ԵՐԵՎԱՆ, 29 մայիսի — Sputnik. «Երևանյան ամառ 2017»-ի շրջանակում մայրաքաղաքում կանցկացվի շուրջ 60 միջոցառում:

© Sputnik / Сергей Мальгавко

Երևանը կզարդարվի 2 միլիոն ծաղիկներով

«Երևանյան ամառ» խորագրով միջոցառումները կմեկնարկեն հունիսի 1-ին՝ երեխաների պաշտպանության միջազգային օրը: Ծրագրի մանրամասները լրագրողների հետ հանդիպմանը ներկայացրել են Երևանի քաղաքապետարանի աշխատակազմի մշակույթի և տուրիզմի վարչության պետ Ռուբեն Հովհաննիսյանը և արտաքին ձևավորման և գովազդի վարչության պետ Արազ Բաղդասարյանը:

«Մայրաքաղաքի ամառային կյանքն առավել բովանդակալից դարձնելու հիմնական նպատակ ունեցող «Երևանյան ամառ 2017» ծրագրի բոլոր միջոցառումները կառանձնանան համապատասխան տարբերանշանով, որն իր մեջ կրում է ուրախ ու հետաքրքիր առօրյայի կազմակերպման ամբողջ գաղափարախոսությունը: «Երևանյան ամառ 2017»-ը կիրականացվի Երևանի քաղաքապետարանի և համայնք-մասնավոր հատված համագործակցությամբ: Ծրագրի մանրամասներին մեր համաքաղաքացիները կկարողանան ծանոթանալ մի քանի եղանակով: Տեղեկատվական բուկլետներն արդեն այսօրվանից կբաժանվեն բոլոր վարչական շրջանների մարդաշատ վայրերում: Միջոցառումների մասին տեղեկատվությունը հասանելի կլինի նաև քաղաքապետարանի պաշտոնական www.yerevan.am և www.myYerevan.am կայքերում», — նշել է Արազ Բաղդասարյանը:

«Երևանյան ամառ 2017» ծրագրում ընդգրկված է ավանդական դարձած ու նոր շուրջ 60 միջոցառում՝ փառատոներ, ցուցահանդեսներ, բացօթյա համերգներ, մարզական մրցույթներ, ինչպես նաև օրացուցային տոներ: Արդեն ավանդական դարձած և սիրված ծրագրերից կրկին կանցկացվեն «Համով-հոտով Երևան», «Երևան ՏԱՐԱԶֆեստ», «Ֆրեսկո», «Պարում է Երևանը», Գարեջրի և Ձմերուկի փառատոները: «Երևանյան ամառ 2017» ծրագրով այս տարի առաջին անգամ կանցկացվեն «Պաղպաղակի օր» և Ընտանի կենդանիների ցուցադրական 1-ին մրցույթ-փառատոները:

«Երևանի քաղաքապետի նախաձեռնությամբ անցկացվող «Երևանյան ամառ» եռամսյա միջոցառումների ծրագրի շնորհիվ այս հինգ տարվա ընթացքում մայրաքաղաքը դարձել է փառատոնային քաղաք: Մեր կողմից արված հարցումները ցույց են տվել, որ մի շարք միջոցառումներ սիրվել են ոչ միայն մեր համաքաղաքացիների, այլև Երևան այցելող զբոսաշրջիկների կողմից, ինչը վստահաբար նպաստում է զբոսաշրջության զարգացմանը: Այս տարի երևանցիներին ու մայրաքաղաքի հյուրերին սպասում են նաև մի շարք նորություններ, այդ թվում՝ փառատոնային: Ի դեպ, նշեմ, որ միջոցառումներում ակտիվ ներգրավված կլինեն Երևանի քաղաքապետարանի ենթակայության կրթամշակութային և մարզական հաստատությունների սաները, այդ թվում նաև հաշմանդամություն ունեցող անձինք»,- նշել է Ռուբեն Հովհաննիսյանը:

«Երևանյան ամառ 2017» ծրագրի շրջանակում միջոցառումներ կկազմակերպվեն մայրաքաղաքի բոլոր վարչական շրջաններում, զբոսայգիներում և հանգստի գոտիներում՝ ուղղված տարբեր տարիքային խմբերի և տարբեր հետաքրքրություններ ունեցող անձանց համար:

Երևանյան երեկոները կուղեկցվեն երաժշտական ավանդական՝ «Երևանյան բառդ», «Հնչում է Երևանը» միջոցառումներով: Ամռան երեք ամիսներին տարբեր ցուցադրություններով հանդես կգան Երևանի քաղաքապետարանի ենթակայության թանգարաններն ու ցուցասրահները: «Երևանյան ամառ 2017»-ի շրջանակում յուրաքանչյուր շաբաթ օր համայնքային ենթակայության Երևան քաղաքի պատմության, «Էրեբունի» պատմահնագիտական արգելոց-թանգարանում, Ժամանակակից արվեստի և Կ. Դեմիրճյանի անվան թանգարաններում, «Էդուարդ Իսաբեկյան» ցուցասրահում և «Հայ-Արտ» մշակութային կենտրոնում մուտքը կլինի ազատ:

Այս ամառը հագեցած կլինի նաև մարզական միջոցառումներով՝ Երևանի քաղաքապետի փոխանցիկ գավաթի մրցաշար, «Դրեգ Րեյսինգ» արագընթաց Երևան սպորտային մեքենաների 1-ին մրցաշարը, «Երևան դրիֆթքինգ» ավտոշոուն և այլ նախաձեռնություններ:

«Երևանյան ամառ 2017» միջոցառումների ծրագիրը կեզրափակվի օգոստոսի 31-ին՝ «Ցտեսությո՛ւն, ամառ» խորագրով անցկացվելիք ծրագրով:

ԵՐԵՎԱՆ, 3 մարտի – Sputnik. Ավարտվեց «Հայրենիքի փրկության շարժման» անդամների հանդիպումը ՀՀ նախագահ Արմեն Սարգսյանի հետ։ «Հայրենիք» կուսակցության ղեկավար Արթուր Վանեցյանը հանդիպումից հետո լրագրողներին հայտնեց, թե ինչ է խոստացել ՀՀ նախագահը։

«Նախագահի հետ հանդիպման ժամանակ քննարկվել են հարցեր, որոնք կապված են Զինված ուժերի ԳՇ պետի ազատման դիմումը Սահմանադրական դատարան ուղարկել-չուղարկելու հետ։ Նախագահը լսեց մեր հարցերը, տեսակետները, նշեց, որ առաջիկա ժամերին իր որոշման մասին կհայտնի»,-ասաց Վանեցյանը։

Հավելենք, որ նախագահի հետ հանդիպմանը մասնակցում էին «Հայրենիք» կուսակցության նախագահ Արթուր Վանեցյանը, ՀՅԴ անդամ Արծվիկ Մինասյանը, ՀՀԿ-ական Վահրամ Բաղդասարյանը և Հայրենիքի փրկության շարժման վարչապետի միասնական թեկնածու Վազգեն Մանուկյանը։

© Photo : official site of the MoD of RA

Օնիկ Գասպարյանը շարունակում է մնալ ԶՈւ բարձրագույն զինվորական հրամանատարը. Գլխավոր շտաբ

ՀՀ նախագահի մամուլի ծառայությունը երեկ հայտնեց, որ Արմեն Սարգսյանը որոշել է չստորագրել ՀՀ վարչապետ Նիկոլ Փաշինյանի` ԶՈւ ԳՇ պետ Օնիկ Գասպարյանին պաշտոնից ազատելու հրամանագրի նախագիծը, միաժամանակ առաջնորդվելով Սահմանադրության 169-րդ հոդվածի 1-ին մասի 4-րդ կետով` ՀՀ նախագահն առանձին դիմումով դիմելու է ՍԴ` «Զինվորական ծառայության և զինծառայողի կարգավիճակի մասին» 2017թ. նոյեմբերի 15-ի ՀՀ օրենքի՝ Սահմանադրությանը համապատասխանելու հարցը որոշելու խնդրանքով։

Ավելի վաղ «Մեկ Հայաստան» կուսակցության նախագահ, Հայրենիքի փրկության շարժման ներկայացուցիչ Արթուր Ղազինյանը գրել էր, որ Արմեն Սարգսյանն ու Նիկոլ Փաշինյանը երեկ եկել են համաձայնության՝ իրավական աճպարարության միջոցով իրագործելու Նիկոլ Փաշինյանի` Օնիկ Գասպարյանին զբաղեցրած պաշտոնից ազատելու ցանկությունը։ Մասնավորապես, ըստ հաստատված ծրագրի, Արմեն Սարգսյանը կդիմի ՍԴ, բայց ոչ թե վարչապետի առաջարկության սահմանադրականությունը ստուգելու, այլ 2018թ-ի հունիսի 11-ին ընդունված «Զինվորական ծառայության և զինծառայողի կարգավիճակի մասին» ՀՀ օրենքում կատարված փոփոխությունների սահմանադրականությունը վիճարկելու պահանջով։

Ղազինյանի խոսքով` նման սխեմա կիրառվել է նաև 2018թ-ին Մովսես Հակոբյանին զբաղեցրած պաշտոնից ազատելու համար։ ՀՀ ԱԺ նշված օրենքում կատարվել է լրացում, համաձայն որի` բարձրագույն հրամանատարական կազմի` զինվորական պաշտոնից ազատումը կարող է իրականացվել` անկախ այն հանգամանքից՝ առկա են սույն հոդվածի 1-ին մասում սահմանված հիմքեր, թե ոչ։

© Photo : press office of the Government of RA

Փաշինյան-Մարուքյան հանդիպումը հետաձգվել է

Նրա խոսքով` սա նշանակում է, որ Օնիկ Գասպարյանին զբաղեցրած պաշտոնից ազատելու ՀՀ վարչապետի որոշումը կմտնի օրինական ուժի մեջ, և Օնիկ Գասպարյանը իրավաբանորեն կդադարի լինել ՀՀ ԶՈւ Գլխավոր շտաբի պետ։

Հիշեցնենք` Հայաստանի ներքաղաքական իրադրությունը սրվեց, երբ ՀՀ ԶՈւ Գլխավոր շտաբը փետրվարի 25-ին պահանջեց ՀՀ վարչապետ Նիկոլ Փաշինյանի հրաժարականը` ասելով, որ քաղաքական ղեկավարությունը պետությունը տանում է դեպի վտանգավոր սահմանագիծ։ 

Ի պատասխան Նիկոլ Փաշինյանը հայտարարեց ռազմական հեղաշրջման փորձի մասին և քաղաքացիներին կոչ արեց հավաքվել Հանրապետության հրապարակում՝ հեղափոխությունը պաշտպանելու համար։

Նա հայտնեց նաև, որ ստորագրել է Գլխավոր շտաբի պետ Օնիկ Գասպարյանին պաշտոնից հեռացնելու փաստաթուղթը, որը, սակայն, ՀՀ նախագահ Արմեն Սարգսյանը չստորագրեց և հետ ուղարկեց փետրվարի 27–ին։ Նույն օրը վարչապետը  առաջարկությունը կրկին ուղարկեց ՀՀ նախագահին։