ՔՊ–ի նախաձեռնած բողոքի ակցիան, Ազատության հրապարակ, ապրիլի 13

Բողոքի ցույցը կշարունակվի ողջ գիշեր, ցուցարարները կգիշերեն Ֆրանսիայի հրապարակում

148
(Թարմացված է 00:08 14.04.2018)
Ազատության հրապարակում վարչապետի պաշտոնում Սերժ Սարգսյանի իշխանության երկարաձգման դեմ «Քաղաքացիական պայմանագիր» կուսակցության նախաձեռնած բողոքի ցույցը տեղափոխվեց Ֆրանսիայի հրապարակ։

ԵՐԵՎԱՆ, 13 ապրիլի — Sputnik. Ակցիայի մասնակիցներն այս պահին փակել են Ֆրանսիայի հրապարակի 4 ելքերը` չնայած Երևանի ոստիկանապետի տեղակալ Վալերի Օսիպյանի նախազգուշացումներին։ Տրանսպորտային միջոցներն այլևս չեն կարողանում մուտք գործել հրապարակ։ Նիկոլ Փաշինյանը հայտարարեց, որ այսօր գիշերելու են Ֆրանսիայի հրապարակում:

«Եթե հրապարակն այսպես մնա, ոստիկանությունը չի կարողանա ուժ գործադրել։ Ես հույս ունեմ, որ մարդիկ կտեսնեն մեզ և կգան Ֆրանսիայի հրապարակ։ Մեր նպատակն է փակել հրապարակի բոլոր մուտքերն ու ելքերը»,- ասաց Փաշինյանը

Երևանի կենտրոնում երթևեկությունը այս պահին կաթվածահար վիճակում է, կենտրոնական որոշ փողոցներ փակվել են, որոշները դժվարանցանելի են։ Ցուցարարներին ամենուրեք վերահսկում և հետևում են ոստիկանները։

Ակցիայի նախաձեռնողները մտադիր են վաղը գնալ Մելիք-Ադամյան՝ խափանելու ՀՀԿ խորհրդի նիստը, ինչպես նաև շրջափակել իշխող Հանրապետական կուսակցության գրասենյակը։

Նշենք, որ Երևանում Ազատության հրապարակից մեկնարկել է Նիկոլ Փաշինյանի ղեկավարած «Քաղաքացիական պայմանագիր» ընդդիմադիր կուսակցության կողմնակիցների ցույցը։ Ակցիան բավական մարդաշատ է, հրապարակը լեփ-լեցուն է։

Ակցիան ուղղված է այժմ էլ վարչապետի պաշտոնում Սերժ Սարգսյանի իշխանության երկարաձգման դեմ։ Ցույցին նախորդել էր «Իմ քայլը» ակցիան` Հայաստանի տարածքով Փաշինյանի նախաձեռնած քայլարշավը։ Մի քանի օրում Փաշինյանը և նրա համախոհները ոտքով հաղթահարել են ավելի քան 200 կիլոմետր` ակցիաներ անցկացնելով Գյումրիում, Վանաձորում, Սպիտակում, Դիլիջանում, Աբովյանում և Հրազդանում։

Քայլարշավն ավարտվել է Երևանում։ Իր ելույթում Փաշինյանը կոչ է արել մայրաքաղաքի բնակիչներին միանալ ցույցին և իրենց ավանդն ունենալ պայքարում։

Հատկանշական է, որ երկու քաղաքական ուժերը` «Լուսավոր Հայաստանը» և «Հանրապետությունը», որոնք Փաշինյանի կուսակցության հետ միասին խորհրդարանական «Ելք» դաշինքն են ձևավորել, չեն մասնակցում ցույցին։

148