Սիդնեյ

Ցեղասպանության զոհերի հոգիները պետք է հանգիստ գտնեն. Արդարության երթ Սիդնեյում

23
Ցեղասպանության 102-րդ տարելիցի նախօրեին Ավստրալիայում Արդարության երթ կանցկացվի:

ԵՐԵՎԱՆ, 18 ապրիլի — Sputnik. Ապրիլի 23-ին Սիդնեյում Հայոց ցեղասպանության զոհերի հիշատակին նվիրված Արդարության երթ կանցկացվի: Ավստրալիայի հայկական կազմակերպությունների ղեկավարները տեսաուղերձ են հղել երկրի քաղաքացիներին՝ հորդորելով մասնակցել այդ երթին:

Ավստրալիայում բնակվող հայերին դիմել են հայկական համայնքի հարգարժան ներկայացուցիչները:

«Եկեք միասին դուրս գանք երթի և մեր ժողովրդի ու մարդկության դեմ իրականացված չարագործությունը ճանաչելու արդար պահանջը ներկայացնենք»:

«Մեր պայքարը կշարունակվի այնքան ժամանակ, քանի դեռ 1.5 միլիոն անմեղ զոհերի հոգիներն իրենց հանգիստը չեն գտել»:

Ավստրալիայում անցկացվող միջոցառման շրջանակում հայերը կդիմեն միջազգային հանրությանը՝ հորդորելով դատապարտել Թուրքիայի ժխտման քաղաքականությունը:

1915 թվականին տեղի ունեցած ոճրագործությունը, որի հետևանքով Օսմանյան կայսրությունում ավելի քան 1.5 մլն հայ է սպանվել, ХХ դարի առաջին ցեղասպանությունն է համարվում։ Թուրքիան ավանդաբար մերժում է ցեղասպանություն իրագործելու մեղադրանքներն ու անչափ ցավագին է ընդունում այդ հարցի վերաբերյալ քննադատությունները։

Հայոց ցեղասպանությունն առաջինը ճանաչել է Ուրուգվայը 1965 թվականին, այնուհետև նրա օրինակին են հետևել Ֆրանսիան, Իտալիան, Գերմանիան, Հոլանդիան, Բելգիան, Լեհաստանը, Լիտվան, Սլովակիան, Շվեդիան, Շվեյցարիան, Հունաստանը, Կիպրոսը, Լիբանանը, Կանադան, Վենեսուելան, Արգենտինան, Բրազիլիան, Չիլին, Վատիկանը, Բոլիվիան, Չեխիան, Ավստրիան, Լյուքսեմբուրգը։ ԱՄՆ 50 նահանգներից 44-ը պաշտոնապես ճանաչել և դատապարտել է Հայոց ցեղասպանությունը, ինչպես նաև ապրիլի 24-ը հայտարարել Հայոց ցեղասպանության զոհերի հիշատակի օր։

23