Արթուր Դանիելյան և Նարեկ Մալյան

Սկանդալ «ադեկվատների» մասնակցությամբ. բլոգերներն իշխանությանն են մեղադրում

169
Բլոգերները հոկտեմբերի 11-ին Մարալիկում իրենց հաղորդման հերթական թողարկում էին նկարահանում, երբ նրանց մոտեցավ երիտասարդների մի խումբ ու պահանջեց դադարեցնել ապատեղեկատվություն տարածելը՝ իրենց պահանջները ուղեկցելով տարատեսակ վիրավորանքներով։

ԵՐԵՎԱՆ, 12 հոկտեմբերի — Sputnik. Իշխանամետ ակտիվիստների ու ընդդիմադիր բլոգերների մասնակցությամբ միջադեպը Մարալիկում լավ ծրագրավորված ակցիա էր, որն ուղղված էր խոսքի ազատության ու այլընտրանքային տեսակետի ճնշմանը։ Այս մասին այսօր մամուլի ասուլիսի ժամանակ ասացին Facebook-ով հեռարձակվող «ԱդեկվաԴ» ծրագրի հեղինակներ Արթուր Դանիելյանն ու Նարեկ Մալյանը։ Հաղորդումն, ընդհանուր առմամբ, ուղղված է կառավարության գործողությունների ու Նիկոլ Փաշինյանի քննադատությանը։

Բլոգերները հոկտեմբերի 11-ին Մարալիկում իրենց հաղորդման հերթական թողարկումն էին նկարահանում, երբ նրանց մոտեցավ երիտասարդների մի խումբ ու պահանջեց դադարեցնել ապատեղեկատվություն տարածելը՝ իրենց պահանջներն ուղեկցելով տարատեսակ վիրավորանքներով։

Քաշքշուկ է սկսվել, որի հետևանքով տուժել է նկարահանման խմբի տեխնիկան, թեև գործը լուրջ կռվի չի հասել։ Բլոգերների խոսքով՝ լուրջ ծեծից հաջողվել է խուսափել իրենց գրագիտության ու չափված- ձևած գործողություների, նաև ոստիկանության օպերատիվության շնորհիվ։ Նրանք շնորհակալություն են հայտնում ոստիկաններին` օպերատիվ միջամտության ու ադեկվատ պահվածքի համար։

Պատասխանելով Sputnik Արմենիայի հարցին՝ Մալյանը բացառեց, որ այդ միջադեպը կարող էլ լինել այս երիտասարդների ինքնագործունեությունը։ Ու թեև ոստիկանությունը, ինչպես իրենք են նշում, զգոնություն ու պրոֆեսիոնալիզմ է դրսևորել, աղմկահարույց ծրագրի հեղինակները վստահ են, որ այդ ամենի հետևում իշխանություններն են կանգնած։

«Ըստ երևույթին՝ նրանք վարչապետ Նիկոլ Փաշինյանի խուլիգաններն էին, որովհետև մեզ հակահեղափոխական էին անվանում։ Մենք ունենք փաստեր, որոնք հաստատում են դա։ Նրանք որպես մարալիկցի էին ներկայանում, սակայն մարալիկցիների հետ կապ չունեին։ Մենք համոզվեցինք  դրանում՝ սովորական քաղաքացիների հետ շփվելով։ Նրանք բոլորը նորմալ, ադեկվատ մարդիկ են, որոնք նայում են մեր հաղորդումն, իսկ շատերը համաձայն են մեզ հետ»,- ասաց Մալյանը։

Տվյալ պահին միջադեպի առթիվ քրեական գործ դեռ հարուցված չէ, սակայն նրանք հայտնեցին, որ նյութեր են պատրաստվում։ Բլոգերները հույս ունեն, որ իրավապահ մարմիններն այս գործին ընթացք կտան` ենթադրելով, որ հետաքննությամբ կզբաղվի Քննչական կոմիտեն։

«Մեզ ստիպում են լռել, քանի որ այսօր մենք Նիկոլ Փաշինյանի ակտիվ քննադատներն ենք։ Նա սոցցանցերում մեր դեմ ֆեյքերի մի ամբողջ բանակ է օգտագործում», - ավելացրեց Մալյանը։

Նշենք, որ մինչ իշխանափոխությունը Նարեկ Մալյանը ՀՀ նախկին ոստիկանապետ Վլադիմիր Գասպարյանի խորհրդատուն էր։

169
թեգերը:
Հայաստան
Ըստ թեմայի
Մարալիկում «բացել են» Թալեաթի գլուխը
Վարչապետի վերահսկողական ծառայությունն ուսումնասիրություններ կիրականացնի Մարալիկում