ԵՐԵՎԱՆ, 1 մայիսի — Sputnik. Եթե օտարազգիները փորձեն Google, Yandex և Rambler որոնողական համակարգերում ռուսերեն գրել «թավշյա հեղափոխություն» արտահայտությունը, ապա արդյունքը կարող է շատերին զարմացնել. բոլոր նորությունները կապված են հենց Հայաստանի հետ։
«Թավշյա հեղափոխություն» ձևակերպումը սկսել է ասոցացվել հենց Հայաստանի հետ, իսկ Չեխոսլովակիայի 1989 թվականի ապստամբությունը երկրորդ պլան է մղվել։
Տաքարյուն հեղափոխականները
Համացանցի օգտատերերը շարունակում են «Իմ քայլը» բողոքի շարժման հետ կապված նյութեր տարածել։
Ընդդիմության հանրահավաքներն ուղեկցվում են ազգային պարերով ու հայրենասիրական երգերով։ Ակցիաների այդ դրվագներն արագ տարածվում են սոցիալական կայքերում լուսանկարների ու տեսանյութերի տեսքով։ Հրապարակվում են կադրեր, որտեղ երևում են Սերժ Սարգսյանի հրաժարականին հասած և եռագույն ծածանող ցուցարարները։
Ինչ վերաբերում է Instagram-ի թեգերին, ապա կարելի է տեսնել ինչ արագությամբ է աճում #nikolpashinyan հեշթեգերի քանակը։ Թիվն արդեն հասել է 3572-ի, իսկ նախկինում պատգամավոր Նիկոլ Փաշինյանի մասին հիշատակումներ գրեթե չկային այս հարթակում։
Մեծ տարածում է ստացել նաև #qaylara հեշթեգը` 3573։
Ապրիլի 24-ին «Armenia» հեշթեգը Instagram-ում օգտագործվել է 3 539 185 անգամ (այս տարվա մարտին` 3 289 627), իսկ «Армения» հեշթեգը` 811 907 անգամ (մարտին`755 017)։ Այսօր առաջին ցուցանիշը հասել է 3 583 948-ի (#Armenia), իսկ երկրորդը` 822 442-ի։
Ուշադրության կենտրոնում
Երևանի և Հայաստանի այլ քաղաքների փողոցներում անցկացվող բազմահազարանոց ցույցերը գրավել են արտասահմանյանն լրատվամիջոցների ուշադրությունը։ The Washington Post, Financial Times, Huffington Post, The New York Times, BBC, Euronews. այս և այլ հեղինակավոր միջազգային լրատվամիջոցներն անդրադարձել են Հայաստանի ներքաղաքական իրավիճակին։
Նշենք, որ այս պահին Ազգային ժողովում ընթանում է հատուկ նիստը, որի ընթացքում պատգամավորները քննարկում են ՀՀ վարչապետի ընտրության հարցը: Առաջադրված միակ թեկնածուն Նիկոլ Փաշինյանն է։
Ընտրվելու համար Փաշինյանը պետք է առնվազն 53 ձայն ստանա։ «Ելքը», ՀՅԴ-ն ու «Ծառուկյան» դաշինքը միասին ունեն 47 պատգամավոր։ Առանց ՀՀԿ-ի լրացուցիչ ձայների Փաշինյանն ընտրվել չի կարող։ ՀՀԿ-ն քվեարկելու հարցում իր դիրքորոշումը կհայտնի Փաշինյանի ծրագրին ծանոթանալուց հետո:
Առավոտից Երևանի Հանրապետության հրապարակում հազարավոր մարդիկ են հավաքվել և սպասում են ԱԺ նիստի ավարտին։ Մեծ էկրանների վրա նիստերի դահլիճից ուղիղ միացում է հեռարձակվում, քաղաքացիները հետևում են քննարկումների ընթացքին։
