ԵՐԵՎԱՆ, 4 մայիսի — Sputnik. Բժիշկներն այժմ այցելում են բոլոր այն հիվանդանոցները, որտեղ գտնվում են նախօրեին ծնված փոքրիկները։ «Էրեբունի» ԲԿ-ի գործադիր տնօրեն Միքայել Մանուկյանի խոսքով` նրանց առողջական վիճակն այս պահին կայուն է։
«Ծնվելուն հաջորդող առաջին 10 օրը նրանց վիճակը պետք է կայուն լինի, հետո պետք է սկսեն քաշ հավաքվել, այնուհետև լուծվեն անհաս երեխաներին բնորոշ մյուս խնդիրները»,- ասաց Մանուկյանը։
Նրա խոսքով` երեխաները դեռ շնչում են արհեստական սարքերի օգնությամբ։
«Ամեն ինչ ընթանում է այնպես, ինչպես մենք սպասում էինք։ Երեխաները շատ փոքր էին, և մեկ-երկու օրվա ընթացքում նրանց վիճակը չէր կարող կտրուկ լավանալ»,- ասաց նա։
Մանուկյանը շեշտեց, որ փոքրիկները գտնվում են մասնագետների հսկողության ներքո։
«Նրանք սովորական անհասներ չեն, այլ` ծայրահեղ անհասներ, բայց մենք ամեն ինչ անում ենք, որ լավ լինի։ Եվ վստահ եմ, որ այդպես էլ կլինի»,- ասաց նա։
Մանուկյանի խոսքով` փոքրիկների մոր առողջական վիճակը լավ է։
Նշենք, որ երեկ` մայիսի 3-ին, Արշալույս գյուղի 23-ամյա Լուսինե Պողոսյանը լույս աշխարհ է բերել միանգամից 5 զավակ` չորս աղջիկ և մեկ տղա։
Փոքրիկները (չորս աղջիկ և մեկ տղա) լույս աշխարհ են եկել 600, 820, 840, 840 և 880 գրամ քաշով։ Անհրաժեշտ վերակենդանացման միջոցառումներ ցուցաբերելուց անմիջապես հետո նորածիններից երկուսը` տղան և աղջիկներից մեկը, տեղափոխվել են «Մուրացան» բժշկական համալիր։
Նորածիններից մեկը տեղափոխվել է «Սուրբ Աստվածամայր» ԲԿ-ի, իսկ մյուսը` Մոր և մանկան առողջության պահպանման գիտահետազոտական կենտրոնի վերակենդանացման բաժանմունքներ։ Փոքրիկներից մեկը մնացել է «Էրեբունի» ԲԿ-ի նորածնային վերակենդանացման բաժանմունքում։
