ԵՐԵՎԱՆ, 9 ապրիլի — Sputnik. Գորյաչի Կլյուչում մեկնարկել են Հայրենական մեծ պատերազմի տարիներին Արշալույս Խանջյանի սխրագործության մասին վավերագրական և խաղարկային ֆիլմի նկարահանումները։ Այս մասին հայտնում է Գորյաչի Կլյուչի քաղաքապետարանի մամուլի ծառայությունը։
«Նախագծի հեղինակները հույս ունեն, որ ֆիլմն էկրաններին կհայտնվի մայիսի 9-ին։ Նկարահանումներն իրականացնում է Կրասնոդարի HAYK կինոընկերությունը», — գրված է հաղորդագրության մեջ։
Արշալույսի դերում հանդես կգան երեք դերասանուհի. Աննա Բոջյանը գլխավոր հերոսուհուն կմարմնավորի մանուկ հասակում, Ռեգինա Կուրմանովան կմարմնավորի զինվորի հարսնացուի դերը պատերազմի տարիներին, իսկ Մանուշակ Չուբարյանը` ծեր տարիքում։
Ֆիլմի նկարահանումներին ներգրավված են ավելի քան 40 դերասաններ Նալչիկից, Ռոստովից, Տուապսեից։
«Մենք ուզում ենք, որ Արշալույսի մասին իմանան միլիոնավոր մարդիկ։ Մենք պետք է և նույնիսկ պարտավոր ենք կյանքի կոչել այդ նախագիծը։ Մենք պարտական ենք այն զինվորներին, որոնք կյանքի ու մահվան կռիվ էին տալիս Կովկասի լեռներում 1942 թվականի օգոստոսին։ Մենք պարտավոր ենք հարգանքի տուրք մատուցել նուրբ կնոջը, որը լեգենդ էր դարձել կյանքի օրոք», — ֆիլմի ռեժիսորի` Էռնեստ Հարությունովի խոսքերն է մեջբերում Գորյաչի Կլյուչ վարչակազմի մամուլի ծառայությունը։
Ֆիլմի տևողությունը չի գերազանցում 40 րոպեն։ Ֆիլմի պրեմիերաները տեղի կունենան Կրասնոդարում և Գորյաչի Կլյուչում։
1997 թվականին Արշալույս Խանջյանը «Կյանքը ճակատագիր է» անվանակարգում «Տարվա կին» էր ճանաչվել։
2015 թվականի նոյեմբերին Գորյաչի Կլյուչում կանգնեցրել են Արշալույս Խանջյանի արձանը, որը ստեղծվել է ժողովրդական միջոցներով (մոտ 1 մլն ռուբլի)։ Հանգանակությանը մասնակցել է ամբողջ Կուբանը։