Մխիթարյանը հորս «ստիպում է» մոռանալ «Մանչեսթերին». լոնդոնցի լրագրողի պատմությունը
(Թարմացված է 18:47 19.08.2018)
Արմեն Ղազանչյանը կորցնում է հիշողությունը, բայց երբ էկրանին հայտնվում է Հենրիխը, հիվանդությունը չքվում է։ԵՐԵՎԱՆ, 19 օգոստոսի — Sputnik. Նոր խաղաշրջանի առաջին երկու խաղերում «Արսենալը» պարտվեց։ Սակայն «Չելսիի» հետ երկրորդ խաղում Մխիթարյանը գոլ խփեց և գոլային փոխանցում արեց։ Ոմանց համար սա թույլ սփոփանք է, սակայն այս երկու պահերը երկարացրին Արմեն Ղազանչյանի կյանքը։
Նրա որդին` լոնդոնցի լրագրող Ռոբերտը, պատմում է` ինչպես և ինչու։
Ամբողջ կյանքում Արմենը երկրպագել է «Մանչեսթերին», կապ չունի` որտեղ է ապրել` Կահիրեում, Նիկոսիայում, Բեյրութում, թե Լոնդոնում։ Մանչեսթերի երկրպագու է դարձրել նաև որդուն։ Բայց այժմ երկուսն էլ երկրպագում են «Արսենալին»։
«Ավելորդ է բացատրել` ինչու։ Մոուրինյոն Մխիթարյանին թիմից հանեց։ Հմուտ մարզչի սթափ հաշվարկով նա ամեն ինչ ճիշտ էր անում։ Սակայն մեզ համար Մանչեսթերը Անգլիայում փրկօղակ է, որը թույլ չի տալիս մեզ այստեղ օտար զգալ։ Եվ ահա մեր հիանալի թիմից հանեցին մեր Մխիթարյանին… Սա մեզ համար դավաճանություն էր։
Հիշում եմ` 2016 թվականի ամռանն էր… Ասել, թե հիացած էինք, նշանակում է` ոչինչ չասել։ Մեր «Կարմիր սատանաները» Մխիթարյանի հետ պայմանագիր ստորագրեցին։ Նա դեռ «Բորուսիայում» էր մեզ գերել, երբ դիտում էինք «Տոտենհեմի» հետ խաղերը Եվրոպայի Լիգայում։ Դրանից հետո մեր երազանքներում նա ընկերներին փոխանցումներ էր անում կարծես ափսեի վրա, սակայն արդեն մեր` կարմիր շապիկով։ Եվ ահա երազանքն իրականություն դարձավ։
Ահա նրա առաջին խաղը յուրայինների թիմում։ Հենրիխը «Տոտենհեմի» պաշտպանի մեջքի հետևից հասավ գնդակին, վազեց դարպասի մոտ և խփեց մարզաձողի տակ։ Ես ու հայրս արտասվեցինք։ Եվս մի քանի ամիս անց Հենրիխը ցուցադրեց իր անհավանական կարիճի հարվածը` բերանքսիվայր ընկնելով։
Այդ ժամանակ բազկաթոռին նստած հայրիկս եկավ մի եզրակացության։ Ֆուտբոլը հայերն են հորինել։ Այս ձեռքբերումը նա միացրեց նախորդներին` լահմաջո, նարդի և քրիստոնեություն։ Հավանաբար հայերիս սովորությունն է այդպիսին։ Եվ ոչ թե այն պատճառով, որ մենք աշխարհի ամենահզոր ժողովուրդն ենք։ Այլ որ մենք ուզում ենք կրկին ու կրկին ապացուցել ինքներս մեզ, որ մենք կանք։
Ու նաև այն պատճառով, որ հայրս դանդաղ կորցնում է հիշողությունը։ Նա դժվարությամբ է հիշում նույնիսկ ամենալարված խաղը, որը տեսել է մեկ կամ երկու ժամ առաջ։ Եթե դաշտում Հենրիխը չի խաղում։ Իսկ երբ նա կա, հայրիկս հանկարծ առաջվանն է դառնում։ Վայրկյան առ վայրկյան կարող է պատմել նրա հետ կապված բոլոր պահերը։ Այդպիսին եմ հիշում հայրիկին, երբ նա մշտապես գալիս էր իմ դպրոցական խաղերին և ինձնից աչքը չէր կտրում, իսկ ես ընկնում էի ցեխի մեջ և կրկին ոտքի կանգնում։ Այժմ նա հիշել է Հենրիխի համարը` 22, և սկսել է ապացուցել, որ խաղացողներից շատերն են այդ համարը վերցնում` ի նշան նրա խաղի նկատմամբ ունեցած հարգանքի։
Գուցե Արսենալում նրա 7 համարի մասին էլ շուտով այդպես կպնդի, դրական հիմնավորումներով։ Հայրիկ…
Մեկը մյուսի հետևից մոռանում է այն, ինչ նախկինում կարողանում և սիրում էր։ Բայց երբ Հենրիխը խաղադաշտ է դուրս գալիս, նա կարծես հայրիկի ձեռքից բռնում ու մթությունից դուրս է բերում»։
թեգերը:
«Անցնելու ենք Փաշինյանի ճանապարհով». Գյումրիից քայլերթով գալիս են Երևան. տեսանյութ
(Թարմացված է 15:50 03.03.2021)
Քայլերթի մասնակիցները Նիկոլ Փաշինյանին խորհդանշական ճամպրուկ են բերում։ Պատրաստավում են մարտի 5-ին հասնել Երևան։ԵՐԵՎԱՆ, 3 մարտի – Sputnik, Արմենուհի Մխոյան. Մարտի 3-ին` ժամը 11:00-ին, Գյումրիում մեկնարկել է ֆլեշմոբ-քայլերթ՝ ՀՀ վարչապետ Նիկոլ Փաշինյանի հրաժարականի պահանջով: Նախաձեռնության համահեղինակ իրավաբան Կարապետ Պողոսյանը Sputnik Արմենիայի հետ զրույցում հայտնեց, որ ինքն ու դերասան Մկրտիչ Վարդանյանը պատրաստվում են անցնել այն ճանապարհով, որով Փաշինյանը երեք տարի առաջ Գյումրիից եկել է Երևան, հասնել մայրաքաղաք ու խորհրդանշական իրեր փոխանցել ՀՀ վարչապետին։
Պատերազմին մասնակցած եզդիները միացել են Փաշինյանի հրաժարականի պահանջին. Այսեր Իսոյան
Նշենք, որ քայլերթից առաջ Պողոսյանն ու Վարդանյանը խորհրդանշական ակցիա են իրականացրել՝ Նիկոլ Փաշինյանի ուսապարկը խորհրդանշող պայուսակից հանելով իրեր՝ փուչիկ, ծաղրածուի և բժշկական դիմակներ, կախարդական փայտիկ, նոթբուք, ելակ, նուռ, Հայաստանի քարտեզը, Ադրբեջանի նախագահ Իլհամ Ալիևի նկարը։ Նրանք վստահեցրին, որ հենց այս ամենն էր Փաշինյանն իր հետ բերել Երևան։
Ֆլեշմոբի մասնակիցները նշեցին, որ այդ ամենից բացի, իրենք այլ իրեր էլ են տանելու Փաշինյանին` պարան, օճառ, մարզական կոշիկներ, հերոս տղաների շիրիմների լուսանկարը և այլն:
Մի շարք քաղաքացիներ էլ առաջարկել են պայուսակում ավելացնել նաև 2020 թվականին իմքայլականների նախաձեռնված «Սահմանադրական» հանրաքվեի «Այո» քարոզչության բուկլետը, «Հպարտ քաղաքացու անձնագիրը», Շուշիի տան բանալիներ և այլն։
«Հենց նույն ճանապարհով, որով 2018 թվականին Փաշինյանը Գյումրիից շարժվել է Երևան, մենք ենք անցնելու, լինելու ենք նույն բնակավայրերում, փորձելու ենք հասկանալ մարդկանց դիրքորոշումը, լսել նրանց կարծիքները։ Ամենայն հավանականությամբ, արդեն ուրբաթ օրը ճամպրուկը կհասցնենք կառավարություն», - ասաց Կարապետ Պողոսյանը` քաղաքացիներին հորդորելով միանալ իրենց:
Sputnik Արմենիայի տեղեկություններով` նրանք արդեն հասել են Սպիտակ։
Սպիտակի ղեկավարը միանում է Փաշինյանի հրաժարականի պահանջին և աջակցում ԳՇ–ին
Մահացել է համաշխարհային ճանաչում ունեցող թավջութակահար Մեդեա Աբրահամյանը
(Թարմացված է 14:57 03.03.2021)
Աբրահամյանն առաջին թավջութակահարն էր, որ պատուհան բացեց դեպի միջազգային հեղինակավոր բեմեր:
ԵՐԵՎԱՆ, 3 մարտի -Sputnik. Մահացել է հայտնի թավջութակահար, ՀԽՍՀ ժողովրդական արտիստ Մեդեա Աբրահամյանը: Այս մասին հայտնել է Արամ Խաչատրյանի տուն-թանգարանի տնօրեն Արմինե Գրիգորյանը:
Նշենք, որ Մեդեա Աբրահամյանի նվագացանկում ընդգրկված է եղել թավջութակի ավելի քան 300 ստեղծագործություն, որոնցից շուրջ 120-ը գրված հենց նրա համար և նվիրվել են նրան։ Նրա լեգենդար անունն այսօր դարձել է դասական կատարողական արվեստի խորհրդանիշ:
Աբրահամյանն առաջին թավջութակահարն էր, որ պատուհան բացեց դեպի միջազգային հեղինակավոր բեմեր:
Նրան ծափահարել են աշխարհի բազմաթիվ երկրներում՝ Ամերիկայի Միացյալ Նահանգներում, Կանադայում, Ֆրանսիայում, Գերմանիայում, Իսլանդիայում, Արգենտինայում, Ուրուգվայում, Սիրիայում, Լիբանանում, Կորեայում, Ռումինիայում, Հունգարիայում, Բուլղարիայում, Լեհաստանում, Բելգիայում, Լյուքսեմբուրգում, նախկին խորհրդային հանրապետություններում և այլ երկրներում։
Մեդեա Աբրահամյանն արժանացել է բազմաթիվ մրցանակների, դրանք են`
- Պրահայի Հ. Վիհանի անվան թավջութակահարների միջազգային մրցույթի դափնեկիր (երկրորդ մրցանակ), 1955
- Հայաստանի երիտասարդության առաջին փառատոնի դափնեկիր (առաջին մրցանակ), 1957
- Մոսկվայի երաժիշտ-կատարողների համամիութենական մրցույթի դափնեկիր (առաջին մրցանակ), 1961
- ՀԽՍՀ վաստակավոր արտիստ, 1963
- Բուլղարիայի Ռուսե քաղաքի պատվավոր քաղաքացի, 1968
- ՀԽՍՀ պետական մրցանակ, 1973
- ՀԽՍՀ ժողովրդական արտիստ, 1980
- Երևանի Կոմիտասի անվան պետական կոնսերվատորիայի պրոֆեսոր, 1983
- ԽՍՀՄ Գերագույն խորհրդի նախագահության կողմից «Աշխատանքի վետերան» մեդալ, 1987
- Հայ արվեստի ասպետ, 2007
- «Հայրենիքին մատուցած ծառայությունների համար» 1-ին աստիճանի մեդալ, 2012
- ՀՀ վարչապետի ոսկե հուշամեդալ, 2016
- «Նաիրի» համահայկական երաժշտական փառատոնի գլխավոր մրցանակ «Դասական լարային նվագարաններ» անվանակարգում, 2017[6]
- Հայաստանի երաժշտական ընկերության «Կոմիտաս» հուշամեդալ, 2018
1956 թվականից մինչև 1990-ական թվականների վերջը Մեդեա Աբրահամյանը եղել է Հայֆիլհարմոնիայի մենակատար։
Պուտինը, Լավրովն ու Շոյգուն գերիների հարցում հետևողական են. ՀՀ ԱԳ նախարար
(Թարմացված է 17:13 03.03.2021)
ՀՀ ԱԳ նախարարը նաև հավելեց, որ հարցը հատուկ ընդգծել է ԵԱՀԿ ՄԽ համանախագահների զրույցների մակարդակում։ԵՐԵՎԱՆ, 3 մարտի - Sputnik. Գերիների վերադարձի հումանիտար, կարևորագույն հարցի քաղաքականացումն անընդունելի է։ Այսօր ԱԺ–ում կառավարության հետ հարցուպատասխանի ժամին այս մասին ասաց ՀՀ ԱԳ նախարար Արա Այվազյանը`անդրադառնալով Ադրբեջանի նախագահի այն հայտարարությանը, թե Ադրբեջանը հայ բոլոր գերիներին վերադարձրել է։ Իսկ այդ երկրում մնացած անազատության մեջ գտնվող մյուս անձինք հանցագործներ են` դիվերսանտներ։
Այվազյանը շեշտեց, որ Ալիևի հայտարարության անընդունելիությունն արդեն հաստատվել է նաև տարբեր միջազգային կառույցների կողմից։
«Հավանաբար տեղյակ եք, որ տարբեր երկրների, միջազգային կառույցների ղեկավարներն արդեն ավելացնում են այս հարցով միջազգային ճնշումն Ադրբեջանի վրա։ Վերջինը` երեկ Իտալիայի խորհրդարանը նույնպես ընդունել է բանաձև` կոչ անելով Ադրբեջանին անհապաղ լուծում տալ այս հումանիտար կարևորագույն հարցին»,– ասաց Այվազյանը։
Ագ նախարարը նաև հայտնեց, որ գերիների վերադարձի համար հայկական կողմն օգտագործում է բոլոր խողովակները` հատկապես կարևորելով տարածաշրջանում ՌԴ–ի ունցած կարևոր դերակատարումը։
«Սկսած նախագահ Պուտինի, ԱԳ նախարար Սերգեյ Լավրովի, պաշտպանության նախարար Սերգեյ Շոյգուի միջոցով անմիջական շփումներ են տեղի ունենում այս հարցի ուղղությամբ, և ռուսական կողմը հետևողականորեն բարձրացնում է այդ հարցը Ադրբեջանի ղեկավարության մոտ»,– ասաց Այվազյանը։
Նա նաև հավելեց, որ այդ հարցը հատուկ ընդգծել է ԵԱՀԿ ՄԽ համանախագահների զրույցների մակարդակում։