«Հայ միասնության խաչ» մանկական կենտրոն

Որպեսզի երկիրը չլքեն. Էջմիածնում երեխաների համար համակարգչային դասընթացներ են կազմակերպում

264
(Թարմացված է 21:20 21.03.2019)
Արմավիրի մարզի քաղաքների և գյուղերի երեխաները կարող են անվճար ուսումնասիրել ծրագրավորման և ինժեներիայի հիմունքները, ինչպես նաև համակարգչային ավելի դժվար լեզուներ։

ԵՐԵՎԱՆ, 21 մարտի — Sputnik. Էջմիածնի «Հայ միասնության խաչ» մանկական կենտրոնում դպրոցականների համար համակարգչային դասընթացներ են կազմակերպվում։ Այստեղ կարող են սովորել այն երեխաները, որոնք արդեն ունեն համակարգչային սկզբնական գիտելիքներ, տիրապետում են Scratch ծրագրավորման լեզվի (այդ թվում` դրանով խաղեր են գրում), կարողանում են կառավարել 3D տպիչներն ու ծրագրային կառավարմամբ ուսումնական հաստոցները, ինչպես նաև ռոբոտների պարզ մոդելներ են նախագծում։

Իսկ նոր լաբորատորիայում ապագա ծրագրավորողներին կսովորեցնեն Python ծրագրավորման լեզուն, HTML5 վեբ–դիզայնի լեզուն, MySQL տվյալների բազաների կառավարման համակարգի հետ աշխատելու հմտությունները և մի շարք այլ բաներ։

Նորարարական կենտրոնում ընդհանուր առմամբ մոտ 350 երեխա կա` չհաշված կենտրոնի մյուս խմբակները` ավանդական արհեստներ, պարեր, գորգագործություն... Այստեղ երեխաներին անվճար են ընդունում, իսկ ծրագրերն աշխատում են դոնորների աջակցմամբ։ Մեկ վերապահումով` կուսակցություններից նվիրատվություններ չեն վերցնում։

«Մենք ոչ միայն Էջմիածնից, այլև ամբողջ Արմավիրի մարզից ենք երեխաների ընդունում։ Աշխատում ենք սոցիալապես խոցելի ընտանիքների և հաշմանդամություն ունեցող երեխաների վերցնել։ Սակայն ընդունում ենք բոլորին», – ասում է մանկական կենտրոնի տեխնոլոգիական խմբակների համակարգող Վարդուհի Կարապետյանը։

Կենտրոնում երեխաներին ուզում են ցույց տալ, թե որքան կարևոր են գիտելիքն ու ապագա մասնագիտությունը Հայաստանի համար։

«Իսկ ծրագրավորման և ինժեներիայի գիտելիքներն օգնում են նրանց ամբողջ աշխարհում հայկական մտքի դեսպան լինել», – նշում է Կարապետյանը։

Լաբորատորիայի խմբակավարների մեծ մասը Էջմիածնից են, ոմանք կենտրոնի նախկին սաներն են։

Նոր լաբորատորիայի բացմանն աջակցել է UMCOR (United Methodist Committee on Relief) ընկերությունը և Արմավիրի մարզում գործող Arpinet ինտերնետ կապի մատակարարը։ Կենտրոնի բացմանը հյուրեր կային նաև Ռուսաստանի դեսպանատնից։

264
թեգերը:
Հայաստան
Ըստ թեմայի
Դպրոցներում կսահմանափակեն համացանցը. որոշ կայքեր կարգելափակվեն
Երևանում 6 դպրոց կքանդեն
Դպրոցական պայուսակները երկու անգամ թեթև կլինեն. նախարար