Դպրոց

Դրամ հավաքող ուսուցիչն ու տնօրենը կհայտնվեն ոստիկանության թիրախում

964
(Թարմացված է 15:48 17.05.2018)
Դպրոցներում արգելվում է դրամահավաքությունը, բուհերում` քաղաքականությունը։ ԿԳ նոր նախարարը առաջին հրամաններն է տվել։

ԵՐԵՎԱՆ, 17 մայիսի — Sputnik. Հայաստանում իրավիճակ է փոխվել և դրամահավաքներն այլևս խստիվ արգելվելու են։ Այսօր կառավարության նիստից առաջ, լրագրողների հետ զրույցում հայտարարեց ԿԳ նորանշանակ նախարար Արայիկ Հարությունյանը։

«Հորդորում եմ տնօրեններին, ուսուցիչներին վերջ տալ դրամահավաքին։ Հայաստանում իրավիճակ է փոխվել և դրամահավաքները խստիվ պատժվելու են»,– ասաց Հարությունյանը` տեղեկացնելով, որ այս հարցով ԿԳՆ–ն արդեն համագործակցում է ոստիկանության հետ` հայտնաբերելու, բացահայտելու ու համապատասխան արձագանքի արժանացնելու համար։

Դպրոցների տնօրենների հետ այս հարցը նախարարը դեռ չի քննարկել, ժամանակ չի ունեցել։

Իսկ բուհերը քաղաքականությունից զերծ պահելու ուղղությամբ, առաջին քայլը կարվի «Բարձրագույն կրթության մասին» օրենքի փոփոխությամբ։ Նախարարի խոսքով` օրենքը թույլ չի տալու պետական պաշտոններ զբաղեցնող անձանց տեղ զբաղեցնել բուհական խորհուրդներում։

Արայիկ Հարությունյանը նշեց, որ գործող օրենքի նախագիծը ևս նման դրույթ նախատեսում էր, բայց Սերժ Սարգսյանի միջամտությամբ, երկու պաշտոնյաների համար բացառություն արվեց։

«Հիմա մենք պետք է դա էլ փոխենք, որպեսզի որևէ պաշտոնյա կամ քաղաքական գործիչ այլևս տեղ չունենա բուհերի խորհուրդներում, և բուհերը առավելագույնս լինեն ինքնավար»,– ասաց նախարարը։

Անդրադառնալով իրենց բուհերի ռեկտորների հրաժարականը պահանջող ուսանողների բարձրացրած խնդրին` Արայիկ Հարությունյանը նշեց, որ այդ հարցը կլուծվի համակարգային տարբերակով և ոչ առանձին բուհի մակարդակով։

964