ԵՐԵՎԱՆ, 4 հուլիսի — Sputnik. Ամերիկահայ ոճաբան Հարի Մադաթյանը հայտնել է, որ իրենց ընտանիքում փոքրիկ է ծնվելու։
Հարին ուրախ լուրը հայտնել է Instagram սոցցանցի իր էջում` լուսանկարի վրա նշելով «Spice Girls» խմբի նախկին մասնակից Մել Բիին։
«Սենսացիոն նորություն։ Ես և Մել Բին սպասում ենք մեր առաջնեկին։ Տղա՞, թե՞ աղջիկ», — գրել է Մադաթյանը։
Հայ տղամարդն ապրում է բրիտանացի երգչուհի, կոմպոզիտոր, հաղորդավարուհի և 90-ականների երիտասարդության կուռք Մել Բիի հետ (իսկական անունը` Մելանի Բրաուն)։ Նրանք սկսել են հանդիպել 2017 թվականի սկզբից, երբ Մել Բին բաժանվել է 42-ամյա Ստեֆան Բելաֆոնտեից։ ԶԼՄ-ների տվյալներով` Հարին ԵՊՀ նախկին ուսանող է։
«Spice Girls»-ի նախկին մեներգչուհին երեք դուստր ունի` 18-ամյա Ֆենիքսն առաջին ամուսնուց` պարող Ջիմի Գալզարից, 10 տարեկան Էնջելը` դերասան Էդի Մերֆիից, 6 տարեկան Մեդիսոնը` Ստեֆանից։
Երկրպագուները Մել Բիին իսկական հայ հարս են անվանում` հայկական թեմայով մի շարք լուսանկարների հրապարակումից հետո։ Լուսանկարներից մեկում երգչուհու հագին Արարատի պատկերով շապիկ է, իսկ տեսանյութերից մեկում էլ նա երգում է Սիրուշոյի երգը։
