Լաուրա Սարգսյան, Sputnik Արմենիա
Այս երկրում յուրաքանչյուրը գիտի ՀՀ ոստիկանապետ Վալերի Օսիպյանին։ Սակայն քչերը գիտեն, որ Օսիպյանը չորս անգամ Երևանի փոխոստիկանապետի պաշտոնից ազատվելու դիմում է գրել ու չորս անգամ մերժում ստացել նախկին ոստիկանապետ Վովա Գասպարյանից։ Այս պատմությունը Sputnik Արմենիային պատմեց Օսիպյանի նախկին ղեկավարը, որը չցանկացավ հրապարակել իր անունը։
Նեղ շրջանակում Վալերի Օսիպյանին «ճգնաժամային մենեջեր» են անվանում։ Մեր զրուցակիցն ասում է, որ նա միշտ գործի մեջ է, հնարավոր չէ ոստիկանական կառույցն առանց նրա պատկերացնել։
Նրա խոսքով` Օսիպյանը Երևանի քաղաքային վարչության բաժնի պետի տեղակալ եղած ժամանակ չորս անգամ գործից ազատվելու դիմում է ներկայացրել, բայց նախկին ոստիկանապետ Վլադիմիր Գասպարյանը չորս անգամ էլ նրան համոզել է մնալ։
«Վալերան ասում էր, որ հոգնել է, ուզում է գնալ, բայց Գասպարյանը համոզում էր նրան` ընդգծելով, որ ոստիկանությունում երկրորդ Օսիպյան չկա։ Հնարավոր է` եթե Վովան չլիներ, Վալերան այս կառույցում չմնար»,- ասաց նա։
Մեր զրուցակիցն Օսիպյանի հետ ծանոթացել է 90-ականների սկզբին։ Այն ժամանակ նա Երևանի հասարակական կարգի պահպանման բաժնի պետ էր, իսկ Օսիպյանը` շարքային սերժանտ։
«Ես մեծ ներուժ տեսա երիտասարդ, ազնիվ, բարոյական, պատասխանատու, կուլտուրական, կրթված տղայի մեջ։ Ես հասկանում էի, որ միշտ կարելի է հույս դնել նրա վրա և ուղարկում էի ամենաբարդ խնդիրները լուծելու», —խոստովանեց նա։
Մի անգամ նա ասել է Օսիպյանին` անպայման պետք է բարձրունքների հասնի, քանի որ մեծ ներուժ ունի, բայց դրա համար պետք է բարդ ճամփա անցնի ու անպայման գնա սովորելու։ «Հնարավոր է` խորհուրդս նրան գոտեպնդեց. նա սովորեց, դասակի հրամանատար էր, փոխհրամանատար, հետո վաշտի հրամանատար։ Նրան երբեք ոչ ոք չի օգնել, նա ինքնուրույն սկսեց ներքևներից, այդ պատճառով էլ գործընկերներն այդքան սիրում են նրան», — ասաց մեր զրուցակիցը։
Նրա խոսքով` Օսիպյանը շատ նվիրված է աշխատանքին. օրը 20 ժամ աշխատում է, տանը լինում է այդ խելահեղ ժամանակացույցին համապատասխան։
Օսիպյանը միշտ սարի պես կանգնած է յուրայինների մեջքին, բայց երբեք զենք չի բարձրացնում սովորական քաղաքացիների վրա։ Այդ պատճառով ցանկացած հանրահավաքի ու ցույցի նա անզեն էր դուրս գալիս։ Նույնիսկ զրահաբաճկոն չի հագնում։
Դա հաստատվեց 2016 թվականի հուլիսին, երբ «Սասնա ծռերը» Երևանում գրավեցին ՊՊԾ գունդը ։
«Վալերան Նուբարաշենում է ապրում։ Աշխատանքի գնալիս է եղել, երբ նրան զանգել ու զեկուցել են գրավման մասին։ Օսիպյանն անհապաղ մեկնել է այնտեղ», — ասում է նա։
Օսիպյանը մտել է ՊՊԾ գնդի շենք ու ասել, որ չի լքի տարածքը, քանի դեռ այնտեղ ոստիկան կա։
«Ես դա սխրանք եմ համարում։ Նա հասկանում էր` ուր է գնում։ Այդ դեպքերից հետո նա շատ ճնշված էր։ Ուսադիրները պոկել էին, ստորացրել, նա չէր կարողանում հասկանալ` ինչպես Երևանում հայը կարող է հային սպանել (նա նկատի ունի ոստիկանության գնդապետ Արթուր Վանոյանին)», — ասաց մեր զրուցակիցը։
Sputnik Արմենիայի զրուցակիցն ասաց` հպարտ է, որ Վալերի Օսիպյանի պես կադր է ունեցել։
«Ցանկացած մարդ նրա փոխարեն չէր դիմանա, կհանձնվեր։ Բայց ոչ Վալերան, նա ասես ռոբոտ-ոստիկան լինի», — նշեց նա։
Մեր զրուցակիցն ընդգծեց, որ Օսիպյանն ազնիվ աշխատանքով վաստակած գումարն ընտանիքի համար է ծախսում։ Ո՛չ խանութներ ունի, ո՛չ ռեստորաններ, ո՛չ էլ այլ բիզնես։
Օսիպյանը երկու երեխա ունի։
