Արմենուհի Մխոյան, Sputnik.
Այս տարի Քրիստոսի Մկրտության տոնին մասնակցելու նպատակով Գյումրիում էին Հայաստանում Ռուսաստանի Դաշնության դեսպանության ներկայացուցիչները, նրանց ընտանիք անդամները, Հայաստանում զինվորական ծառայությունն իրականացնող զինվորականները, սպաները:
Տոնին մասնակցելու նպատակով Գյումրի եկած հյուրերը նշում էին, որ ռուս համայնքը Հայաստանում եկեղեցական բոլոր ավանդույթները պահպանելու ու ըստ եկեղեցական կանոնների ապրելու հնարավորություն ունի:
«Անցած տարի տոնին մասնակցելու համար Սևան գնացինք և այնտեղ հատուկ ավազանում մասնակցեցինք սուրբ ջրում մկրտության կարգին: Այս տարի էլ դեսպանատան աշխատակիցներով Գյումրի ենք եկել, ճիշտ է` ես այս տարի մկրտությանը չեմ մասնակցի, բայց հաջորդ տարի քաջությունս կհավաքեմ ու կմասնակցեմ»,- նշեց ՀՀ-ում ՌԴ դեսպանատան ներկայացուցիչ Անդրեյ Իվանովը:
Նրա գործընկերը՝ Ալեքսանդր Վասիլևը, որը հատուկ էր Գյումրի եկել Քրիստոսի Մկրտության տոնին մասնակցելու համար, վստահեցրեց, որ նույն նպատակով առաջին անգամ չէ Հայաստան գալիս, ապա ավելացրեց` Հայաստանում իրեն շատ լավ է զգում, ինչպես տանը:
Մկրտությանը մասնակցեցին նաև հայ ուղղափառները, ինչպես նաև` Հայաստանում պարտադիր և պայմանագրային զինվորական ծառայության մեջ գտնվող ռուս զինվորականները: Ի դեպ, պայմանագրային ծառայության մեջ գտնվող զինծառայողների շարքում շատ էին նաև նրանք, ովքեր մինչ այս նույնիսկ Ռուսաստանում չեն մկրտվել, իսկ Գյումրիում փորձեցին և խոստացան հաջորդ տարի ևս կրկնել:
«Իմ ընկերները Ռուսաստանում փորձել էին, ես` ոչ ։ Ահա Հայաստանում հնարավորություն տրվեց, ու այդ հնարավորությունից կօգտվեմ»,- նշեց զինվորներից մեկը:
Ռուս ուղղափառ եկեղեցու հոգևոր հովիվ Հայր Անդրեյի ձեռամբ «Չերքեզի ձոր» կոչվող տարածքում հատուկ ավազանների ջուրն օրհնվելուց ու կարգ կատարելուց հետո բոլոր ցանկացողներին ավազան մտնելու հնարավորություն տրվեց: Առաջինը մկրտության ջուր մտավ հենց Հայր Անդրեյ Վացինը` մեկնաբանելով տոնի խորհուրդը. «Հորդանան գետի ջրերում Քրիստոսին մկրտեց Հովհաննես Մկրտիչը, և Հորդանանի ջրերում մկրտվելով՝ Աստված սրբագործեց ջուրը։ Մեծ ջրօրհնեքը, որը նվիրված է Փրկչի մկրտման հիշողությանը, տաճարներում կատարվում է հունվարի 18-ին և 19-ին:
«Սա պարզապես սովորույթ չէ, այլ` մեղքերից ազատվելու և սուրբ ջրով հոգին ու մարմինը միայն ու միայն հավատքով բժշկելու հոգևոր վիճակ: Ջուրը մեզ համար տաք է, քանի որ ջերմացված է մեր Աստծու շնորհիվ ու առ Աստված մեր սիրով»,- նշեց հոգևոր առաջնորդը՝ ընդգծելով, որ այս կարգը միայն ռուս ուղղափառ եկեղեցին ունի:
Ի դեպ, 2017 թվականը հոբելյանական է՝ նշվում է Ալեքսանդրապոլի ամրոցի կառուցման ու ռուսական կայազորի ձևավորման 180-ամյակը։ Ինչպես նշեց Հայր Վացը, սա էլ այդ միջոցառման շրջանակներում է:
Հայաստանում ռուս ուղղափառներն այս տոնը մեծ ու շուքով են նշում, և մասնակիցների թիվը տարեցտարի ավելանում է։ Այս տարի Հայր Անդրեյի նախաձեռնությամբ` մասնակիցներից շատերը հատուկ մկրտության շապիկներ էին հագել:
Այս օրերին օրհնվում են նաև լճերի ու գետերի ջրերը` ի հիշատակ Աստծու հայտնությանը: Ջրում 3 անգամ ընկղմվելով՝ մարդիկ ազատվում են մեղքերից։ Մկրտության լողն անցկացվում է հունվարի 18-ի լույս 19-ի գիշերը հատուկ ավազաններում։ Օրվա խորհրդով պայմանավորված՝ ջրի օրհնությունը կատարվում է տոնի նախօրեին եկեղեցիներում, մկրտության օրը՝ գետերում և լճերում։ Բացի մկրտության լողից, հավատացյալները խմում են մկրտության ջուրը` հոգևոր ուժ ու առողջություն ստանալու համար, նաև այն ցողելով իրենց տներում՝ մաքրագործում են դրանք:
