ԵՐԵՎԱՆ, 14 հուլիսի — Sputnik. Հայաստանի բժշկությունը ոչնչով չի զիջում իսրայելականին. իր հոդվածն այսպես է վերնագրել բլոգեր Վլադ Վզրիվլինը։
«Ես էլ ծանոթացա հայկական բժշկությանը։ Մասնավոր կլինիկայում անցկացված երկու բարդագույն վիրահատություն, ընդ որում` չորս օր մնացի առանձին հիվանդասենյակում, որտեղ VIP սպասարկում կար։ Բուժսպասարկման արդյունքն ու որակը գերազանց էր։ Գինը` 800 դոլար ամեն ինչի համար` չհաշված դուրս գրվելուց հետո նշանակված դեղերը։ Բայց դեղերն առանձին թեմա են։ Իսրայելում այդ ամենի համար ես առնվազն 10 անգամ շատ կվճարեի»,- գրում է բլոգերը։
Նրա խոսքով` երևանյան այդ բուժկենտրոնում աշխատում են այնպիսի բժիշկներ, որոնք իրենց աշխատանքային փորձով ու տաղանդով ապացուցել են բժիշկ լինելու իրենց կոչումը։
«Բոլոր բժիշկները պարտադիր ստաժավորում են անցնում արտասահմանում, ընդ որում` ոչ թե մեկ անգամ, այլ` անընդհատ։ Մեկնում են ԱՄՆ, Շվեյցարիա, Գերմանիա, Ռուսաստան, Ավստրիա։ Նրանց կարելի է վստահել. ասում եմ` սեփական փորձս հաշվի առնելով»,- գրել է Վզրիվլինը։
Նա ընդգծված խոսել է նաև անձնակազմի բարեհամբույր վերաբերմունքի ու կլինիկայի` ժամանակակից սարքավորումներով հագեցած լինելու մասին։
«Իսրայել կամ Գերմանիա մեկնող ռուսաստանցիներին խորհուրդ եմ տալիս բուժման համար մենել Հայաստան։ Նրանք, ովքեր բժիշկների օգնության կարիք ունեն, բայց չունեն բավարար գումար Արևմուտքում կամ Իսրայելում բուժվելու համար, Հայաստանը կարող է փրկություն դառնալ»,- ասել է Վզրիվլինը։
Այս հրապարակումն էլ, ըստ նրա, բժիշկներին ուղղված յուրօրինակ շնորհակալական խոսք է։
