Դաունի համախտանիշ

«Ինձ խորթ աչքով չնայեք». Դաունի համախտանիշով մարդիկ ուզում են լսելի դառնալ աշխարհին

118
(Թարմացված է 16:05 21.03.2017)
«Իմ ձայնը, իմ համայնքը». սա այն կարգախոսն է, որով այս տարի Դաունի համախտանիշ ունեցողները փորձում են իրենց խնդիրները լսելի դարձնել։ Արդեն 12–րդ տարին է` աշխարհը նշում է Դաունի համախտանիշի օրը։

ԵՐԵՎԱՆ, 21 մարտի — Sputnik. Մարտի 21-ին աշխարհի շատ երկրներում անցկացվում է «Lots of socks» («Գունավոր գուլպաներ») ֆլեշմոբը, որի նպատակն է ուշադրություն հրավիրել Դաունի սինդրոմ ունեցողների խնդիրներին։ Հայտարարված ֆլեշմոբի համաձայն` ամբողջ աշխարհում մարդիկ կրում են գունազարդ և տարբեր նախշերով գուլպաներ հասկանալու համար` ինչ է նշանակում լինել մյուսներից տարբեր և ստիպված լինել հանդուրժել շրջապատի խորթ հայացքները։

Դաունի համախտանիշ հանդիպում է այն երեխայի մոտ, ում 21-րդ քրոմոսոմն ունի ամբողջական կամ մասնակի կրկնօրինակ։ Խորհրդանշական է, որ հենց ամսի 21-ին են նշում Դաունի համախտանիշի համաշխարհային օրը։

«Ամուսնությունից առաջ հնարավոր է ստուգել հավանականությունը`զույգերի մոտ կծնվի՞ Դաունի համախտանիշով երեխա, թե՞ ոչ»,- այսօր հրավիրված ասուլիսի ժամանակ ասաց Բժշկական գենետիկայի և առողջության առաջնային պահպանման կենտրոնի բջջագենետիկայի լաբորատորիայի ղեկավար Սուսաննա Միդյանը։

Դրա համար էլ, վիճակագրական թվերով, Դաունի համախտանիշով ծնվածների թիվն ամբողջ աշխարհում նվազել է։

«90 տոկոս հավանականությամբ Դաունի համախտանիշով երեխաներ ծնվում են, երբ մայրը 40 և ավելի տարիքում է»,- ասաց բժշկական գենետիկայի և առողջության առաջնային պահպանման կենտրոնի բժիշկ-գենետիկ Գոհար Շահսուվարյանը։

Երիտասարդ կանանց մոտ հազվադեպ է հանդիպում Դաունի համախտանիշով ծնված երեխա, եթե «չի աշխատում» ժառանգականության գործոնը։

Հատկապես եվրոպական երկրներում Դաունի համախտանիշով մարդիկ կարողացել են ինտեգրվել հասարակության լայն շրջանակներին ու անհրաժեշտ ուշադրության արժանանալ, ինչը չի կարելի ասել Հայաստանի մասին։ Այսօր մեր երկրում դեռ շարունակում են տարօրինակ հայացքով նայել նման հիվանդություն ունեցող մարդկանց։

Իսկ, օրինակ, Ֆրանսիայում այդ համախտանիշով հիվանդ աղջիկը հավակնում է դառնալ հեռուստաաստղ։ Նա բարձրաձայնել է տարիներ շարունակ գաղտնի պահած երազանքը` ժամանակավորապես դառնալ եղանակի տեսության հաղորդավարուհի։

Նրա քարոզչական տեսանյութը մի քանի օրում ավելի քան 2 միլիոն դիտում է հավաքել։ Մարտի 27-ից «France 2» կամ «BFM TV» հեռուստաալիքի եթերում կարելի է տեսնել Դաունի համախտանիշով աղջկա բենեֆիսը։

Դաունի համախտանիշը չի խանգարել նաև արդեն իսկ հանրահայտ դարձած ավստրալուհի Մեդլին Ստյուարտին։ Համաշխարհային նորաձևության տները մեկը մյուսի հետևից առաջարկներ են անում Ստյուրատին ցուցադրություններին մասնակցելու համար։ Այս պահին նա պատրաստվում է մասնակցել Նյու Յորքում կայանալիք նորաձևության շաբաթին։ Մոդելի մայրը լրատվամիջոցներին հայտնել է, որ դստեր հաջողությունը կոչ է հասարակությանը փոխել վերաբերմունքը սահմանափակ հնարավորություններ ունեցողների հանդեպ։

Медлин Стюарт
Մեդլին Ստյուարտ
118