ԵՐԵՎԱՆ, 10 դեկտեմբերի — Sputnik. «Աէրոֆլոտ» ավիաընկերության` Մոսկվայից Երևան ժամանող ինքնաթիռն անցած գիշեր արտակարգ վայրէջք է կատարել Մինվոդիի օդանավակայանում: Ուղևորներից մեկը մահացել է օդանավում, թռիչքի ժամանակ:
Այս մասին Sputnik Արմենիային հայտնել է Քաղաքացիական ավիացիայի գլխավոր վարչության (ՔԱԳՎ) մամուլի քարտուղար Սաթենիկ Հովհաննիսյանը:
Ինքնաթիռը Մոսկվայից դուրս է եկել ըստ չվացուցակի, սակայն որոշ ժամանակ անց այն ստիպված արտակարգ վայրէջք է կատարել` 60 տարեկանից բարձր ուղևորներից մեկի մահվան պատճառով:
«Ուղևորը մահացել է ինքնաթիռում, գիշերվա ժամը 2-3-ի սահմաններում: Նրա ինքնազգացողությունը վատացել է, և, չնայած, անձնակազմը ցուցաբերել է առաջին օգնություն, տղամարդու կյանքը փրկել չի հաջողվել», — ասաց Հովհաննիսյանը:
Նրա խոսքով` ինքնաթիռը վայրէջք է կատարել Մինվոդիի օդանավակայանում և այնտեղ մնացել 3-4 ժամ: Մյուս ուղևորներին հաջողվել է բարեհաջող հասնել Երևան առավոտյան ժամը 7:30-ի սահմաններում:
