ԵՐԵՎԱՆ, 17 Ապրիլ — Sputnik. Այսօր վաղ առավոտյան, ժամը 8–ի մոտակայքում վիճաբանություն տեղի ունեցավ ոստիկանության աշխատակիցների և Ֆրանսիայի հրապարակում գիշերած ցուցարարներից մեկի միջև։ Ոստիկանությանը մոտեցած բողոքի ակցիայի կազմակերպիչ, «Ելք» խմբակցության ղեկավար Նիկոլ Փաշինյանը փորձեց հարթել իրավիճակը։
Ապա` նա կոչ արեց նորից սկսել խաղաղ անհնազանդության ակցիաներն ամբողջ քաղաքով մեկ։
«Այս պահից սկսած տոտալ շրջափակել քաղաքը, մտնել պետական գերատեսչություններ, արգելել մարդկանց աշխատել, բայց ոչ մեկին չվիրավորել, ոչինչ չջարդել։
Արգելել տրանսպորտի աշխատանքը, շրջափակել ամեն ինչ։ Կոչ եմ անում սփյուռքի մեր հայրենակիցներին դուրս գալ փողոց և չթողնել աշխատել մեր դեսպանատներին։ Կոչ եմ անում բոլոր կողմերից փակել ԱԺ տանող փողոցները»,–լրագրողների հետ զրույցում ասաց Նիկոլ Փաշինյանը։
Նրա խոսքով` նպատակը ցանցային գործողություններ են, որի արդյունքում ոստիկանությունը ստիպված է լինելու ցրել իր ուժերը, և որևէ տեղի վրա ճնշումը մեծ չի լինի։
