ԵՐԵՎԱՆ, 1 սեպտեմբերի — Sputnik. Սոչիի օդանավակայանում հրդեհված ինքնաթիռը սոցցանցերում բուռն քննարկումների թեմա է դարձել։
Լուրն այնքան անսպասելի է եղել, որ սկզբում ոչ բոլորն են հավատացել։
«Ֆեյք է։ Ինձ միանգամից կզանգեին», — գրել է օգտատեր Պավել Պավլովը, որը Ադլերի հիվանդանոցի բաժանմունքներից մեկի վարիչն է։
Սակայն շուտով մարդիկ համոզվել են, որ տեղեկությունը սուտ չէ։
Ինքնաթիռի վայրէջքի ժամանակ Ադլերում հորդառատ անձրև է տեղացել և սաստիկ քամի է եղել։
«Ինչպե՞ս կարող էին կարգավարները թույլ տալ, որ ինքնաթիռը վայրէջք կատարի։ Պետք էր Կրասնոդար գնալ», — գրել են օգտատերերից մի քանիսը։
«Կրասնոդարում նույն եղանակն էր», — գրել է մեկ այլ օգտատեր Sergey Selvyan-ը։
Ինքնաթիռի ուղևորներից մեկը պատմել է միջադեպի մասին։ Նրա խոսքով՝ Ադլերում վայրէջք կատարող մյուս օդանավերը պահեստային օդանավակայաններ են ուղարկել։
«Արագության պատճառով թռիչքուղին չբավականացրեց, պարիսպից այն կողմ անցանք, Մզիմտայի մեջ ընկանք, ձախ շարժիչն այրվեց, երկու թևն էլ մաս-մաս պոկվեցին։ Լավ է՝ հոսանքն ուժեղ էր, տարավ կերոսինը», — պատմում է ականատեսը։
Հրդեհի բռնկումից կես ժամ անց կրակը մարեցին։
«Շատ բան չեմ նկարագրի, կազմակերպվածության մակարդակը նույնիսկ երկուսի չէր ձգում», — ավելացնում է նա։
Պատմությունը հայտնվել է համացանցում ու զարմացրել բոլորին։ «Պետք է շնորհակալ լինել աստծուն, որ ողջ եք մնացել, որ հրշեջները կես ժամվա ընթացքում կարողացել են մարել հրդեհը, ինքնաթիռը ծովի մեջ կամ բնակելի թաղամասի վրա չի ընկել։ Հրաշքներ լինում են, ու նրանց հետ հենց հրաշք է պատահել։ Իսկ մարդը գործողության կազմակերպումը «2» է գգնահատում․․․ խոսքեր չկան», — գրում է օգտատերերից մեկը։
Հիշեցնենք՝ այսօր գիշերը Սոչիի օդանավակայանում Մոսկվայից ուղևորվող Utair ավիաընկերության ինքնաթիռում հրդեհ է բռնկել։ ՌԴ առողջապահության նախարարությունը հայտնել է, որ տուժել են 18 մարդ, երեքը երեխաներ են։ Զոհեր չկան։
