ԵՐԵՎԱՆ, 6 ապրիլի — Sputnik. Վորոնեժում Երևան-Մոսկվա ավտոբուսի վթարի հետևանքով տուժած բոլոր քաղաքացիները դուրս են գրվել հիվանդանոցից։ Այս մասին նշված է Ռուսաստանում Հայաստանի դեսպանատան ֆեյսբուքյան էջում։
«Ի լրումն Վորոնեժի մարզում վթարի հետևանքով տուժածների մասին նախորդ հաղորդագրությունների՝ հաղորդում ենք, որ ապրիլի 5-ին Վորոնեժի մարզում ավտոբուսի վթարի հետևանքով տուժած վերջին քաղաքացին դուրս է գրվել հիվանդանոցից»,-նշված է հաղորդագրության մեջ։
Մարտի 20-ին Մոսկվայի ժամանակով 9.00-ին «Դոն» միջպետական ավտոճանապարհի 673-րդ կիլոմետրում ճանապարհատրանսպորտային պատահար էր գրանցվել: Վթարի հետևանքով մահացել էին երեք մարդ, 8 հոգու էլ տեղափոխել էին Վորոնեժի մարզի Պավլովսկի շրջանի հիվանդանոց։
Մահացել էին ավտոբուսի երկու ուղևորներն ու բեռնատարի (որին բախվել է ավտոբուսը) վարորդը։ Մարտի 26-ին հայտնի էր դարձել, որ մահացել է ուղևորներից ևս մեկը։
Նախնական տվյալների համաձայն` ավտոբուսի վարորդը կորցրել էր կառավարումը, դուրս եկել հանդիպակաց գոտի և բախվել բեռնատարին։ Ավտոբուսում եղել էին 50 ուղևոր, վարորդը և նրան փոխարինող վարորդը։ Քրեական գործ է հարուցվել «ճանապարհային երթևեկության կանոնների խախտում և տրանսպորտային միջոցների շահագործում, որը անզգուշության հետևանքով 2 կամ ավելի անձանց մահվան է հանգեցրել» հոդվածով։ Այն մինչև 7 տարի ազատազրկում է նախատեսում։
Հիշեցնենք, որ հիվանդանոց էին տեղափոխվել 1969 թ. ծնված Դավիթ Սարդարյանը, 1988 թ. ծնված Մելիք Հայրապետյանը, 1982 թ. ծնված Եղիշե Համբարձումյանը, 1964 թ. ծնված Արմեն Մուրադյանը, 1961 թ. ծնված Վարյա Օհանյանը, 1969 թ. ծնված Դավիթ Վերմիշյանը և 1972 թ. ծնված Վազգեն Գևորգյանը։
