Հարություն Հովհաննիսյան

Բողոքի ակցիայի մասնակիցները չցանկացան լսել կենդանաբանական այգու աշխատակցին

101
Բողոքի ակցիան կենդանաբանական այգու տարածքում շարունակվում է։ Ակցիայի մասնակիցներին չբավարարեց այգու ներկայացուցչի մեկնաբանությունը։

ԵՐԵՎԱՆ, 12 ապրիլի— Sputnik. Երևանի կենդանաբանական այգու երեք վագրերից մեկի` Բինգոյի հիվանդության վերջնական ախտորոշումն առ այսօր որոշված չէ։ Ի պատասխան կենդանաբանական այգու մոտ հերթական բողոքի ակցիան անցկացնող մասնագետների բարձրացրած խնդիրների, լրագրողների հետ զրույցում հայտնեց Երևանի կենդանաբանական այգու գլխավոր կենդանաբույժ Հարություն Հովհաննիսյանը։

«Վերջնական դիագնոզն առ այսօր չկա, կան մի քանի արյան անալիզի պատասխաններ։ Առ այսօր մենք չենք հերքել լիմֆոմայի առկայությունը կենդանու օրգանիզմում, մենք հերքել ենք վիրուսների առկայությունը»,– ասաց նա։

Ակցիայի մասնակիցներն այգու աշխատակցից պարզաբանումներ պահանջեցին նաև նախկինում այգում գրանցված դեպքերի վերաբերյալ։ Ի պատասխան Հարություն Հովհաննիսյանը նշեց, որ այգին վերազինման փուլում է, կառուցվում են նոր ազատավանդակներ` կենդանիների պահման պայմանները բարելավելու և դժբախտ դեպքերից նրանց ապահովագրելու համար։

«Դեպքեր կարող են գրանցվել։ Առյուծն էլ առյուծին վնասեց։ Իսկ փոքր արջը իրականում տարիքով փոքր չէր»,– ասաց Հարությունյանը։ Ակցիայի մասնակիցները, սակայն, չցանկացան լսել նրա պարզաբանումները` դրանք «անգրագիտություն» որակելով, ինչից հետո Հովհաննիսյանը հեռացավ։ Ակցիայի մասնակիցները նրան ուղեկցեցին նրա հետևից «ամոթ» վանկարկելով։

Հիշեցնենք` շուրջ կես տարի Երևանի կենդանաբանական այգու նախկին աշխատակիցներն ու մի խումբ բնապահպաններ պարբերաբար բողոքի ակցիաներն են իրականացնում կենդանաբանական այգու տնօրինության դեմ։

Բողոքները հատկապես սրվում են կենդանիների անկման յուրաքանչյուր նոր դեպքի գրանցվելուց հետո։

Այս ակցիայի համար առիթ է հանդիսացել ապրիլի սկզբին Երևանի կենդանաբանական այգու մամուլի ծառայության հայտարարությունը` վագրի մոտ ախտորոշված ծանր հիվանդության մասին։ Այգու ղեկավարությունը հայտնում էր, որ վագրի վիճակը կտրուկ վատացել էր, թուլություն, քթից արյունահոսություն էր նկատվել։ Հրավիրված առցանց կոնսիլիումը` Մոսկվայի, Թեհրանի և Ամստերդամի անասնաբույժների մասնակցությամբ, վագրի մոտ լեյկոզի կասկած էր արձանագրել։

Մոսկվայի կենդանաբանական այգու գլխավոր անասնաբույժ Միխայիլ Ալշինեցկին, սակայն, հերքել էր այս վարկածը։ Իրականացրած հետազոտությունից հետո նա Sputnik Արմենիային հարցազրույց էր տվել, որում ասել էր, որ կենդանու մոտ օնկոլոգիական հիվանդություն է հայտնաբերվել բերանի խոռոչում, որը գրեթե ենթակա չէ բուժման։

Հիշեցնենք` 2018թ.–ի նոյեմբերին Երևանի կենդանաբանական այգու երկու էգ արջերն անսպասելիորեն հարձակվել էին երրորդի վրա և հոշոտել նրան։ Ավելի ուշ տեղեկություն տարածվեց զեբրի թունավորման մասին։

101
թեգերը:
Բողոքի ակցիա
Ըստ թեմայի
Հերթական պատահարը կենդանաբանական այգում. սատկել է բեզոարյան այծերից մեկը
Ինչու են սատկում Երևանի կենդանաբանական այգու բնակիչները. մասնագետներն իրենց վարկածն ունեն
Երևանի կենդանաբանական այգու վագրի մոտ արյան լեյկոզ կա, թե՞ ոչ. զարգացումներ`սկանդալի շուրջ
Բրյուսովի անվան համալսարան

Ուսման վարձի փոխհատուցումը ոչ բոլորին է հասանելի. մի ողջ բուհ դուրս է մնացել նախագծից

130
(Թարմացված է 19:12 11.07.2020)
Ուսման վարձը եկամտահարկի միջոցով փոխհատուցելու նախագիծը քննարկումների տեղիք է տվել։ Շատ ուսանողներ, բնականաբար, գոհ են մնացել նախագծի ընդունումից, բայց կան նաև օրենքից դուրս մնացածներ։

ԵՐԵՎԱՆ, 11 հուլիսի – Sputnik. Վալերի Բրյուսովի անվան պետական համալսարանի որևէ ուսանող չի կարող եկամտահարկի միջոցով փոխհատուցել իր վարձը` օգտվելով օրենքով հասանելիք հնարավորությունից։ Sputnik Արմենիայի հետ զրույցում համալսարանի ուսանողական խորհրդի նախագահի ԺՊ Լարիսա Գևորգյանը նշեց` կառավարությանը պետք է խնդրեն վերանայել նախագիծը, քանի որ այն հավասարության սկզբունք չի ապահովում։

Մարտի 6–ին ԱԺ–ի ընդունած նախագծով մագիստրատուրայում, ասպիրանտուրայում ու օրդինատուրայում սովորող և միաժամանակ աշխատող ուսանողները կկարողանան իրենց աշխատավարձերից վճարվող եկամտահարկերը փոխանցել որպես ուսման վարձ։ Նախագծից, սակայն, դուրս են մնացել մի շարք մասնագիտություններ, և սոցցանցերում դրա առնչությամբ քննարկումներ են սկսվել։

«Մեր համալսարանում գործող 4 ֆակուլտետներից որևէ մեկն ընդգրկված չէ կառավարության սահմանած մասնագիտությունների ցանկում։ Սակայն ուսանողների համար եկամտահարկի միջոցով ուսման վարձի փոխհատուցումը մեծ խթան կլիներ ուսումը շարունակելու և հետագայում աշխատաշուկայում ավելի մրցունակ լինելու համար»,– Sputnik Արմենիային ասաց Լարիսա Գևորգյանը։

Լարիսան ինքը մտադիր է բակալավրիատն ավարտելուց հետո մագիստրատուրա դիմել, և հույս ունի, որ կառավարությունը կվերանայի մասնագիտությունների ցանկը և օրենքից օգտվելու հնարավորություն կտա բոլոր բուհերին։

Բրյուսովի անվան համալսարանում, ի դեպ, գործում է 4 ֆակուլտետ` թարգմանություն և միջմշակութային հաղորդակցություն, կրթության և մասնագիտական մանկավարժություն, սոցիալական գիտությունների և սերվիսի, ռուսաց և օտար լեզուների ֆակուլտետներ։

Ի՞նչ սկզբունքով են ընտրվել մասնագիտությունները, և ինչո՞ւ են որոշները դուրս մնացել այդ ցանկից` հետաքրքրվեցինք ԿԳՄՍՆ մասնագիտական կրթության քաղաքականության մշակման բաժնի պետ Էդգար Ալեքսանյանից։ Նա հայտնեց` մասնագիտությունների ընտրության հարցում երեք գործոն են հաշվի առել։

«Ցանկը կազմելիս տարբեր գերատեսչությունների առաջարկներն ենք հաշվի առել, որոնք էլ հիմնվել են աշխատաշուկայի և պետության հռչակած առաջնահերթությունների վրա։ Բացի այդ, կարևորել ենք բնագիտատեխնիկական ուղղությունը և այդ գծով մասնագիտություններն ենք ներառել ցանկում։ Եվ վերջապես հաշվի ենք առել նաև, թե որ մասնագիտությանը որքան անվճար տեղ է հատկացվել պետության կողմից, այսինքն` շատ անվճար տեղ հատկացված մասնագիտությունները չենք ընդգրկել այդ ցանկում»,–ասաց Ալեքսանյանը։

Պետությունը գայթակղում է հիփոթեքով. որքան աշխատավարձ է պետք բնակարան գնելու համար

Հարցին, թե որքանո՞վ է ճիշտ, որ, օրինակ, մի ամբողջ բուհի ուսանողներ չեն օգտվելու օրենքով տրված հնարավորությունից, Ալեքսանյանը պատասխանեց, որ իրենք որոշում կայացնելիս ոչ թե շեշտը դրել են բուհերի և ֆակուլտետների, այլ մասնագիտությունների վրա։

Նրա խոսքով` առաջին ուսումնական տարին ամփոփելուց հետո չի բացառվում, որ մասնագիտությունները վերանայեն։

Կրթության փորձագետ Ատոմ Մխիթարյանը կարծում է, որ նման նախագիծ կյանքի կոչելն առհասարակ ողջունելի է, քանի որ այն խթանում է կրթության շարունակականության ապահովումը։ Ամբողջ հարցը, սակայն, մասնագիտությունների ցանկն է, որը հայտնի չէ` ինչպես են ընտրել։

«Առանց քննարկումների, առանց որևէ մեկի կարծիքը հաշվի առնելու են մասնագիտությունների ցանկը որոշել։ Ինչպե՞ս է ստացվել, որ այս կամ այն բուհի ողջ ուսանողներից որևէ մեկը չի կարող օգտվել դրանից»,– Sputnik Արմենայի հետ զրույցում ասաց Մխիթարյանը։

Նրա խոսքով` մասնագիտությունների ընտրությամբ հաշվի չեն առնվել տնտեսության զարգացման առաջնահերթությունները։ Կրթության փորձագետը կարծում է` մի շարք մասնագիտությունների առջև փակում են դռները, քանի որ պարզ է`ուսանողները նախընտրելու են կրթությունը շարունակել այն ուղղությամբ, որտեղ հնարավոր կլինի ուսման վարձը փոխհատուցել։ Բացի այդ, հայաստանյան աշխատաշուկան ուսումնասիրված չէ. «Իսկ ո՞վ ասաց, որ հենց այդ մասնագիտություններն են անհրաժեշտ շուկային, ո՞ր ուսումնասիրության հիման վրա են նման եզրակացության եկել»։

Ըստ Մխիթարյանի` կա ռիսկ, որ ավելանան զուտ դիպլոմի համար մագիստրատուրա դիմողները. չի բացառվում նաև, որ ուսման վարձերի փոփոխություն լինի։ Այսինքն` այն մասնագիտությունները, որոնք ներառված չեն այդ ցանկում, ստիպված կլինեն նվազեցնել վարձավճարը, որպեսզի ուսանող ունենան, իսկ մյուսները կարող է նաև ավելացնեն վարձը, քանի որ դիմողների թիվը կավելանա։

Մասնագետը նշեց` նախագծի ամենամեծ թերությունն այն է, որ հայագիտական առարկաները ներառված չեն այդ ցանկում։ Մխիթարյանին հետաքրքրում է մեկ հարց` եթե ոչ ՀՀ–ն, ապա ո՞ր պետությունը պետք է խրախուսի հայագիտական մասնագիտություններով կրթությունը։ Նրա կարծիքով` այս հարցում կառավարությունը մտածելու տեղ ունի։

Նշենք, որ «ՀՀ հարկային օրենսգրքում լրացումներ կատարելու մասին» օրենքի նախագիծը, որով էլ ուսման վարձը հնարավոր է փոխհատուցել եկամտահարկով, հեղինակել են «Իմ քայլը» խմբակցության ղեկավար Լիլիթ Մակունցն ու պատգամավոր Սիսակ Գաբրիելյանը:

Իսկ թե որ մասնագիտություններով սովորողները կարող են օգտվել այս հնարավորությունից` ցանկին կարող եք ծանոթանալ այստեղ։

130
թեգերը:
Վալերի Բրյուսովի անվան պետական համալսարան, եկամտահարկ, Հայաստան
Ըստ թեմայի
Մաթեմատիկայի քննության արդյունքներն օնլայն չեն հրապարակվի
Ի՞նչ հարաբերությունների մեջ է Արայիկ Հարությունյանը Շիրակի մայր բուհի ռեկտորի ԺՊ-ի հետ
Բուհական խորհուրդներում այլևս պաշտոնյաներ չեն լինի
Դիահերձարանի տարածքում

Արսեն Թորոսյանի խոսնակն արձագանքել է համացանցում հրապարակված լուսանկարներին

162
(Թարմացված է 17:38 11.07.2020)
Դիահերձարանում, որտեղ հերձելու են, կորոնավիրուսի պատճառով մահացածներին, այժմ շինարարական աշխատանքներ են ընթանում։

ԵՐԵՎԱՆ, 11 հուլիսի – Sputnik. Համացանցում տարածվել են «Թոքաբանության ազգային կենտրոնի» տարածքում գտնվող դիահերձարանի շենքի հարակից տարածքի լուսանկարներ, որոնցով ներկայացվում է, որ տարածքը աղտոտված է, իսկ դիմակների ու ձեռնոցների համար աղբաման չկա։ ՀՀ առողջապահության նախարարի խոսնակ Ալինա Նիկողոսյանը Facebook–ում գրել է, որ այժմ տարածքը մաքուր պահվելուն ուղղված աշխատանքներ են ընթանում։

«Բայց չեմ կարող չարձանագրել, որ ամենուր փակցված են գրություններ՝ աղբը նախատեսված վայրում թափելու ցուցումով։ Սակայն, միևնույնն է, մարդիկ շարունակում են աղբը թափել չնախատեսված վայրում»,– նշել է նա։

Նիկողոսյանն ավելացրել է, որ այս պահին ընթանում են նոր դիահերձարանի շինարարական աշխատանքները, և այն ամենայն հավանականությամբ օգոստոսի 1-ից կսկսի գործել։

Այդ դիահերձարանում հնարավոր կլինի դիահերձել կորոնավիրուսային հիվանդությունից մահացած անձանց։

Նիկողոսյանը նույնպես լուսանկարներ է հրապարակել, որոնցում երևում է դիահերձարանի շենքի հարակից տարածքը, ինչպես նաև տարվող աշխատանքները։

Հիշեցնենք` մարտի 16–ից Հայաստանում արտակարգ դրություն է, որն արդեն մի քանի անգամ երկարաձգվել է և կտևի մինչև հունիսի 13–ը` ժամը 17։00–ը ներառյալ։ Երկարաձգված արտակարգ դրության պայմանները որոշակի փոփոխությունների են ենթարկվել։ Տնտեսական շատ գործունեություններ թույլատրվել են, բայց սահմանվել են պարտադիր պահանջներ։

Մայիսի 18–ից Հայաստանում աշխատում է նաև հասարակական տրանսպորտը, բայց ուղևորներն ու վարորդները պետք է անպայման պաշտպանիչ դիմակով ու ձեռնոցով լինեն։ Հանրային բաց տարածքներում դիմակ դնելը նույնպես պարտադիր է։

Դիմակ կարող են չդնել միայն մինչև 6 տարեկան երեխաները, հեծանիվ վարողները, ֆիզիկական վարժություններ անողները և խրոնիկ շնչառական հիվանդություններ ու սրտային անբավարարություն ունեցողները (վերջիններս պետք է իրենց մոտ ունենան համապատասխան հիվանդության փաստը հաստատող բժշկական փաստաթուղթ)։ Հուլիսի 6-ին ՀՀ վարչապետ Նիկոլ Փաշինյանը պարետատան նիստից հետո հայտնեց, որ հուլիսի 13-ին ավարտվող արտակարգ դրության ռեժիմը կերկարացվի ևս մեկ ամսով։

162
թեգերը:
դիահերձարան, Ալինա Նիկողոսյան, Հայաստան
Ըստ թեմայի
«Մեղավորները կստանան արժանի պատիժը». Գյումրիում մահացած կնոջ հարազատները բողոքում են
Կորոնավիրուսի մասին ապատեղեկատվություն տարածող կայքն աշխատել է ԱՄՆ փողերով
Դիահերձարանից կորած գյումրեցի տատիկի դին գտնվեց. Նաիրա Զոհրաբյանը մանրամասներ է հայտնում
 День Армии в Мемориальном комплексе Ераблур (28 января 2020). Еревaн

ՀՀ ոստիկանապետը ծառայողական քննություն է նշանակել իր նախորդին վերաբերող նյութերի հիման վրա

0
Քննությունն ավարտվել է և, համաձայն ոստիկանության հրապարակած արդյունքների, հաստատվել է, որ Արման Սարգսյանի հրամաններով անվանական զենքերով են պարգևատրվել ոստիկանության ոչ թե 51, այլ 7 ծառայողներ:

ԵՐԵՎԱՆ, 11 հուլիսի – Sputnik. ՀՀ ոստիկանության պետ Վահե Ղազարյանի՝ հուլիսի 7-ի հրամանով ծառայողական քննություն էր նշանակվել ոստիկանության նախկին պետ Արման Սարգսյանի վերաբերյալ մամուլում առկա որոշ տեղեկությունների վերաբերյալ: Ըստ ՀՀ ոստիկանության հրապարակած հաղորդագրության` քննության արդյունքում հաստատվել է, որ Արման Սարգսյանի հրամաններով ոստիկանության 7 ծառայողներ պարգևատրվել են անվանական զենքերով:

«Արձանագրվել է, որ հիշյալ ծառայողների զենքով պարգևատրումները հիմնավորված են, մասնավորապես՝ դրանք տրվել են ՀՀ ոստիկանությունում երկարամյա, օրինակելի և անբասիր ծառայության, ինչպես նաև ծառայողական պարտականությունները կամ հատուկ առաջադրանքները բարեխիղճ կատարած ծառայողներին, ինչը վկայում է, որ ՀՀ ոստիկանության պետի հրամանները բացառապես բխել են օրենսդրական պահանջներից և եղել են իրավաչափ»,- ասված է ոստիկանության հաղորդագրության մեջ:

Հիշեցնենք` այս պարգևատրման մասին մամուլում գրվել էր, որ պարգևատրվել են ոստիկանության 51 ծառայողներ, որոնց թվում՝ անձինք, որոնք ըստ կոչումների ենթակա չեն նման պարգևատրման: Նույն հրապարակման համաձայն` ՀՀ ոստիկանության նախկին պետ Ա. Սարգսյանն ու ոստիկանության պետի տեղակալներ Ա. Մարտիրոսյանն ու Հ. Մհրյանը 30 միլիոն դրամ են դուրս գրել ոստիկանության ծառայողներին հավելավճարներ վճարելու համար, բայց այդ գումարը ևս նպատակին չի ծառայել:

Ծառայողական քննության ընթացքում պարզվել է, որ այս տեղեկությունը ևս իրականությանը չի համապատասխանում:

«ՀՀ ոստիկանության գաղտնագրված ծառայողների աշխատանքի վարձատրությունը յուրաքանչյուր ամիս կատարվում է օրենսդրությամբ սահմանված կարգով, ժամկետներում և չափով, ու ամենևին համեմատելի չէ հրապարակված գումարի հետ»,- նշված է ոստիկանության հաղորդագրության մեջ:

Քննության ընթացքում վճարումների բոլոր հասցեատերերը հայտնաբերվել են:

Իսկ ապատեղեկատվություն հրապարակած կայքի տնօրենն ասել է, որ հրապարակման հետ կապված հանցագործության վերաբերյալ հաղորդում ներկայացնել չի ցանկանում, հիշյալ տեղեկություններն ապացուցող փաստական տվյալներ չի կարող ներկայացնել, նշված տեղեկությունն էլ հրապարակել է կայքի նկատմամբ հետաքրքրությունը մեծացնելու ակնկալիքով:

Հիշեցնենք՝ Արման Սարգսյանը ՀՀ ոստիկանության պետի պաշտոնից ազատվել էր ՀՀ վարչապետի՝ հունիսի 8-ի հրամանով: Նույն օրը նրան այդ պաշտոնում փոխարինել էր ներկայիս ոստիկանապետ Վահե Ղազարյանը:

0