Հայաստանը ներկայացնող Անգելինա Չաբանյանը հաղթել է Miss USSR UK գեղեցկության մրցույթում

ԵՐԵՎԱՆ, 28 ապրիլի –Sputnik. Լոնդոնում կայացած Miss USSR UK գեղեցկության մրցույթի գլխավոր մրցանակին է արժանացել Հայաստանի 18-ամյա ներկայացուցիչ Անգելինա Չաբանյանը։ Նրա օգտին մրցույթի պաշտոնական կայքում քվեարկել է հանդիսատեսի մեծ մասը։

Կայքում տեղադրված տվյալների համաձայն` գեղեցկուհու հասակը 174 սմ է։ Նա ծնվել է Բելառուսում, 15 տարեկանից Անգլիայում է սովորում։

Ինչպես նշում է Անգելինան, մանկուց փորձել է տարբեր մարզաձևերով զբաղվել, տարատեսակ հոբբիներ ունի, սակայն ամենից շատ նրան հետաքրքրում էին պարահանդեսային պարերը։ Հավանաբար, հենց այդ ժամանակ էլ նա սեր ու ձգողություն զգաց դեպի արվեստը։

«Պարային արվեստը շատ հարցերում ձևավորեց անհատականությունս։ Դրա շնորհիվ բազմաթիվ հմտություններ ձեռք բերեցի։ Ավելի դիմացկուն, կամային և նպատակաուղղված դարձա, ինչպես նաև ավելի ընկերասեր և շփվող։ Սկսեցի ինձ համար բարձր նշաձող սահմանել», – նշում է Չաբանյանը։

Նրա խոսքով` մասնակցությունը մի շարք մրցույթներին նրան վստահություն ներշնչեց սեփական ուժերի նկատմամբ։

Անգելինան մանկուց գեղարվեստական դպրոց է հաճախել։ Ավելին` նրա կտավները ցուցադրվում էին Չինաստանում և Ֆրանսիայում։ Ավարտել է հայտնի Bromsgrove School մասնավոր դպրոցը։ Այսօր սովորում է Courtauld Institute of Art–ի (Կուրտոյի արվեստի ինստիտուտ) Արվեստի պատմություն ֆակուլտետում։ Աղջկա գլխավոր նպատակն է գիտական աստիճան ստանալը և արտ–դիլեր դառնալը։

«Երազանքս է օգնել օժտված մարդկանց, հատկապես` աղքատներին և թշվառներին, բացահայտել իրենց տաղանդը», – խոստովանում է Անգելինան։

Նշենք, որ մրցույթի եզրափակիչ փուլը տեղի է ունեցել նախօրեին։ USSR UK առաջին վիցե–միսսի տիտղոսը ստացավ ռուսաստանցի մոդել Քսենիա Օչերեդկոն։ Իսկ երկրորդ վիցե–միսսի տիտղոսը նվաճեց Ղազախստանը ներկայացնող Լաուրա Մուխտարը։

Miss USSR–ը միջազգային նախագիծ է։ Շոուին մասնակցում են ԽՍՀՄ նախկին երկրների ամենագեղեցիկ աղջիկները, որոնք ներկայացնում են իրենց պետությունների բացառիկ մշակույթը։ Անցած տարի Miss USSR թագը ստացավ Ուկրաինացի մասնակից Ալլա Մերժանը։