Քաղցկեղով հիվանդ

Քաղցկեղից մահանալու հիմնական պատճառը բացահայտել է ուռուցքաբանության կենտրոնի տնօրենը

150
(Թարմացված է 14:09 09.04.2018)
Հայաստանում քաղցկեղի ցուցանիշը մեծ է հատկապես Լոռու և Սյունիքի մարզերում։

ԵՐԵՎԱՆ, 9 ապրիլի — Sputnik. Քաղցկեղային հիվանդություններ ամենից շատ ախտորոշվում են Լոռու և Սյունիքի մարզերի բնակիչների մոտ։ Այս մասին լրագրողների հետ զրույցում ասաց Ֆանարջյանի անվան ուռուցքաբանության ազգային կենտրոնի տնօրեն Արմեն Տանանյանը։

«Լոռու և Սյունիքի մարզերը, որտեղ հանքարդյունաբերությունը զարգացած է, քաղցկեղի ցուցանիշով ՀՀ-ում առաջին տեղն են զբաղեցնում։ Այս մարզերում քաղցկեղի բարձր ցուցանիշը նաև հանքի շահագործման հետ կապ ունի», — ասաց Տանանյանը։

Նա ընդգծեց, որ վերջին տարիներին քաղցկեղով հիվանդների թիվը Հայաստանում ավելանում է. վերջին 20 տարվա ընթացքում 70% աճ է գրանցվել։ Խնդիրն այն է, որ քաղցկեղը 40-45% դեպքերում ախտորոշվում է հիվանդության 3-րդ և 4-րդ փուլերում։

«Քաղցկեղից մահանալու հիմնական պատճառներն են հիվանդության ուշ ախտորոշումը և սքրինինգային ծրագրերի բացակայությունը», — ասաց Տանանյանը։

Նա ընդգծեց, որ հիվանդների մեծ մասը 25-60 տարեկան են։ Հայաստանում բավարար միջոցներ չկան ախտորոշման և քաղցկեղի համալիր բուժման համար։ Ուռուցքաբանության ազգային կենտրոնի բյուջեն կարող է ապահովել համալիր բուժման գործընթացի միայն 80-90%-ը (միայն հիվանդների 20%-ի համար)։

«Այսօր քաղցկեղով հիվանդների բուժման համար նախատեսված մեր բյուջեն կազմում է 9 մլն դրամ (մոտ 18 800 դոլար), ինչը ծածկում է 20% հիվանդների կարիքները։ Որպեսզի մենք կարողանանք բոլորի համար համալիր բուժում ապահովել, մինչև 8 մլրդ դրամ է անհրաժեշտ (մոտ 16 մլն 680 հազար դոլար), — ասաց Տանանյանը։

Հիվանդները ստիպված են տարբեր ատյաններ դիմել արտասահմանում բուժում անցնելու համար, մասնավորապես` Գերմանիայում և ԱՄՆ-ում։

Քաղցկեղը շարունակում է մնալ առողջապահության ոլորտի գլխավոր խնդիրներից մեկը։

Ապրիլի 9-ից 12-ը Երևանի պետական բժշկական համալսարանում կայանալու են երկու գիտագործնական կոնֆերանսներ՝ «Քաղցկեղի ախտորոշման և բուժման ներկայիս չափանիշներ» և «Առողջապահական կիրառական հետազոտություններ և քաղցկեղի ռեգիստրներ» խորագրով: Կոնֆերանսներին մասնակցում են ոչ միայն Հայաստանի այդ ոլորտի առաջատար մասնագետները, այլև հրավիրված պրոֆեսորներ Գերմանիայից, Ավստրիայից և այլ երկրներից։

150
Ըստ թեմայի
Խնդրեց չլացել, շարունակել ապրել հանուն հայրիկի ու քրոջ. երբ մանկական քաղցկեղը դատավճիռ է
Ինչո՞ւ է քաղցկեղը «երիտասարդացել» Հայաստանում. մասնագետների մեկնաբանությունները
Քաղցկեղը սրընթաց երիտասարդանում է. ինչ են մտածում փորձագետները
Խաչանուշ Հակոբյան. վաղ հայտնաբերելու դեպքում քաղցկեղը բուժվում է