ԵՐԵՎԱՆ, 4 մայիսի — Sputnik. Մայիսի 3-ին HSBC բանկի` Կոմիտասի պողոտա-Գյուլբենկյան փողոց խաչմերուկում գտնվող մասնաճյուղի վրա ավազակային հարձակում կատարած անձին վնասազերծելիս զոհվեց Պարեկապահակետային ծառայության գնդի ոստիկան, ոստիկանության ավագ ենթասպա Արա Շախգուլյանը:
Ծառայողական պարտականությունները կատարելիս խիզախություն և անձնազոհություն ցուցաբերելու համար ոստիկանության պետ Վլադիմիր Գասպարյանի հրամանով նա հետմահու պարգևատրվել է «Սխրագործության համար» մեդալով։
Այս մասին տեղեկացնում է ՀՀ ոստիկանության մամուլի ծառայությունը։
Ավազակային հարձակման ժամանակ խիզախություն և անձնազոհություն ցուցաբերելու համար հետմահու պարգևատրվել է նաև «Արմոբիլ» անվտանգության ծառայության պահնորդ Խաչատուր Գալստյանը «Համագործակցության ամրապնդման համար» մեդալով։
Ըստ հաղորդագրության` նույն մեդալով պարգևատրվել է «Արմոբիլ» անվտանգության ծառայության մյուս աշխատակից` պահնորդ Արամ Մկրտչյանը, ում վնասվածք էր պատճառել հանցագործը և որի կյանքը հաջողվեց փրկել։
Հանցագործին վնասազերծելու ժամանակ ծառայողական պարտականությունները գերազանց կատարելու համար Պարեկապահակետային ծառայության գնդի ոստիկան, ոստիկանության ավագ Վաղինակ Սարգսյանը ոստիկանության պետի հրամանով պարգևատրվել է «Ոստիկանությունում գերազանց ծառայության համար» կրծքանշանով։
«Ոստիկանությունը կարևորում է հանցագործությունների կանխարգելման և բացահայտման գործում քաղաքացիների համագործակցությունը, ոստիկանության ծառայողներին ցուցաբերած աջակցությունը»,- նշված է հաղորդագրության մեջ:
Ըստ այդմ` հանցագործին բռնելիս ոստիկանության ստորաբաժանումների օպերատիվ խմբերին աջակցած քաղաքացիներ Տիգրան Ալավերդյանն ու Հրաչյա Մեժլումյանը ևս պարգևատրվել են «Համագործակցության ամրապնդման համար» մեդալով։
