Արենիի գինու փառատոն

Կոլայի շշերի մեջ լցված հայկական գինին զվարճացրել է բրիտանացի «ալկո–գուրուին»

295
(Թարմացված է 21:11 04.11.2017)
Հայաստանում Coca-Cola–ի շշերի մեջ լցված գինիներն անտարբեր չեն թողել անգլիացի գրող Հենրի Ջեֆիսին, և նա այդ մասին գրել է The Spectator պարբերականում։

ԵՐԵՎԱՆ, 4 նոյեմբերի — Sputnik. Հայաստանի Վայոց Ձորի ճանապարհին 100 մետրը մեկ Coca-Cola-ի շշեր են վաճառվում, որոնց մեջ լցված է ոչ թե հայտնի ըմպելիքը, այլ հայկական գինի, The Spectator-ում գրել է անգլիացի գրող Հենրի Ջեֆիսը։

Նա գրել է հայաստանյան տպավորությունների մասին և պատմել գինեգործության և խաղողագործության հարուստ ավանդույթների մասին, որոնք վերջին տարիներին վերածնվում են Հայաստանում։

«Վայոց Ձորում լոլիկները, ձմերուկներն ու Coca-Cola-ի շշերը վաճառվում են գրեթե 100 մետրը մեկ։ Իսկ շշերում էլ ոչ թե այն է, ինչ պետք է լինի, այլ տեղական գինի»,- գրում է նա։

Ջեֆիսը Վայոց Ձորում ծանոթացել է ձեռնարկատեր ամուսինների` Զորիկ Ղարիբյանի և Երազի հետ, որոնք եկել են Իտալիայից։ Ամուսինները մեծ ջանքեր են ներդրել Հայաստանում գինեգործությունը զարգացնելու համար։ Սկզբում ցանկացել են գինի արտադրել Իտալիայում, բայց Հայաստան այցելելուց հետո որոշել են բիզնես սկսել այստեղ։

«Երբ մարդիկ իմացել են, որ նրանք ուզում են խաղողի տեղական սորտերից գինի ստանալ, ծիծաղել են Ղարիբյան ամուսինների վրա։ Բայց մի շարք փորձարկումներից հետո 2006 թվականին նրանք Արենիում տնկել են խաղողի առաջին այգին»,- գրում է հեղինակը։

Սկզբում գինի են պատրաստել սեփական ավտոտնակում, հետո գինու գործարան են բացել, որն այսօր զինված է իտալական բարձրակարգ տեխնիկայով։

«Գինին պահել են փայտյա տակառներում, որոնք համ են տվել գինուն, հետո սկսել են կիրառել հայկական ավանդական տեխնոլոգիաները և գինին պահել են հողում թաղված կավե ամանների ու իտալական հատուկ տարաների մեջ»,- գրում է Ջեֆրիսը։

Հեղինակը նշում է, որ հայ գինեգործները հրաշալի կերպով համադրում են ժամանակակից տեխնոլոգիաներն ու ավանդական մեթոդները։

Ջեֆրիսին հիացրել է Արենիի քարանձավը, որտեղ հնագետները 2007 թվականին հայկական խաղողագործության 4 հազար տարվա պատմությունն ապացուցող իրեր են հայտնաբերվել։

295