Արթուր Մեսչյան

«Հանգիստ քնում եմ». Արթուր Մեսչյանն ասաց, թե ինչի վրա է ծախսել պարգևավճարը

420
Երևանի գլխավոր ճարտարապետ Արթուր Մեսչյանը խոսեց քաղաքապետարանի աշխատակիցներին պարգևավճարներ տրամադրելու մասին։

ԵՐԵՎԱՆ, 24 հունվարի — Sputnik. Գլխավոր ճարտարապետ Արթուր Մեսչյանը տարեվերջին ստացած իր պարգևավճարը ծախսել է բարեգործության վրա։ Այս մասին Մեսչյանը հայտարարեց մամուլի ասուլիսի ժամանակ` մեկնաբանելով Sputnik Արմենիայի թղթակցի հարցը` քաղաքապետարանի աշխատակիցներին մոտ մեկ միլիոն դոլար պարգևավճար տալու մասին։

Ավելի վաղ հայտնի է դարձել, որ Երևանի քաղաքապետարանը Ամանորից առաջ 474 միլիոն դրամ պարգևավճար է տրամադրել աշխատակիցներին։ Պարգևավճար են ստացել քաղաքապետարանի 1628 աշխատակից, սակայն քաղաքապետ Հայկ Մարությանն իրեն պարգևավճար չի գրել։

«Ստույգ չգիտեմ, թե որքան են ինձ անձամբ փոխանցել որպես պարգևավճար, բայց գիտեմ, թե ինչ եմ արել այդ գումարը։ Ծախսել եմ բարեգործական նպատակներով, բայց չեմ մանրամասնի, թե որտեղ և ինչպես։ Այդ միջոցներն ինչպես եկել են, այդպես էլ գնացել են», – ասաց Մեսչյանը։

Գլխավոր ճարտարապետը նաև հայտարարեց, որ «թավշյա հեղափոխությունից» հետո Երևանի քաղաքապետարանում իսկապես իրավիճակ է փոխվել։ Աշխատակիցները սկսել են ավելի շատ ու ավելի երկար աշխատել, երբեմն մնում են մինչև ուշ գիշեր։ Եվ եթե քաղաքապետարանը հնարավորություն ունի տրամադրել 13–րդ աշխատավարձ կամ պարգևավճար, ապա դրանում ոչ մի վատ բան չկա։

«Իմ սոցիալական վիճակն այս պարգևավճարից հետո չի փոխվել, ապրում եմ մեկսենյականոց բնակարանում, վարում եմ 1994թ–ի ավտոմեքենա։ Ես հանգիստ եմ քնում», – նշեց Մեսչյանը։

Քաղաքի գլխավոր ճարտարապետը համաձայն է, որ մարզերում և մայրաքաղաքում խոշոր պարգևավճարներ բաժանելու խնդրում որոշ հարցեր ծագում են, բայց, նրա կարծիքով, եթե խորանալ թեմայի մեջ և ուսումնասիրել տարբեր գերատեսչությունների աշխատանքը, ապա այդ որոշումը հասկանալի կդառնա։

«Ես ուրախ կլինեի, եթե մարդիկ ստանային ոչ միայն 12–րդ, այլ նաև 20–րդ աշխատավարձ։ Դրանում ոչ մի խնդիր չեմ տեսնում», – եզրափակեց ճարտարապետը։

Հիշեցնենք` արդեն մի քանի օր է, ինչ մամուլում տեղեկություններ են հրապարակվում տարբեր պետական հիմնարկներում, մարզպետարաններում, Երևանի քաղաքապետարանում 2018թ.–ի դեկտեմբերի վերջին տրված պարգևավճարների ու 13-րդ աշխատավարձերի մասին։

420
թեգերը:
Երևան
Ըստ թեմայի
Հայկ Մարությանը պարգևատրել է ոչ միայն քաղաքապետարանի աշխատակիցներին
Դավոսը մի կողմ. Փաշինյանն անդրադարձել է Հայաստանում պարգևավճարներ բաժանելուն
Պարգևավճարների շուրջ սկանդալը թեժանում է. Պետեկամուտների կոմիտեն հերքում է լուրերը