ԵՐԵՎԱՆ, 16 օգոստոսի — Sputnik. Կանադայի հայկական համայնքի առաջնորդները ցանկանում են երկրի կառավարությանը համոզել, որ չեղարկեն կանադական զրահամեքենաներն Ադրբեջան արտահանելու գործարքը։ Այս մասին գրում է CBC Canada-ն:
Արշավը սկսվել է, երբ Radio Canada International-ը և CBC-ն հայտնել են, որ INKAS Armored Vehicle Manufacturing-ը Ադրբեջանի Ներքին գործերի նախարարության հետ համաձայնագիր է ստորագրել զրահամեքենաներ մատակարարելու մասին:
Կանադա-հայկական կոմիտեի քաղաքական հարցերով նախագահ Շահե Թանաչյանը նամակ է ուղարկել Կանադայի վարչապետ Ջասթին Թրյուդոյին, որում հայտնել է հայ համայնքի մտահոգությունը:
«Զենք տրամադրելու որոշումը մի երկրի, որը պարբերաբար սպառնում է տարածաշրջանի խաղաղությանը, խախտում է այն բոլոր սկզբունքները, որոնց մենք` կանադացիներս, աջակցում ենք, և որոնք Կանադայի Միջազգային գործերի նախարարությունը ձգտում է աշխարհում առաջ մղել»,- նշված է նամակում:
Կանադայի Հայկական ազգային կոմիտեն (ANCC) դիմել է նաև խորհրդարանի ավելի քան 50 անդամների՝ խնդրելով փոխանցել այն տեղեկությունը, որ ամբողջ հայ-կանադական համայնքը «բացարձակապես ցնցված է»:
Կանադայի ԱԳ նախարարի մամուլի քարտուղար Ադամ Օսթինը հայտարարել է, որ խորհրդարանում Կանադայի ԱԳ նախարարի ներկայացուցիչ Մեթ Դեքորսին առաջին հնարավորության դեպքում կհանդիպի հայ համայնքի ներկայացուցիչների հետ: «Հայաստանը Կանադայի մտերիմ բարեկամն է և դաշնակիցը»,- նշել է Օսթինը:
Նա նշել է, որ միջանձնային և էթնիկ ամուր հարաբերություններն օգտակար են երկու երկրների համար:
«Մենք հպարտ ենք, որ սերտորեն համագործակցում ենք Կանադայի հայ համայնքի, ինչպես նաև Հայաստանի կառավարության հետ»,- նշել է նա:
