ԵՐԵՎԱՆ, 30 հոկտեմբերի — Sputnik, Լաուրա Սարգսյան. Բաբկեն Սալբիյանն ազատվել է Սամցխե-Ջավախքի և Ծալկայի ընդհանուր առաջնորդական փոխանորդի պաշտոնից։ Այս լուրն արդեն մի քանի օր է` անհանգստացնում է հայերին, այս մասին Sputnik Արմենիային հայտնեց Ախալքալաքի քաղաքապետ Յուրիկ Հունանյանը։
Հոգևոր առաջնորդի հեռանալու մասին լուրը հոկտեմբերի 25-ին հայտնել էր Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանը։ Նա հայտնել էր, որ Սամցխե-Ջավախքի և Ծալկայի ընդհանուր առաջնորդական փոխանորդ Հոգեշնորհ Տեր Բաբկեն վարդապետ Սալբիյանը ազատվում է զբաղեցրած պաշտոնից այլ ծառայության կոչվելու և փոխառաջնորդարանում սպասվող կառուցվածքային փոփոխությունների բերումով:
«Ես նույնպես միանում եմ Ախալքալաքի բնակիչներին և համաձայն եմ այն ամենի հետ, ինչ գրված է կաթողիկոսին ուղղված նամակում։ Բաբկեն Սալբիյանն իր ծառայության ընթացքում շատ բան է արել մեր տարածաշրջանի համար»,- ասաց Հունանյանը։
Նա հույս ունի, որ կաթողիկոսը հաշվի կառնի իրենց դիրքորոշումը, և հոգևոր առաջնորդը կվերադառնա։
Ջավախահայերն իրենց բաց նամակում գրում են, որ «ցնցվել են այդ լուրից»։
«Վիրահայոց թեմին մտահոգում է այս իրավիճակը, որը վնասում է մեր հոգևոր կյանքը։ Առանց նրա իմաստուն խորհուրդների` մարդիկ կարող են հեռանալ եկեղեցուց։ Խնդրում ենք վերանայել Ձեր որոշումը»,- գրված է նամակում։
Սոցցանցերի օգտատերերը խիստ քննադատության են ենթարկել այս որոշումը։ Նրանք շեշտում են, որ Բաբկեն Սալբիյանի շնորհիվ են վերադարձել եկեղեցի։ Շատերն այս դեպքը կապում են Գումբուրդոյում տեղի ունեցած դեպքերի հետ։
Սեպտեմբերի 30-ի առավոտյան Ջավախքի Գումբուրդո գյուղի հայազգի բնակիչները փորձել էին խաչքար տեղադրել 10-րդ դարի եկեղեցու բակում, բայց իշխանությունները թույլ չէին տվել, որի հետևանքով բախում էր տեղի ունեցել ոստիկանների և գյուղացիների միջև: Գյուղ էր բերվել Վրաստանի ոստիկանության հատուկ նշանակության գումարտակը, դեպքի վայր էր ժամանել Վրաստանի ներքին գործերի նախարար Գեորգի Մգեբրիշվիլին։
Վիրահայոց թեմում բացառում են այդ տարբերակը և նշում, որ Սալբիյանն իսկապես «ոտքի է կագնեցրել» ջավախահայերի հոգևոր կյանքը։
«Գուցե նրան ավելի բարձր պաշտոն առաջարկվի։ Եկեք սպասենք կաթողիկոսի որոշմանը»,- Sputnik Արմենիայի հետ զրույցում ասաց Վիրահայոց թեմի մամուլի քարտուղար Սուսաննա Խաչատրյանը։
Բաբկեն Սալբիյանը ծնվել է 1964 թվականի դեկտեմբեր 4-ին Երևանում։ Ջավախքում ծառայության է անցել 2001 թվականի հունվարի 6-ին։
