ԵՐԵՎԱՆ, 11 հունվարի — Sputnik. Հայաստանում սեղմված գազը կարող է թանկանել ոչ ավելի, քան մեկ խորանարդ մետրի համար 20 դրամով։ Եթե ավելի բարձր է, ուրեմն չարաշահում է։ Այդ մասին վկայում են Հայաստանի տնտեսական մրցակցության պաշտպանության պետական հանձնաժողովի հաշվարկները։
Հունվարից գազը և դիզելային վառելիքը թանկացել են Հարկային օրենսգրքում կատարված փոփոխությունների պատճառով։ Ուրիշ պատճառ չկա։ Ո՛չ գազի, ո՛չ էլ դիզելի ինքնարժեքը չի փոխվել, չեն ավելացել նաև լցակայանների ծախսերը։
Գազի ակցիզն աճել է մեկ խորանարդ մետրի համար 16,7 դրամով (8,33 դրամից մինչև 25 դրամ)։ Հաշվի առնելով ԱԱՀ-ն` այդ թիվը կաճի մինչև 20 դրամ։ Բայց ոչ դրանից շատ, որովհետև գազի գինը (ի տարբերություն բենզինի և դիզելի) կայուն է։ Հայաստանը Ռուսաստանից գազ է ստանում հազար խմ-ի համար նույն 150 դոլարով, իսկ «Գազպրոմ Արմենիան» լցակայաններին վաճառում է նախկին 242 դոլարով։
Հաշվի առնելով, որ լցակայաններում գազի խմ-ն արժի մինչև 200 դրամ, գինը պետք է բարձրանա 10 տոկոսից ոչ շատ։ Այսինքն`100 կմ անցնելը կթանկանա 250-260 դրամով։
Նշենք, որ խոսքը միայն ավտոլցման կայանների համար սեղմված գազի մասին է, ոչ թե ընդհանուր օգտագործման. այստեղ հարկերը չեն փոխվել։
ՏՄՊՊՀ հաշվարկներով` Հայաստանում երեք ավտոմեքենաներից չորսն աշխատում են գազով։ Բենզինով աշխատում են հիմնականում կառավարության ավտոպարկը և ունևորների ավտոմեքենաները։
Դիզելային վառելիքը նույնպես պետք է թանկանա միայն հարկերի պատճառով։ Այլ պատճառները չեն անցնի, որովհետև դիզելային վառելիքի արտասահմանյան գները չեն աճել։
Դիզելի եվրասիական տուրքերը չեն փոխվել (նույն 5 տոկոսը)։ Որպես կանոն` դրա գինը չի ավելանում, որովհետև Հայաստանը դիզելը գրեթե ամբողջությամբ գնում է Ռուսաստանից։
Դիզելը կթանկանա մեկ լիտրի համար 60 դրամով կամ 15 տոկոսով։ Դիզելի ակցիզային հարկը կնվազի մեկ տոննայի համար 22 հազար դրամով (մեկ լիտրի համար 18 դրամով), բայց կհայտնվի 20-տոկոսանոց ԱԱՀ (այժմյան գնով` 75 դրամ)։
Հայաստանում դիզելով հիմնականում աշխատում են ավտոբուսները, գյուղատնտեսական և հատուկ տեխնիկան (այդ թվում` հանքավայրերում)։
Երեկ Հայաստանի նախագահ Սերժ Սարգսյանը տնտեսական գերատեսչությունների ղեկավարների հետ քննարկել է սպառողական ապրանքների գների աճը։ Նախագահը պահանջել է թույլ չտալ սպեկուլյատիվ թանկացումներ։
