ԵՐԵՎԱՆ, 24 մարտի — Sputnik. Աշխարհի ավելի քան 170 երկրներից 2 մլրդ մարդ իններորդ անգամ կմասնակցի «Երկրագնդի ժամ» համաշխարհային ակցիային։ Բացի այն, որ երկիրը մեկ ժամով կընկղմվի մթության մեջ (20:30-ից 21:30), նախատեսված է նաև աղբանոցների մաքրման և վերամշակման նախագիծ իրականացնել։
««Մաքուր Հայաստան» ծրագրի իրականացումը կմեկնարկի ապրիլի 17-ին, իսկ մինչ այդ այն պետք է վերջնական տեսքի հասցնել։ Ծրագիրը մեծ է, նպատակն էլ` երկիրը աղբից մաքրելը», — լրագրողների հետ հանդիպման ժամանակ ասաց Բնապահպանության նախարարության կենսառեսուրսների կառավարման գործակալության պետի տեղակալ Աշոտ Վարդևանյանը։
Ծրագրի նախաձեռնողները հավատում են, որ Հայաստանն առանց աղբի ավելի գրավիչ կլինի։ Բնապահպանական նախաձեռնության շրջանակում նախատեսվում է քարտեզագրել երկրի բոլոր աղբանոցները։ Միայն Նոյեմբերյանում կա շուրջ 42 աղբանոց, Տավուշում դրանց թիվը հասնում է 150-ի, Դիլիջանում` 33-ի։
Որոշ տարածքներ ամբողջովին կմաքրվեն աղբից։ Ծրագրի նախաձեռնողները խոստանում են մոտ ապագայում երկրի բոլոր աղբանոցները համապատասխանեցնել եվրոպական չափանիշներին։
«Հայաստանի քաղաքացիներին կոչ ենք անում մասնակցել «աղբային քարտեզների» ստեղծմանը։ Բավական է միայն ուղարկել աղբանոցի լուսանկարն ու կոորդինատները», — լրագրողների հետ զրույցում ասաց տարածքային կառավարման նախարարի տեղակալ Արտաշես Բախշյանը։
Նա նաև կոչ արեց երկրի քաղաքացիներին միանալ ակցիային և մեկ ժամով անջատել լույսերը։ Առաջին անգամ էլեկտրականությունը մեկ ժամով անջատելու գաղափարն իրագործվել է 2007թ.-ին Սիդնեյում (Ավստրալիա)։ Ակցիայի հեղինակը WWF-ն էր։ Հայաստանն այդ նախաձեռնության մասնակից է դարձել 2009 թվականին։
Հայտնի է, որը մարդը կործանարար ազդեցություն է ունենում բնության վրա, և դրա հետևանքները կատակլիզմների ձևով բացասական ազդեցություն են ունենում մարդու վրա։ Էլեկտրաէներգիայի անխնա օգտագործումը ոչ միայն ազդում է սակագնի վրա, այլ նաև բացասաբար է անդրադառնում բնության և կլիմայի վրա։ Կլիմայի փոփոխությունն էլ իր հերթին ազդում է գյուղատնտեսության, էներգետիկայի և այլ ոլորտների վրա։
Յուրաքանչյուր երկիր յուրովի է անցկացնում Երկրի ժամը, սակայն բոլորն էլ այդ օրը անջատում են էլեկտրաէներգիան։ Այսպես, 2011թ.-ին առանց հոսանքի են մնացել ողջ աշխարհի հայտնի հուշարձանները, որոնց շարքում են «Էմփայեր սթեյթ բիլդինգը» (Նյու Յորք), «Ոսկե դարպասներ» կամուրջը (Սան Ֆրանցիսկո), Հռոմի Կոլիզեյը, Սիդնեյի Օպերային թատրոնը և այլն։
