ԵՐԵՎԱՆ, 31 հունվարի — Sputnik. Կաթնախառնուրդի շշի վրա ադրբեջանական մակնշում հայտնաբերելը մինչև օրս հանգիստ չի տալիս ՀՀ քաղաքացիներին։ Մամուլն էլ ակտիվորեն շարունակում է անդրադառնալ այն դեպքերին, որոնք վերաբերում են հենց Nutrilon ապրանքանիշի մանկական կերին:
Այսօր մի շարք կայքեր, միմյանց հղում տալով, գրել են Վաղարշապատում բնակվող մի փոքրիկի մասին, որը սրտխառնոց է ունեցել ու փսխել մանկական այս կաթնախառնուրդը խմելուց հետո:
Սննդի անվտանգության պետական ծառայության մամուլի խոսնակ Նվարդ Առաքելյանն իր ֆեյսբուքյան էջում գրառում է կատարել` խնդրելով եղած դեպքերը չկապել ադրբեջանական մակնշման հետ։
«Ամռանը նմանատիպ դեպք եղավ. կրկին «հարևանների» լեզվով նշումներ կային այս ապրանքանիշի մանկական կերի տարաների վրա, պարզվեց` լեհական արտադրության է: Բայց այն ժամանակ մակնշման խախտում կար, մասնավորապես` ներմուծողի անունը նշված չէր: Հիմա կարծես շտկել են»,- գրել է Նվարդ Առաքելյանը:
Նա ներկայացրել է նաև ՍԱՊԾ-ի՝ 2016 թվականին անցկացրած դիտարկման արդյունքները:
ՀՀ ԳՆ սննդամթերքի անվտանգության պետական ծառայությունը դիտարկում էր իրականացրել Երևան քաղաքի երկու՝ «Ալֆա-Ֆարմ» և «Ռիթմ Ֆարմ» դեղատներում՝ պարզելու «Nutrilon ProNutra» մանկական կերի մակնշման պահանջների համապատասխանությունը սահմանված նորմերին: Ծառայությունը պարզել էր, որ «Nutrilon ProNutra» մանկական կերն արտադրված է Լեհաստանում (տուփի վրա նշված են եղել տեղեկություններ մի քանի լեզուներով, այդ թվում՝ ադրբեջաներեն), և որևէ խախտում չէր հայտնաբերել:
Փոխարենը դիտարկման ընթացքում արձանագրվել էր, որ դեղատներում վաճառվող «Nutrilon ProNutra» մանկական կերի հայերեն մակնշումը թերի է՝ բացակայում են ներմուծողի տվյալները:
ՍԱՊԾ տեսուչների կողմից տեղում կասեցվել էր վերը նշված մանկական կերի վաճառքը: Ներմուծողին հանձնարարվել էր վերացնել մակնշման բացթողումը: