Ուսանողներ

Ուսանողներին կթույլատրե՞ն ուսման վարձը վճարել ամիս առ ամիս. նախագիծը մտավ ԱԺ օրակարգ

117
Ազգային ժողովի «Բարգավաճ Հայաստան» խմբակցության պատգամավոր Տիգրան Ուրիխանյանի նախաձեռնությունն ուղղված է ուսանողների սոցիալական ու ֆինանսական դժվարությունները մեղմելուն:

ԵՐԵՎԱՆ, 4 մարտի – Sputnik. Հայաստանյան բուհերի ուսանողներին հնարավորություն կընձեռվի ուսման վարձը վճարել ամսական կտրվածքով: Այս առաջարկության հեղինակը Ազգային ժողովի «Բարգավաճ Հայաստան» խմբակցության պատգամավոր Տիգրան Ուրիխանյանն է:

«Գործող օրենսդրությունը չի արգելում վճարովի հիմունքներով սովորողներին ամսական տարաժամկետմամբ վճարումներ կատարել, բայց օրենքի այդպիսի պահանջ չկա, և ուսանողները կարող են նման հնարավորություն ստանալ, եթե գրավոր դիմեն ուսումնական հաստատության ղեկավարությանը: Դիմումը կարող է բավարարվել կամ չբավարարվել»,- ԱԺ Գիտության, կրթության, մշակույթի, սփյուռքի, երիտասարդության և սպորտի հարցերի հանձնաժողովի նիստում ներկայացնելով «Կրթության մասին» ՀՀ օրենքում իր առաջարկած փոփոխությունը` ասաց Ուրիխանյանը:

Նրա համոզմամբ` ամսական կտրվածքով վճարելու իրավունքը հնարավորություն կտա որոշակիորեն մեղմել սոցիալապես անապահով ուսանողների ֆինանսական դրությունը:

Ուրիխանյանն անդրադարձավ նաև իր առաջարկի մասին կառավարության հնչեցրած այն կարծիքին, թե ուսանողները նման հարցով դիմելու դեպքում երբեք մերժում չեն ստանում և պնդեց. «Նման դեպքեր եղել են»:

Նա խոստացավ օրինագծի քննարկման ժամանակ ԱԺ լիագումար նիստում ներկայացնել նաև այն ուսանողների անունները, որոնք ուսման վարձի տարաժամկետ վճարման իրավունքից զրկվելու հետևանքով դուրս են մնացել բուհերից:

«Այս ընթացքում ես 400 դիմում եմ ստացել: Սա շատ պահանջված նախաձեռնություն է»,- ասաց Ուրիխանյանը` հիշեցնելով, որ նախաձեռնությունն արդեն մեկ անգամ ներառվել է ԱԺ նիստի օրակարգում, բայց չի ընդունվել:

ԱԺ 6-րդ գումարման նիստերի օրակարգում ընդգրկված նախագիծն ամիսներ առաջ չէր ընդունվել քվորումի բացակայության պատճառով, քանի որ խորհրդարանական ուժերը 2018թ-ի աշնանը բոյկոտում էին խորհրդարանի աշխատանքն ու չէին ներկայանում նիստերի: ԱԺ Գիտության, կրթության, մշակույթի, սփյուռքի, երիտասարդության և սպորտի հարցերի հանձնաժողովն այսօր հավանության արժանացրեց Ուրիխանյանի նախագիծը, և այն առաջիկայում դարձյալ կներառվի ԱԺ լիագումար նիստերի օրակարգում:

117
թեգերը:
ԱԺ, Հայաստան
Ըստ թեմայի
Մարիա՛մ, դու կարող ես, կամ ինչպես աղջկան հաջողվեց մի քանի աշխատանք ունենալ առանց կրթության
Ուսման վարձի զեղչ՝ ապրիլյան պատերազմին մասնակցած ուսանողների համար
Որքան աշխատավարձ են ստանում կրթության ոլորտի աշխատակիցները
Հաշվապահները հափշտակել են ԵՊՀ-ի ուսանողների ուսման վարձերը
Վարպետության դասընթաց ուսանողների համար, կամ ԵՊՀ–ում նաև լսարաններից դուրս են սովորում