Երևան

Սպայական կազմի զինծառա­յողները բնակարան կգնեն առանց տոկոսադրույքի ու կանխավճարի

74
(Թարմացված է 13:03 06.04.2018)
Պետական աջակցության շնորհիվ հնարավոր է բնակարան ձեռք բերել` առանց տոկոսադրույքի ու առանց կանխավճարի։ Պաշտպանության նախարարությունը նախագիծ է մշակել։

ԵՐԵՎԱՆ, 6 ապրիլի — Sputnik. Պաշտպանության նախարարության, ոստիկանության, ազգային անվտանգության ծառայության, քրեակատարողական ծառայության սպաները կկարողանամ բնակարան գնել` 20 տարի ժամկետով հիփոթեքային արտոնյալ վարկով։ Ընդ որում` պահանջվող 10% կանխավճարը գնորդի փոխարեն կվճարի պետությունը։ Իսկ տարեկան առավելագույնը 9% տոկոսադրույքից 4%-ը կսուբսիդավորի պետությունը, իսկ մնացած 5%-ի վճարումը կիրականացվի օրենքով սահմանված եկամտային հարկի վերադարձման միջոցով։

Բնակարանի արժեքը չի կարող գերազանցել 28.500.000 դրամը (60 000 դոլար):

Նման արտոնյալ պայմաններ է նախատեսում «Մատչելի բնակարան զինծառայողներին» պետական աջակցության ծրագիրը, որն առայժմ նախագծային փուլում է և առաջիկայում կներկայացվի կառավարությանը։

Նախագծի համաձայն` ամեն տարի ծրագրի սահմանած արտոնյալ պայմաններից կկարողանան օգտվել ՊՆ 400, ոստիկանության 37, ազգային անվտանգության ծառայության 25, քրեակատարողական ծառայության 5 սպաներ:

Ծրագրից չի կարողանա օգտվել այն զինծառայողը, որը նախկինում արդեն օգտվել է պետական ֆինանսական աջակցության այլ ծրագրերից կամ բնակարան է ձեռք բերել կամ ստացել պետական աջակցությամբ։

ՀՀ պաշտպանության նախարար Վիգեն Սարգսյանը «Մատչելի բնակարան զինծառայողներին» ծրագրի մասին հայտարարել էր 2017 թ.-ի հոկտեմբերին ԱԺ-ում կազմակերպված լսումների ժամանակ։

74