ԵՐԵՎԱՆ, 10 ապրիլի — Sputnik. Ժամանակակից աշխարհում բջջային հեռախոսը տեղեկություն ստանալու հիմնական գործիքն է։
Այս մասին այսօր Sputnik Արմենիա մուլտիմեդիոն մամուլի կենտրոնում SputnikPro շարքի դասընթացի ընթացքում ասաց ռուս լրագրող, պրոդյուսեր ու մեդիամենեջեր Նատալյա Լոսևան։
SputnikPro ծրագիրը լրագրողներին ներկայացրել է ժամանակակից մուլտիմեդիոն տեղեկատվական գործակալության աշխատանքի ստանդարտներն ու տեխնոլոգիաները։ Դասընթացների 1–ին փուլը կայացել է Մինսկում, ապա Թբիլիսիում։
Լոսևայի խոսքով` բջջային սարքերը «հաղթել» են համակարգիչներին դեռևս 2014 թվականին։
«Գնալով այդ միտումը միայն աճում է։ 2023 թվականին աշխարհի ընկերությունների մեծ մասի աշխատակիցների 45%–ը բջջային հեռախոսը կօգտագործի որպես աշխատանքի հիմնական գործիք։ Դրանք կլինեն բանկի աշխատակիցները, բժիշկները ու այլ ոլորտների ներկայացուցիչները», – նշեց փորձագետը։
Կախվածություն էկրանից
Այսօր սմարթֆոնի օգտատերն օրվա ընթացքում միջինը 50 անգամ նայում է էկրանին, նշեց Լոսևան։
«Բայց ինչն է հետաքրքիր։ Սմարթֆոնների թվի աճի հետ մեկտեղ, 2023 թվականի համար կանխատեսվող աճն այդքան նշանավոր չէ։ Մարդու շփումը բջջային հեռախոսի հետ չի գերազանցի 65 անգամը», – պարզաբանեց փորձագետը` հավելելով, որ գնալով ավելի շատ են մարդիկ սկսում անհանգստանալ էլկտրոնային սարքերի կախումից։
Կեղծ լուրեր
Վարպետության դասընթացի շրջանակում քննարկման հիմնական թեմաներից էր կեղծ լուրերն ու ապատեղեկատվության տարածման խնդիրը սոցիալական մեդիայում` ընթերցողին շահախնդրորեն խաբելը` լինի դա ֆինանսական, թե քաղաքական նպատակով։
Լոսևայի խոսքով` կեղծ նորությունները շարունակում են թրենդային մնալ, քանի որ դրանք ավելի հաճախ են քննարկվում։
«Կեղծ տեղեկությունների դեմ պայքարում փորձագետների մեծ մասը օգնություն են ակնկալում ոչ թե լրատվական դաշտի ներկայացուցիչներից, այլ Google–ից ու Facebook–ից», – ասում է մեդիամենեջերը։
Միաժամանակ Լոսևան ընդգծեց, որ հաճախ լավագույն մեսենջերները դառնում են նաև կեղծ լուրերի տարածման գործիք։
«Fakenews–ը եկամտի հեռանկարային աղբյուր է։ Կեղծ լուրերն ավելի մեծ տարածում են ստանում, քան իրականները ու ավելի արագ են տարածվում», – հավելեց Լոսևան։
Ինչ վերաբերում է սոցիալական կայքերին, որոնցից ոչ պաշտոնական վիճակագրության տվյալներով կախվածություն ունեն հայկական ԶԼՄ–ների 99%–ը, ապա Լոսևայի խոսքով դրանք շարունակում են չափազանց մեծ պահանջարկ վայելել։ Ամբողջ աշխարհում մարդիկ նախընտրում են ստանալ նորությունների իրենց «չափաբաժինը» հենց սոցիալական կայքերից։
Փորձագետը հավելեց, որ սոցիալական կայքերի լսարանը չի նվազում, սակայն ընկնում է հաճախելիությունը։ Իսկ լրատվական դաշտի ներկայացուցիչների հիմնական խնդիրը լսարան գրավելն է։
Սեմինարի շրջանակում ելույթ ունեցան նաև մեդիամենեջեր, RPTLY միջազգային մուլտիմեդիոն տեսագործակալության պաշտոնական ներկայացուցիչ Ինդիրա Ժարովան ու RT հեռուստաալիքի անգլիական խմբագրության նախաեթերային բաժնի պետ Մարիա Ալեքսեևան։ Մասնագետները ներկայացրին գործակալությունների աշխատանքը, նաև խոսեցին թրենդային տեսահոլովակների ստեղծման մասին։
SputnikPro ծրագրի նպատակն է ԶԼՄ–ների ներկայացուցիչներին ծանոթացնել ժամանակակից մուլտիմեդիոն տեղեկատվական գործակալության ստանդարտներին ու տեխնոլոգիաներին։
