ կորոնավիրուսի տարածումը չկանխվեց. ՀՀ առողջապահության նախկին նախարարի կարծիքը
Արմեն Սարգսյանն ու Արսեն Թորոսյանը

Նախագահը պատրաստ է օգտագործել անձնական կապերը. Սարգսյանն ու Թորոսյանը հանդիպել են

1
(Թարմացված է 19:03 05.06.2020)
Արմեն Սարգսյանն ու Արսեն Թորոսյանը քննարկել են Հայաստանում կորոնավիրուսով պայմանավորված իրավիճակը։

ԵՐԵՎԱՆ, 5 հունիսի – Sputnik. ՀՀ նախագահ Արմեն Սարգսյանը պատրաստ է, օգտագործելով անձնական կապերը, այսուհետ ևս աջակցել համավարակի հետևանքների հաղթահարման գործում տարբեր երկրների և կառույցների հետ կապերի հաստատմանը և համագործակցությանը: Սարգսյանն իր պատրաստակամության մասին հայտնել է ՀՀ առողջապահության նախարար Արսեն Թորոսյանի հետ այսօր կայացած հանդիպման ժամանակ։

Սարգսյանն իր անհանգստությունն ու մտահոգությունն է հայտնել կորոնավիրուսի համավարակի հետևանքով ստեղծված իրավիճակի վերաբերյալ:

Նախագահի առաջարկով նախարարը տեղեկություններ և պարզաբանումներ է ներկայացրել կորոնավիրուսի համավարակի հաղթահարմանն ուղղված ռազմավարության, ինչպես նաև ձեռնարկվող քայլերի և առկա խնդիրների վերաբերյալ:
Թորոսյանը տեղեկացրել է հիվանդների բուժման և կազդուրման գործընթացի, առողջապահության ոլորտի խնդիրների, ինչպես նաև համակարգի առաջնահերթ կարիքների մասին:

ՀՀ–ում կորոնավիրուսով վարակված ավելի քան 1000 երեխա կա

Հիշեցնենք` Հայաստանում կորոնավիրուսով վարակվածների թիվը վերջին մեկ օրում ավելացել է 596–ով և դարձել 11817։ Այս պահին փաստացի բուժում է ստանում 8052 մարդ, կատարվել է 65161 թեստավորում, առողջացել են վարակվածներից 3513–ը։ Ընդհանուր առմամբ գրանցվել է մահվան 183 դեպք։

1
թեգերը:
կորոնավիրուս, Արսեն Թորոսյան, Արմեն Սարգսյան, Հայաստան
թեմա:
Կորոնավիրուսը Հայաստանում և Արցախում
Ըստ թեմայի
Ոստիկանությունում կորոնավիրուսով վարակվածների թիվը 100-ի է հասնում
ՀՀ–ում կորոնավիրուսով վարակված տարեցների խնամքը կկազմակերպվի մեկուսացված վայրում
Ինչո՞ւ կորոնավիրուսի տարածումը չկանխվեց. ՀՀ առողջապահության նախկին նախարարի կարծիքը