ԵՐԵՎԱՆ, 21 մարտի — Sputnik. Տաջիկստանի մի քանի քաղաքացի այսօր կրկին հավաքվել են Հայաստանի կառավարության շենքի դիմաց` պահանջելով ստիպել գործարար Գագիկ Խաչիկյանին մարել իրենց պարտքը։
Առաջին անգամ նրանք բողոքի ակցիա են անցկացրել մարտի 7–ին։ Սակայն, ինչպես պնդում է աշխատակիցների մեկը` Խայրուլո Աբդուլովը, դրանից հետո նրանց խնդիրները չեն լուծվել։
Հիշեցնենք, որ Տաջիկստանի 12 քաղաքացի անցած տարվանից աշխատել են Հայաստանում` որպես բամբակ աճեցնելու մասնագետներ։ Նրանց այստեղ բերել է Խաչիկյանը, որը 20 տարի ապրել Տաջիկստանում և զբաղվել բամբակագործությամբ։ Արդյունքում նա որոշել է նման գործ բացել հայրենիքում` այստեղ հրավիրելով Տաջիկստանի քաղաքացիներին, որոնք հիմա պնդում են, որ գործարարը խաբել է նրանց։
Աբդուլովի խոսքով` ընդհանուր առմամբ Խաչիկյանն իրենց պարտք է 15 հազար դոլար։ 12 հոգուց Հայաստանում այս պահին հինգն են։ Մնացածը հեռացել են` չսպասելով աշխատավարձին։
«Կառավարությունն առայժմ ոչինչ չի ձեռնարկում։ Մարտի 7–ին ենք այստեղ եղել, մեզ հետ հանդիպեց աշխատողներից մեկը (կառավարության` խմբ.), տվեց իր հեռախոսահամարը և ասաց, որ գանք հաջորդ օրը։ Մենք եկանք, նրան չգտանք։ Եվ հիմա չգիտենք` ինչ անել, ուր գնալ», – ասաց Աբդուլովը Sputnik Արմենիայի թղթակցի հետ զրույցում։
Մեր զրուցակիցը չի հիշում պաշտոնյայի անունը։ Տաջիկստանի քաղաքացիներն աշխատել են Հայաստանում անցած տարվա մայիսից։ Ինչպես հավաստիացնում են, վարձատրվել են միայն աշխատանքի առաջին երկու ամիսների համար։
Դեռ մարտի 7–ին Խաչիկյանի ներկայացուցիչներից մեկը` Լուսինե անունով մի աղջիկ, Sputnik Արմենիայի հետ հարցազրույցում հայտարարել էր, որ ընկերությունը մի փոքր պարտք է մնացել մնացած աշխատակիցներին, սակայն այդ պարտքը շատ ավելի քիչ է, քան հիշատակված 15 հազար դոլարը։ Ինչ վերաբերում է վաստակած գումարին` ընկերության ներկայացուցիչը հայտնել է, որ գնացած տաջիկները ստացել են իրենց հասանելիք ամբողջ գումարը, ու տաջիկ աշխատակիցների ստորագրած համապատասխան հաշվապահական փաստաթղթերը հաստատում են դա։
